«Zładziŭ čelendž — štodzień prydumlać pa žarcie». Kim byŭ biełaruski komik, jaki pamior u 28, i što ź im zdaryłasia

Zubovič naradziŭsia 25 krasavika 1995 hoda ŭ Asipovičach. Navučaŭsia ŭ Homielskim dziaržaŭnym univiersitecie, a taksama, jak raskazvaje jaho siabar Pavieł Radzievič, prabaviŭ kurs ci dva ŭ marskoj ustanovie. 

Na pačatku svajoj karjery Dźmitryj vystupaŭ z homielskimi stendapierami — tady havorka išła tolki pra asobnyja imprezy ŭ Minsku, zbolšaha chłopca možna było pačuć u Homieli. Paźniej Zubovič staŭ adnym z zasnavalnikaŭ stendapierskaha prajekta Comedy Dogs, a taksama rezidentam StandUp Comedy Hall — pieršaha stendap-kłuba ŭ Biełarusi.

Pavieł maje vielmi ciopłyja ŭspaminy pra siabra: «Heta byŭ nievierahodna ščyry i adkryty čałaviek.

Jon byŭ tym samym siabram, u jakoha samyja nievierahodnyja historyi. To jon aŭtastopam vandruje na niekalki tysiač kiłamietraŭ, to sychodzić u namiotavy pachod na niekalki tydniaŭ z chipi i biare tam abiacańnie maŭčańnia na ŭvieś hety čas. 

Jon zusim pa-inšamu adčuvaŭ hety śviet, navat u jahonym instahramie možacie heta ŭbačyć. Sioleta jon jechaŭ ź Niderłandaŭ u Polšču praz Italiju ź niejkim nieznajomym dalnabojščykam. Tady jon jašče tranślavaŭ heta ŭ storys i za hetym sačyć było cikaviej, čym za jakim-niebudź sieryjałam».

Za miežami stendapu Dźmitryj pierasprabavaŭ šmat padpracovak, u tym liku byŭ barystam i adčyniaŭ svoj punkt z kavaj u minskim handlovym centry, a taksama pradavaŭ elitny ałkahol.

Radzievič zhadvaje, što siabar dapamoh jamu dobra raźbiracca ŭ takich napojach: «Jon navučyŭ mianie pić mienavita smačna! Pamiataju, jak my ź im pajšli ŭ bar i jon mnie pakazvaŭ napoi, na jakija ja raniej navat nie źviartaŭ uvahi. Tłumačyŭ, jak pravilna pić i da jakich adcieńniaŭ smaku prysłuchoŭvacca. Raspaviadaŭ, ź jakich śpirtoŭ napoj robicca i ŭ jakich bočkach vytrymlivajecca. Praź jaho mnie i samomu stała heta cikava».

«Heta byŭ adzin z najlepšych biełaruskich komikaŭ. Kažu heta nie tamu, što jon — moj siabar, siarod komikaŭ heta pryznany fakt. Jak i mnohija biełaruskija komiki, Dzima byŭ maksimalna niedaacenieny», — tak pra Zuboviča raskazvaje jaho inšy siabar, komik i žurnalist Michaś Iljin.

Michaś tłumačyć, što Dźmitryj pracavaŭ u vielmi śpiecyfičnym žanry vanłajnaŭ — heta karotkija žarty pamieram u adzin radok, i zaŭvažnych biełaruskich komikaŭ u hetym žanry nie było. Heta składany žanr, bo kali žart nastolki karotki, jon zajmaje mała času i treba rychtavać šmat takich žartaŭ na adzin vystup. Ale, adznačaje Michaś, Dźmitryj davaŭ rady vajnłajnam.

Niejak Zubovič zładziŭ dla siabie čelendž — ciaham hoda štodzień prydumlać pa žarcie, vytrymaŭ jaho i ŭ vyniku mieŭ zapas pamieram u 365 žartaŭ.

Dźmitryj pryznavaŭsia siabru, što taki žanr pracy — vyklik dla jaho, jaki jon abraŭ śviadoma.

«U jaho byŭ svoj styl, jon palahaŭ u tym, što Dzima pisaŭ karocieńkija i vielmi čornyja žarty. Nastolki čornyja, što ludziam było navat niajomka z taho, što jany z hetaha śmiajucca.

A śmiajalisia amal zaŭsiody, Dzima byŭ ahieńčykam u lubym zbornym kancercie», — dzielicca Radzievič.

Iljin adznačaje, što niahledziačy na supiarečlivy styl Zuboviča, jon pakinuŭ pra siabie dobryja ŭspaminy: «Jon uvajšoŭ u historyju biełaruskaha stendapu jak samy čorny biełaruski komik, bo jaho žarty zaŭsiody byli na miažy, časam z pachabnaściami. Pry hetym bolšaść ludziej, jakija byli na jaho vystupach, prymała hetyja žarty, ale niekatoryja byli ad pačutaha ŭ šoku. Ale paśla jaho vystupaŭ ni adzin hladač nie zastavaŭsia abyjakavym, jon zaŭsiody vystupaŭ vielmi zapaminalna.

Niahledziačy na sceničny vobraz čałavieka, jaki žartuje brydotna ci čorna, u žyćci heta byŭ maksimalna dobry i ščyry čałaviek, dobry siabar i znajomy. Jon zaŭsiody prychodziŭ na dapamohu. Heta nie toj vypadak, kali pra niabožčyka ci dobra, ci nijak. Nie dumaju, što jość niechta siarod komikaŭ ci hledačoŭ, chto moh by štości drennaje zhadać pra Dzimu, jon sapraŭdy byŭ vielmi dobrym čałaviekam».

Michaś paraŭnoŭvaje siabra z brytancam Džymi Karam — stendapieram, viadomym svaimi supiarečlivymi i čornymi vanłajnami, navat adno ź videa z vystupam Zuboviča mieła nazvu «Džymi Kar z Asipovičaŭ». Ale, upeŭnieny Michaś, Zubovič byŭ značna lepšym za Džymi Kara, bo mieŭ bolš ščyryja i cikavyja žarty.

Dźmitryj źjechaŭ ź Biełarusi ŭ pačatku 2023-ha pa lepšaje žyćcio, pracavaŭ na polskuju budaŭničuju firmu. Vyjazdžaŭ u Niderłandy, pracavaŭ tam u łandšaftnym dyzajnie i vystupaŭ u stendapie. 

Pieradapošni post Zuboviča ŭ sacsietkach datavany 7 maja. U im chłopiec raspaviadaŭ, što znachodzicca ŭ Varšavie i maje novuju pracu, a ŭ jaho žyćci źjaviłasia niekatoraja peŭnaść. Paźniej jon žyvie biez pracy na nazapašanyja srodki i čakaje adkryćcia ŭstanovy ad znajomaha biełarusa, dzie płanavaŭ pracavać. Taksama Zubovič šukaŭ pracu barmienam abo barystam.

Dźmitryj nie publikuje ŭ sacsietkach ničoha da 4 śniežnia, kali tam źjaŭlajecca apošni post chłopca, napisany jaho siastroj pad dyktoŭku. Voś niekalki radkoŭ adtul:

«Nie budziem doŭha raźvitvacca, skažu tolki, što ja syšoŭ u lubimym mnoj horadzie, ja paśpieŭ papadarožničać, zajmieć vialikaje koła siabroŭ i znajomych, i zapomnicca ŭsim pa-roznamu. Mamu ja nazvaŭ mamieńka i heta pryžyłosia ŭ našaj siamji, a mianie doma nazyvajuć Micia.

Niechta zapomniŭ mianie pa frazie «Moj dom tam, dzie moj zaplečničak». Ja pakinuŭ vam svaje žarty, u tyktoku i jutubie, astatnija maje frazy zastanucca ŭ vašaj pamiaci. Usich abniaŭ, pryŭźniaŭ, a pakryŭdžanych paprašu bolš nie kryŭdzicca».

Pavodle źviestak «Jeŭraradyjo», pryčynaj śmierci chłopca stała sarkoma — złajakasnaja puchlina, jakaja raźvivajecca ŭ złučalnych tkankach peŭnaha typu (kaściavoj, chrastkovaj, muskulnaj, tłuščavaj, a taksama ścienkach kryvianosnych i limfatyčnych sasudaŭ). Dźmitryja pachavajuć u Biełarusi.

Stendapier Mirzalizade: Heta dziŭny ruch — pošuk supieražyvańnia da rasijanaŭ

Mikita Najdzionaŭ vyjechaŭ ź Biełarusi. I poŭny raniejšaha ahniavoha humaru

Iljin — pra Kamisaranku, Usoviča, Pratasieviča, razmovu z KDB i čamu nie lubić Kaca

• 8
• 0
• 2
• 2
• 3
• 102
• 13
• 0