«Pražyć na 1500 dalaraŭ u miesiac vielmi składana». Biełaruska z Łondana raskazała, jak žyvie tam ź nievialikim zarobkam
34-hadovaja Hanna pierajechała ŭ Łondan u vieraśni 2021 hoda, tamu što atrymała brytanskuju stypiendyju na navučańnie ŭ mahistratury (pa tvorčym piśmie). Ciapier dziaŭčyna piša knihi, pracuje ź pierakładami i zajmajecca aktyvizmam na karyść Biełarusi. Jana raskazała CityDog.io, jak tam žyvie i na što tracić svoj nievialiki zarobak.
— Ja mahła pajechać u adzin z troch haradoŭ Vialikabrytanii, ale vybrała akurat Łondan, tamu što tolki tam u mianie ŭžo byli siabry i niejkija suviazi, — raskazvaje dziaŭčyna. — Reč u tym, što kaliści ja hod žyła i vałancioryła ŭ davoli addalenym miescy ŭ Irłandyi. U mianie tam nie było siabroŭ, i ja adčuvała siabie vielmi samotna. Praz heta ŭ mianie pačałasia depresija, ź jakoj ja potym zmahałasia na praciahu troch hadoŭ. Navučanaja hetym dośviedam, ja vyrašyła, što lepš pajedu tudy, dzie ŭ mianie dakładna jość znajomyja.
Dachod: stypiendyja — 1390 funtaŭ, zarobak na paŭstaŭki — 1170
— Pieršy hod u Łondanie ja žyła vyklučna na svaju stypiendyju — 1390 funtaŭ (1762 dalary) na miesiac. Z hetych hrošaj u mianie atrymlivałasia navat adkładać kala 200 funtaŭ (253 dalary), kab źbirać peŭnuju padušku biaśpieki.
Paśla taho jak stypiendyja skončyłasia, ja pracavała pierakładčycaj subcitraŭ (ź biełaruskaj i ruskaj moŭ na anhlijskuju) na paŭstaŭki maksimum pa 20 hadzin na tydzień, bo pa studenckaj vizie pracavać bolej niemahčyma.
Apłata była 15 funtaŭ (19 dalaraŭ) za hadzinu, to-bok na miesiac vychodziła ŭ siarednim 1200 funtaŭ (1520 dalaraŭ). Paśla vypłaty padatkaŭ na ruki ja atrymlivała pryblizna 1170 funtaŭ (1483 dalary).
Z hetaha zarobku adkładać užo nie atrymlivałasia, tamu što i hrošy mienšyja, i ceny za hety čas padraśli (u tym liku na ježu).
Žyllo i kamunałka: 650 funtaŭ za pakojčyk i 10 funtaŭ za mabilny internet
— U Łondanie ja aranduju nievialiki pakojčyk, za jaki płaču 650 funtaŭ (824 dalary) u miesiac. Mnie pašancavała znajści jaho praz znajomych jašče letam 2021 hoda, kali łakdaŭn tolki skončyŭsia i nie ŭsie paśpieli viarnucca ŭ horad. Tady z pošukam kvater było praściej.
Hety pakojčyk znachodzicca ŭ domie ŭ viktaryjanskim styli, jaki časta možna pabačyć na karcinkach ci ŭ kino. Tut ža žyvie haspadynia — anhlijskaja babula, vielmi adukavanaja i adekvatnaja žančyna — i jašče adna dziaŭčyna-arandatarka.
Taksama mnie pašancavała, što ŭsie kamunalnyja pasłuhi (u tym liku internet) uklučanyja ŭ košt arendy. Bo kali ceny pačali mocna padymacca praz kryzis i vajnu va Ukrainie, niekatoryja ludzi nie mahli sabie dazvolić uklučać aciapleńnie zimoj, bo dla ich heta było zanadta doraha. U mianie ž z hetym prablem nie było.
Dadatkova ja apłačvaju tolki mabilny internet — 10 funtaŭ (13 dalaraŭ) na miesiac.
Prajezd: mietro — ad 2,80 da 3,20 funta za pajezdku, aŭtobus — 1,75
— Transpart u Łondanie vielmi darahi. Ja žyvu ŭ druhoj zonie (a ŭsiaho ich 9, 6 ź jakich u samim horadzie), adkul na mietro da centra možna dajechać za 20-30 chvilin. Košt prajezda ŭ mietro zaležyć ad času: u hadziny pik heta 3,20 funta (4,06 dalara), u mienš zahružanyja pieryjady — 2,80 (3,55 dalara). I heta tolki ŭ pieršaj-druhoj zonach, u bolš addalenych jašče daražej.
Bilet na aŭtobus kaštuje 1,75 funta (2,22 dalara). I, kab ekanomić, mietro ja karystajusia redka, tolki ŭ tych vypadkach, kali na aŭtobusach navat ź pierasadkami nie dajedzieš. Tym bolš na aŭtobusach jość taki łajfchak: bilet dziejničaje ciaham hadziny, tamu za hety čas možna źmianić niekalki maršrutaŭ.
Takim čynam, ja traču bolš času na prajezd (1-1,5 hadziny zamiest 30-40 chvilin), ale ekanomlu amal u 2-3 razy.
Studencki prajazny na tydzień kaštuje 27 funtaŭ (34 dalary). Ale jość sens jaho kuplać, tolki kali jeździš kožny dzień. Mnie nie treba štodnia byvać u horadzie, tamu i prajazny ja nie nabyvaju. A jašče, kab zekanomić na transparcie, ja starajusia płanavać usie svaje spravy na adzin dzień. Naprykład, kali mnie treba ŭ biblijateku, u niejkuju kramu ci na sustreču ź siabrami, ja starajusia padahnać usie płany razam, a nie raściahvać ich na niekalki dzion.
Čas ad času mnie jašče treba jeździć va ŭniviersitet u inšy horad — daroha abychodzicca kala 15 funtaŭ tudy-nazad. Ale heta redka, mo raz na miesiac.
Uvohule ŭ zaležnaści ad kolkaści pajezdak na hramadski transpart mnie patrabujecca ad 50 da 100 funtaŭ (ad 63 da 127 dalaraŭ) u miesiac.
Pradukty: na zakupy vydatkoŭvaju da 200 funtaŭ na miesiac
— Apošnim časam pradukty tut taksama mocna padaraželi. Ja nie jem miasa, tolki rybu vielmi redka. U asnoŭnym kuplaju harodninu, sadavinu, raślinnaje miasa, čas ad času syr i chlebnyja pradukty, časta sałodkaje, harbatki, makarony, krupy. Na ŭsio heta patrebna da 200 funtaŭ (253 dalary) na miesiac.
Nie doma ja amal nie jem. U mianie na rajonie, naprykład, u jakoj-niebudź prostaj kaviarni zakazać sup kaštuje 7 funtaŭ (8,9 dalara). Kava i desiert — pa 3-3,5 funta (4,4 dalara). To-bok kali prosta vyjści na kavu z kavałkam piraha — heta ŭžo 6-7 funtaŭ (7,6-8,9 dalara). A kali schadzić u jaki-niebudź prystojny restaran — heta, ličy, ad 13 funtaŭ (ad 16 dalaraŭ).
Inšyja traty: sustrečy ź siabrami — da 100 funtaŭ na miesiac, miedyčnaja strachoŭka — kala 2000 na try hady
— Nie mahu admović sabie ŭ mastactvie, tamu pieryjadyčna chadžu ŭ kino, na kancert albo na śpiektakl. Na heta mahu vydatkoŭvać ad 20 da 70 funtaŭ (ad 25 da 89 dalaraŭ) na miesiac.
Uvohule pražyć na 1200 funtaŭ (1520 dalaraŭ) na miesiac vielmi składana, kali ŭ ciabie jość niejkija intaresy i koła siabroŭ. U Łondanie zaŭsiody adbyvajecca šmat cikavaha: pakazvajuć kłasnyja śpiektakli, pryjazdžajuć krutyja hurty, adbyvajucca cikavyja vystavy, prachodziać fiestyvali. A taksama šmat knih, jakija chočacca nabyvać, i na ich ja traču ad 10 da 20 funtaŭ (ad 13 da 25 dalaraŭ) štomiesiac.
Kali sustrakajemsia ź siabrami, treba chacia b sidr uziać — heta 7 funtaŭ (8,8 dalara). A kali niekalki sustreč u tydzień, to heta ad 20 da 30 funtaŭ (ad 25 da 38 dalaraŭ). Za miesiac možna i da 100 funtaŭ (da 127 dalaraŭ) na sustrečy patracić, bo sustrakacca doma tut nie pryniata.
Kali kazać pra adzieńnie, to samaje asnoŭnaje ja pryviezła z saboj ź Biełarusi. I dahetul hetyja rečy składajuć kala 60% majho harderoba. U Łondanie ja spačatku nabyvała adzieńnie ŭ dabračynnych kramach: ich tut šmat, i možna znajści vielmi fajnyja rečy (tańniejšyja, čym u zvyčajnych kramach, zrazumieła). Ale ź ciaham času vyśvietliłasia, što ŭ hetych kramach nie zaŭsiody jość toje, što mnie patrebna. Tamu ja pierastała rabić šmat drobnych pakupak i vyrašyła, što lepš nabyć adnu jakasnuju reč, jakaja prasłužyć doŭha. Tak, naprykład, u mianie źjavilisia džynsy za 30 funtaŭ (38 dalaraŭ), jakija ja našu z zadavalnieńniem.
Čas ad času kuplaju vintaž — mnie padabajecca. Ale ŭ Łondanie jon vielmi darahi. U mianie jość niekalki rečaŭ za 15-30 funtaŭ (19-38 dalaraŭ).
Asobnym artykułam vydatkaŭ była viza, jakuju mnie treba było abnaŭlać. Za jaje ja płaciła kala 450 funtaŭ (prykładna 570 dalaraŭ). I jašče kala 2000 funtaŭ (2535 dalaraŭ) za miedycynskuju strachoŭku. Sabrać sumu mnie častkova dapamahli niekalki fondaŭ, astatniaje ŭziała z ułasnych adkładzienych hrošaj.
Ciapier ja źbirajusia padavacca na inšy typ vizy, bo pa studenckaj ja i pracavać na poŭnuju staŭku nie mahu, i nie mahu być samazaniataj. A heta značyć, što jak piśmieńnica ja nie mahu zaklučać damovy na knihi i atrymlivać za ich hrošy, nie mahu lehalna być na fryłansie.
Za źmianieńnie vizy mnie treba budzie zapłacić kala 700 funtaŭ (887 dalaraŭ) plus niekalki tysiač za miedyčnuju strachoŭku.
A jašče čas ad času ja padpracoŭvaju ź niebrytanskimi pracadaŭcami — rablu litaraturnyja pierakłady. Heta nievialikija hrošy, ale ź ich ja zvyčajna rablu achviaravańni ŭ fondy ci na niejkija zbory. Bo dla mianie vielmi važna praciahvać padtrymlivać našych palitviaźniaŭ abo inšych represavanych ludziej ź Biełarusi.
Kamientary
U polščy pry takoj zp - padatki pad 300 bakcau.