Viadomaja homielskaja aktyvistka Śviatłana Karol nie vyjšła ź IČU
63-hadovaja viełaaktyvistka z Homiela Śviatłana Karol nie vyjšła ź izalatara časovaha ŭtrymańnia paśla 3-sutkavaha aryštu. Žančynu, imavierna, dastavili ŭ Homielskaje SIZA №3, dzie jana znachodzicca pa kryminalnaj spravie ab «paklopie» na Łukašenku, piša vydańnie «Štodzień».
Pra zatrymańnie žančyny stała viadoma 20 vieraśnia.
Śviatłana Karol — viadomaja hamialčanka, nastaŭnica i zasnavalnica ruchu «ViełaHomiel», papularyzatarka rovaraŭ. U 2020 hodzie, jak i mnohija hramadzianie, Śviatłana asudziła hvałt u dačynieńni da mirnych pratestoŭcaŭ.
U adnym z raniejšych intervju Śviatłana Karol zaŭvažała, što pieratryvać brutalnuju rečaisnaść apošnich hadoŭ joj dapamahaje viera ŭ biełaruskuju salidarnaść i hramadskaja dziejnaść.
«Represii, kaniešnie, mocna zadavili i mianie, i inšych ludziej. Ale ja vyrašyła, što kali mahu dapamahać — dapamahaju, što jość dobraha — palapšaju.
Starajusia siabie źbierahčy takim čynam da toj Biełarusi, jakaja maje nastać. Pišu listy palitviaźniam, pieraličvaju hrošy ŭ prytułak dla badziažnych žyvioł, praciahvaju papularyzavać rovarny ruch. Takim čynam atrymlivajecca zachavać svaju cełasnaść.
Ciažki vielmi čas, ale što rabić — bieź vialikich kryzisaŭ skačkoŭ nie adbyvajecca. Kali kožny budzie siabie tak źbierahać, to my apyniomsia ŭ lepšaj Biełarusi», — kazała jana.
Ciapier Śviatłana Karol maje sama patrebu ŭ dapamozie i padtrymcy.
Artykuł 367 KK RB, u jakim abvinavačvajuć hamialčanku, praduhledžvaje pakarańnie ŭ vyhladzie štrafu, papraŭčych rabot na termin da dvuch hod, albo abmiežavańnie voli na termin da 4 hod, albo pazbaŭleńnie voli da 5 hod.
Kali raniej hety artykuł prymianiaŭsia dosyć redka i vybaračna, to paśla 2020 hoda ŭłady masava pryciahvajuć apazicyjna nastrojenych hramadzian, jakija rezka vykazvajucca na adras Łukašenki ci krytykujuć jaho palityku.
Kamientary