Łukašenka nazvaŭ kiraŭnikoŭ zachodnich krain varjatami i zajaviŭ, što jamu nadakučyła ciarpieć ich vychadki
Biełaruś i Rasija pakul ciarpiać vychadki varjataŭ z kiraŭnictva krain Zachadu, ale heta nie moža praciahvacca biaskonca. Takuju zajavu jon zrabiŭ siońnia padčas sustrečy z hubiernataram Kalininhradskaj vobłaści Antonam Alichanavym.
Łukašenka zajaviŭ, što raspačataja Zachadam u 2022 hodzie biesprecedentnaja sproba abmiežavać znosiny z Kalininhradskaj vobłaściu i svabodny ruch hruzaŭ čyhunačnym i aŭtamabilnym transpartam jak z Rasii, tak i ź Biełarusi, była asudžanaja na pravał. «Ciapier my ŭ hetym absalutna pierakananyja, — cytuje jahonyja słovy BiełTA. — Jak by nas ni sprabavali padzialić štučnymi barjerami, nie atrymajecca».
Bolš za toje, heta niebiaśpiečna dla taho boku, jaki vystupaje z padobnymi inicyjatyvami, pierakanany Alaksandr Łukašenka, tamu što takim čynam raźviazvajecca ekanamičnaja (i nie tolki ekanamičnaja) vajna, jakuju Biełarusi i Rasii «varjaty (biezumcy ŭ aryhinale. — «NN») na Zachadzie» sprabujuć abviaścić užo nie pieršy raz.
«Potym chaj nie kryŭdziacca. My ž nikomu nie pahražajem. My prosta prytrymlivajemsia našych intaresaŭ — Biełarusi i Rasii. Pakul ź ciažkaściu, ale atrymlivajecca niejak ciarpieć usie hetyja vychadki. Ale biaskonca heta praciahvacca nie moža, tamu kiraŭnictva (padkreślivaju — kiraŭnictva) Bałtyjskich dziaržaŭ, dy, napeŭna, i Polščy pavinna heta vydatna razumieć», — skazaŭ jon.
Zakachanyja ŭ Minsku chacieli sabrać z padpisčykaŭ $10 tysiač na viasielle mary. Kolki ž u vyniku im zadanacili?10
Kamientary