Biełaruskija dalnabojščyki skardziacca na skaračeńnie zarpłat u Jeŭropie
Urazać zarobki pačali vialikija kampanii. Hetamu jość niekalki pryčyn.
Raniej pavyšali, ciapier panižajuć
Dalnabojščyki skardziacca, što litoŭskija i polskija kampanii ŭ apošnija miesiacy skaračajuć zarpłaty kiroŭcam.
Pa słovach surazmoŭcy, u adnoj bujnoj litoŭskaj kampanii z 1 krasavika sutačnyja vypłaty panizili na 5 jeŭra. Heta druhoje panižeńnie zarobkaŭ z pačatku hoda.
Ciapier kiroŭcy, jakija niadaŭna ŭładkavalisia na firmu, atrymlivajuć 64 jeŭra za sutki pracy, a daśviedčanyja kiroŭcy sa stažam — 71 jeŭra. Letaś na piku sutačnyja zarpłaty dasiahali 85 jeŭra.
«U 2021-2023 hadach naziraŭsia pastupovy rost zarobkaŭ. Za dva hady staŭki padraśli prykładna na 10 jeŭra za sutki. Sioleta nazirajecca advarotny praces», — kaža surazmoŭca.
Padobnaje skaračeńnie sutačnych mužčyna nazyvaje adčuvalnym, bo ceny na ŭsio za apošnija hady vyraśli, a zarpłata paśla apošnich dvuch skaračeńniaŭ zastałasia na ŭzroŭni trochhadovaj daŭniny.
Trend zadali litoŭskija pieravozčyki
Inšy dalnabojščyk, jaki pracuje ŭ Polščy, taksama adznačaje, što niekatoryja kampanii padchapili hety trend.
«Spačatku zarpłaty pačali ŭrazać bujnyja litoŭskija pieravozčyki, da ich dałučylisia polskija firmy ź litoŭskimi karaniami. Paźniej toje sama pačali rabić i niekatoryja polskija firmy», — kaža surazmoŭca.
Bolš za ŭsio, ź jaho słoŭ, zarpłaty panizili ŭ polskich firmach, jakija naležać biełarusam.
«U takich ciapier płaciać pa 60 jeŭra za sutki, kali kiroŭca jedzie, i pa 24 jeŭra, kali staić u čarzie».
Zarobki ŭrazajuć u asnoŭnym u vialikich kampanijach
Mužčyna adznačaje, što niekatoryja kampanii ŭ Polščy stali viartacca da starych vysokich taryfaŭ, bo pačaŭsia adtok kadraŭ.
«Apuścili staŭki da 65 jeŭra, narmalnyja kiroŭcy pačali raźbiahacca, ciapier znoŭ padniali da 75 jeŭra. Ale skaračeńni zarpłat adbylisia nie va ŭsich polskich kampanijach abo prynamsi nie zakranuli ŭsich kiroŭcaŭ. U mianie staŭka nie źmianiałasia», — pryznajecca mužčyna.
Jašče adzin surazmoŭca, jaki raniej šmat hadoŭ adpracavaŭ u Litvie, a paźniej pierajšoŭ u polskuju firmu, taksama kaža, što pieršymi ŭrazać zarpłaty kiroŭcam pačali mienavita bujnyja litoŭskija pieravozčyki.
«U mianie šmat znajomych pracujuć u litoŭskich firmach, tam amal usim za apošnija miesiacy padrezali zarpłaty na 10-15 jeŭra za sutki. U Polščy taksama mnohija skaracili staŭku, ale paśla znoŭ pavysili. Viedaju ludziej, dzie spačatku źmienšyli na 10 jeŭra, a potym 5 jeŭra viarnuli.
Pa nazirańniach, urazajuć zarobki ŭ asnoŭnym u vialikich kampanijach. U małych i siarednich transpartnych kampanijach takoje nazirajecca radziej. Kali čałaviek dobra praciahły čas pracuje, to takim, jak praviła, nie ŭrazajuć», — ličyć surazmoŭca.
Afrykancy i azijaty zamiest słavian
Kiroŭcy nazyvajuć dźvie asnoŭnyja pryčyny, čamu zarobki padajuć: heta napłyŭ kiroŭcaŭ z krain Centralnaj Azii, Afryki i Indyi, a taksama ahulnaje paharšeńnie ekanamičnaj situacyi na fonie vajny Rasii va Ukrainie.
«Ludzi z hetych krain hatovyja pracavać i pa 50 jeŭra za sutki, tamu kampanijam vyhadna brać ich na pracu zamiest biełarusaŭ i ŭkraincaŭ», — ličyć surazmoŭca.
Adzin z dalnabojščykaŭ adznačaje, što ciapier stała krychu składaniej uładkavacca kiroŭcam biez dośviedu pracy ŭ mižnarodnych pieravozkach.
«Składajecca ŭražańnie, što ŭ Biełarusi ŭsie mužyki łamanulisia ŭ dalnaboi, bo takich hrošaj u nas nie zarobiš. A ŭ Jeŭropie taksama kryzis, pracy stanovicca mienš, a achvotnych pracavać — nie. Tamu kampanii i mohuć sabie dazvolić skaračać zarobki kiroŭcam.
Jany nie bajacca, što praz masavyja zvalnieńni ich biznes stanie, bo razumiejuć, što pryjduć indyjcy ci afrykancy, jakija buduć hatovyja pracavać za mienšyja hrošy».
A što ŭ Hiermanii?
Dalnabojščyk, jaki maje polskaje hramadzianstva i pracuje ŭ Hiermanii, kaža, što prynamsi pakul u jaho niamieckich kaleh zarobki nie źmianilisia.
«Ale jość zaściarohi, što hety trend zakranie i našu kampaniju, choć my vykonvajem rejsy tolki pa Hiermanii. Ahulnaja situacyja ŭ pieravozkach takaja, što pracy stała mienš», — kaža mužčyna.
Kamientary