Niamiecki miljarder, jaki piać hadoŭ tamu źnik u Alpach, znajšoŭsia ŭ Maskvie

Sprava ab źniknieńni miljardera

Niamiecki miljarder Karł-Eryvan Chaŭb (Karl-Erivan Haub) byŭ daśviedčanym harnałyžnikam. 7 krasavika 2018 hoda jon adpraviŭsia na padrychtoŭku da łyžnaha tura ŭ Cermacie (Zermatt) u Šviejcaryi (na miažy ź Italijaj). Jak paviedamlajecca, jon mieŭ namier pryniać udzieł u Patrouille des Glaciers — najbujniejšaj u śviecie łyžnaj turystyčnaj honcy, u jakoj braŭ udzieł na praciahu niekalkich hadoŭ. Adnak z hor Chaŭb nie viarnuŭsia.

Spačatku mierkavali, što jon moh upaści ŭ ladnik. Pošuki miljardera kančatkova spynili praz dobryja paŭhoda paśla jaho źniknieńnia.

U kastryčniku 2020 hoda jaho dva braty, a taksama kampanija pa handli tavarami Tengelmann Group padali ŭ Akruhovy sud Kiolna chadajnictva ab abjaŭleńni Karła-Eryvana Chaŭba pamierłym. U skorym časie stała viadoma pra raskoł pamiž bratami i žonkaj Chaŭba Katryn, jakaja vystupała suprać abjaŭleńnia jaho pamierłym, kab nie pakidać siamiejny biznes.

18 studzienia 2021 hoda stała viadoma, što adzin z bratoŭ — Hieorh Chaŭb — adklikaŭ svaju zajavu ab abjaŭleńni brata pamierłym, u toj čas jak zajavy Kryścijana Chaŭba i Tengelmann Group zastalisia ŭ sile.

Urešcie Karła-Eryvana Chaŭba abjavili pamierłym u sakaviku 2021 hoda.

Žonka i dzieci Chaŭba pradali svaje akcyi za miljardnuju sumu małodšamu bratu Kryścijanu Chaŭbu, jaki z tych časoŭ vałodaje amal 70 pracentami akcyj handlovaj hrupy, jakaja ŭklučaje sietku mahazinaŭ OBI, dyskaŭntar adzieńnia KiK i šmatlikija inviestycyi ŭ nieruchomaść i karparacyi. Kryścijan Chaŭb — adziny kiraŭničy dyrektar.

Tajemnaje žyćcio

Adnak ad pačatku va ŭsioj hetaj historyi było niamała dziŭnaha.

Užo ŭ listapadzie 2020 hoda zjaviłasia infarmacyja ab tym, što Chaŭb vioŭ «tajemnaje padvojnaje žyćcio» i, mahčyma, źnik z paluboŭnicaj. 7 krasavika ŭ hory jon adpraviŭsia biez supravadžeńnia instruktara. Vykazvałasia mierkavańnie, što jon spuściŭsia z hor u Italiju.

Zhodna z rasšyfroŭkaj telefonnych zvankoŭ, viečaram pierad svaim źniknieńniem Chaŭb u 20:52 byŭ na suviazi z rasijskim numaram na praciahu 60 chvilin, a ŭ 21:54 adbyŭsia jašče adzin zvanok. Na hety raz na 48 chvilin. Udałosia vyśvietlić, što abodva numary naležać Vieranicy Je. z Rasii — supracoŭnicy ivient-ahienctva ŭ Sankt-Pieciarburhu.

Pa źviestkach niamieckaj raźviedki, jana dziejny ahient FSB i maje licenziju piłota viertalota.

Majucca źviestki ab tym, što Chaŭb i Vieranika Je. byli ŭ pastajannym kantakcie i časta znachodzilisia ŭ adnym i tym ža miescy ŭ adzin i toj ža čas.

U lipieni 2008 hoda, naprykład, jany byli i ŭ Maskvie, i ŭ Sočy na praciahu niekalkich dzion. U mai 2009 hoda jany jechali adnym i tym ža načnym ciahnikom z Maskvy ŭ Sankt-Pieciarburh, ale ŭ roznych kupe. Heta nie padobna da supadzieńnia: abiedźvie pajezdki zabraniravali ŭ adzin i toj ža čas dy adnoj i toj ža asobaj, jak paviedamlaje Stern.de.

Paśla źniknieńnia Chaŭba žančyna zvolniłasia i pierajechała ŭ Maskvu. Padčas žurnalisckaha rasśledavańnia ŭdałosia atrymać źviestki ab tym, što ŭ Chaŭba było hramadzianstva ZŠA, a taksama pašpart Rasijskaj Fiederacyi.

U pieryjad z 2010-ha pa 2015-y ŭ kampanii byŭ vyjaŭleny niezakonny pieravod srodkaŭ na dziasiatki miljonaŭ dalaraŭ, bolšaja častka jakich, jak śćviardžajecca, źnikła ŭ Rasii. Chaŭb zabaraniŭ pravierki paśla padazronych spravazdač adździeła aŭdytu.

Novyja dokazy

U mai 2023 hoda žurnalistka Liŭ fon Biotychier (Liv von Boetticher) apublikavała knihu «Dakumienty hrupy «Tenhielman» i zahadkavaje źniknieńnie miljardera Karła-Eryvana Chaŭba». U joj majucca źviestki ab sumnieŭnych ździełkach Chaŭba ŭ Rasii.

Jana śćviardžaje, što maje dokazy ab datyčnaści da źniknieńnia miljardera rasijskaj FSB i byłoha aficera Štazi.

Liŭ fon Biotychier zajaviła, što bačyła fatahrafiju, zroblenuju kamieraj nazirańnia ŭ Maskvie ŭ lutym 2021 hoda, na jakoj «ź vialikaj dolaj imaviernaści» vyjaŭleny Karł-Eryvan Chaŭb. Jakaść fatahrafii dobraja, a bijamietryčnaje prahramnaje zabieśpiačeńnie pakazała supadzieńnie bolš čym na 90 pracentaŭ z etałonnymi vyjavami. Fatahrafija nie była apublikavanaja ni ŭ adnym ź miedyja dziela abarony krynicy.

Fon Biotychier śćviardžaje, što Karł-Eryvan Chaŭb płanavaŭ adkryć u Rasii filijały dyskaŭntara Plus.

«Adnak dziełavyja partniory Chaŭba byli ludźmi, jakich z čystym sumleńniem možna nazvać admyvalnikami hrošaj. Heta akcyjaniery banka, jaki nazyvali «samym kryminalnym bankam» u krainie», — skazała jana.

U toj ža čas fon Biotychier ličyć, što Chaŭb mieŭ pryčyny chavacca ŭ Rasii:

«Rasśledavalniki, naniatyja Tengelmann Group, padazrajuć, što jon moh stać mišeńniu ŭładaŭ ZŠA praź jaho sumnieŭnyja kantakty ŭ Rasii. Nie vyklučana, što hetyja kantakty pryviali b da składanaściaŭ z sudovaj sistemaj ZŠA».

Jak piša vydańnie Westdeutsche Allgemeine Zeitung, prakuratura Kiolna paćvierdziła, što atrymała novyja dakumienty, ale pakinuła adkrytym pytańnie ab tym, ci jość siarod ich fatahrafii.

«My vyvučajem, ci daduć nam hetyja [dakumienty] padstavu padać zajavu ab anulavańni abjaŭleńnia ab śmierci ŭ akruhovy sud Kiolna ŭ adpaviednaści z pałažeńniami Zakona ab źnikłych bieź viestak», — skazaŭ hałoŭny prakuror Ulrych Bremien.

Čytajcie jašče:

Źnikłaha aŭstralijca znajšli ŭnutry krakadziła

U aeraporcie Taronta skrali kantejnier z zołatam na 20 miljonaŭ kanadskich dalaraŭ

Kadyraŭ zrabiŭ šou z sustrečy kania i dadaŭ jašče bolš fantastyčnaści ŭ viersiju pra jaho viartańnie

• 10
• 24
• 16
• 15
• 7
• 9