Dzie znachodzicca Sianno? Biełarusy stvaryli bot, jaki dapamoža lepiej vyvučyć hieahrafiju radzimy
Ajcišnica Kaciaryna Haspadaryk, jakaja žyvie ŭ Talinie, napisała na Devby.io pra stvareńnie telehram-bota «Padaroaž», jaki ŭ formie hulni dazvalaje daviedacca, dzie znachodziacca biełaruskija harady.
Pavodle Kaciaryny Haspadaryk, stvaralniki bota ŭ svajoj pracy natchnialisia prajektam travle.earth — tam treba dabiracca z krainy da krainy pa ŭsim śviecie. Biełarusam ža chaciełasia zrabić prajekt mienavita pa biełaruskich miaścinach. Nazva prajektu «Padaroaž» taksama adsyłaje na hetaha sajta.
Nad prajektam pracavali ŭ čatyry ruki: Kaciaryna Haspadaryk i Ivan Rubanaŭ, raspracoŭščyk u Microsoft.
Pakolki koda travle.earth u adkrytych krynicach znajści nie ŭdałosia, biełarusy vyrašyli zrabić usio z nula.
U jakaści asnovy dla mapy raspracoŭščyki skarystalisia SVG fajłam z konturami sielsavietaŭ, rajonaŭ dy abłaściej, jakija Ivan Rubanaŭ znajšoŭ u adkrytych krynicach. Daviałosia jaho pačyścić dy ŭručnuju prapisać nazvy ŭsich rajcentraŭ.
Jak pracuje bot
Usio vielmi prosta.
-
Naciskajecie na «Pačać».
-
Bot hienieruje mapu z dvuma haradami Biełarusi.
Zadača juziera — «dajechać» ad punktu A ŭ punkt B aptymalnym maršrutam. Bot moža randomna padkinuć vam harady abo vy sami možacie vybrać miescy. Prosta pišacie ŭ telehramie nazvu horada, naprykład, Sianno.
Kali niama idej — biarycie padkazki. Kali i padkazki nie dapamahajuć, to možna zdacca.
Što budzie z prajektam dalej?
Raspracoŭščyki bota realizavali ŭsie idei, jakija ad pačatku zadumvali. Ciapier jany źbirajuć zaŭvahi i pažadańni ad karystalnikaŭ, na asnovie ich buduć dadavać/źmianiać niešta. Prynamsi, užo ciapier im stała zrazumieła, što treba, kab bot razumieŭ nie tolki «Marjina Horka», ale i «Puchavicki rajon».
«Vaniu padabajucca mapy, hrafy, kodzić i ŭkładacca ŭ biełaruščynu. Jon pryjšoŭ da mianie ź idejaj. Mnie zaŭsiedy cikava paŭdzielničać u niečym kłasnym. Daŭno chaciełasia zrabić padobny viasioły prajekt.
Bot dazvalaje padvučyć hieahrafiju Biełarusi — i nam samim, i ludziam navokał. Pakul rabiła i testavała — užo šmat čaho zapomniła. Naprykład, dzie znachodziacca Masty», — piša Kaciaryna Haspadaryk.
Čytajcie taksama:
Prahrama ź biełaruskimi karaniami Flo ŭvajšła ŭ śpis najlepšych vynachodak hoda pa viersii Time
Što za biełaruskaja hulnia, u jakuju inviestavaŭ Ranałdu
Try biełaruskamoŭnyja strymiery patrapili ŭ aficyjnuju prahramu padtrymki Cyberpunk 2077
«Prosta zalivaješsia ślaźmi i dumaješ: za što?» Iryna Ščasnaja i jaje čatyry balučyja hady za kratami7
Kamientary