Try biełaruskamoŭnyja strymiery patrapili ŭ aficyjnuju prahramu padtrymki Cyberpunk 2077

Havorka idzie pra troch čałaviek, što viaduć strymy pa-biełarusku: ms_bahiema, gomzik  i lepus81.

Cyberpunk 2077: Phantom Liberty — heta maštabnaje dapaŭnieńnie da kampjutarnaj hulni, ekšnu z rolevymi elemientami ŭ dekaracyjach zmročnaj budučyni.

— Padacca [na ŭdzieł] možna było praź śpiecyjalnuju formu ad CD Project Red, — raskazała nam strymierka ms_bahiema. — Ja źviarnuła ŭvahu na toje, što jany ŭ paście ab prahramie padtrymki strymieraŭ paznačyli, što prymajuć hulcoŭ na luboj movie, i vyrašyła pasprabavać (a jašče i zaachvocić astatnich kaleh zapisacca). Bo kali heta paznačana asobna — značyć i takich maleńkich strymieraŭ, jak my, mohuć pryniać, prosta kab padtrymać naša kamjunici.

Paśla padačy zajavak kampanija sama abirała tych, kaho dadać u prahramu.

— Što atrymlivajuć hledačy ad prahladu vašych strymaŭ?

— Hledačy zmohuć atrymać unutryhulniavoje adzieńnie za prahlad tranślacyj praź sistemu Twitch Drops. Kab atrymać pradmiety, treba budzie hladzieć strymy pa hulni peŭnuju kolkaść času (padrabiazna pra heta raspaviadajecca tut). A jašče tyja hledačy, jakija aformiać dźvie płatnyja padpiski na kanał padčas strymu, atrymajuć unikalnuju zbroju.

— A što novy status daść samim strymieram?

— Nu, status, pa idei, musić prasoŭvać abranych strymieraŭ, pryvablivać aŭdytoryju i matyvavać jaje padpisvacca na ichnija kanały. Heta ŭsio, što my atrymlivajem. Nu i chvalicca možna (płanuju rabić heta da kanca žyćcia zaraz).

— U kamientaryjach da vašaha pasta pytali pra błohiera Rudzi, jaki ciapier znachodzicca ŭ Biełarusi, čamu jon nie ŭ śpisie. Jon nie moža ŭdzielničać u prahramie praz svaju łakacyju?

— Ja nie viedaju, ci jon uvohule padavaŭsia, bo infa była ŭ adkrytym dostupie, ale sama jaho nie zaachvočvała (potym vyjaviłasia, što spadar Rudzi sapraŭdy nie padavaŭsia na ŭdzieł u prahramie — zaŭv. aŭt.), tamu što, pa-pieršaje, jon viarnuŭsia ŭ jutub strymić, pa-druhoje, hulniu nielha nabyć u Biełarusi. Čysta technična padacca jon moh, ale CDPR spynili prodaž hulniaŭ na terytoryi Biełarusi i Rasii — niełahična z takoj palitykaj budzie padtrymlivać strymieraŭ, jakija źjaŭlajucca padatkovymi rezidentami hetych krain.

Surazmoŭca dadaje, što jaje najbližejšaja tranślacyja ŭ jakaści strymiera z aficyjnaj prahramy padtrymki Cyberpunk 2077 adbudziecca siońnia (to-bok u aŭtorak 26-ha vieraśnia) u 19:00 pa Biełarusi, a jašče ŭviečary ŭ čaćvier i piatnicu. 

Strymier gomzik taksama siońnia vyjdzie anłajn — a 19-20 hadzinie pa biełaruskim časie. I spadar lepus8 zapłanavaŭ niekalki vychadaŭ u efir: siońnia ŭ 15:00 i potym z prykładna z 23:00 pa biełaruskim časie; u sieradu — viečaram, hadzin z 19-20 pa Minsku / Vilni; u čaćvier — u 15:00 i kala poŭnačy i zatym u piatnicu nočču. 

• 14
• 0
• 0
• 1
• 0
• 1