Ziemlatrus vyklikaŭ u hłybini vostrava vielizarnyja apoŭźni.
La ŭschodniaha ŭźbiarežža Tajvania adbyŭsia ziemlatrus mahnitudaj 7,4. Na vostravie i ŭ susiednich krainach vypuścili papiaredžańnie nakont cunami, piša Bi-bi-si.
Epicentr, pa źviestkach Hieałahičnaj słužby ZŠA, znachodziŭsia za 18 km na poŭdzień ad horada Chualań. Sa słoŭ siejsmołahaŭ, heta samy mahutny ziemlatrus na Tajvani za 25 hadoŭ.
U Japonii i na Filipinach nieŭzabavie paśla ziemlatrusu było abvieščana papiaredžańnie ab cunami. Japonskaje mietearałahičnaje ahienctva paźniej źniziła ŭzrovień papiaredžańnia, adnak usio ž pakazała, što afteršoki takoj mahutnaści mohuć praciahvacca jašče da tydnia i nasielnictvu varta zachoŭvać pilnaść.
Kitajskija dziaržaŭnyja ŚMI paviedamili, što padziemnyja šturški taksama adčuvalisia ŭ macierykovaj pravincyi Fucziań na paŭdniovym uschodzie krainy.
«Ziemlatrus pačaŭsia blizka da sušy, na małoj hłybini. Jon adčuvaŭsia na ŭsim Tajvani i susiednich astravach. Jon samy mocny za 25 hadoŭ», — zajaviŭ kiraŭnik Tajbejskaha centra siejsmałohii.
Bujny tajvański vytvorca paŭpravadnikoŭ TSMC paviedamiŭ, što evakujavaŭ supracoŭnikaŭ ź niekalkich svaich fabryk u Sińčžu i na poŭdni vostrava, adnak sistemy biaśpieki pracujuć narmalna. TSMC vyrablaje čypy dla takich kampanij, jak Apple i Nvidia.
U hłybini vostrava reljef vielmi harysty. Miarkujučy pa kadrach u sacsietkach, ziemlatrus vyklikaŭ tam vielizarnyja apoŭźni. Adnak maštab nastupstvaŭ pakul nieviadomy.
Tajvańskija ŚMI pakazvajuć budynki, jakija abrynulisia, i evakuacyju ludziej sa škoł i žyłych damoŭ.
Pavodle apošnich źviestak, čatyry čałavieki zahinuli i 97 paciarpieli, pišuć miascovyja ŚMI.
Što zapisana aficyjnaj pryčynaj śmierci adzinaha syna Jarmošynaj?7
Kamientary