«Chadzi siudy i pahladzi». Japonka, jakaja vyžyła pry Chirasimie, pieraścierahła Pucina ad užyvańnia jadziernaj zbroi
Kiejka Ahura źjaŭlajecca adnoj ź niamnohich, chto vyžyŭ pry atamnaj bambardziroŭcy Chirasimy. U intervju ABC News jana prakamientavała rehularnyja pahrozy Pucina prymianić jadziernuju zbroju va Ukrainie.
Telekanał ABC News 20 maja ŭziaŭ intervju ŭ Kiejka Ahury — 85-hadovaj žycharki Japonii, jakaja zdoleła vyžyć pry jadziernaj bambardziroŭcy Chirasimy padčas Druhoj suśvietnaj. Žančyna padzialiłasia svaimi ŭspaminami, a taksama prakamientavała mahčymaje prymianieńnie jadziernaj zbroi z boku Rasii ŭ vajnie suprać Ukrainy.
Kiejka Ahury było ŭsiaho 8 hadoŭ, kali na Chirasimu ŭpała amierykanskaja jadziernaja bomba, jakaja zabiła kala 140 tysiač čałaviek. Pa jaje słovach, jana vydatna pamiataje toj strašny dzień i ŭsio toje, što adbyvałasia navokał.
«Spačatku była jarkaja ŭspyška, a potym ja rezka ŭpała. Razdaŭsia mocny vybuch, jaki supravadžaŭsia ŭdarnaj chvalaj, padobnaj na tajfun albo tarnada. Ad vybuchu mianie vyšturchnuła na vulicu, dzie ja adrazu straciła prytomnaść. Kali ja raspluščyła vočy, usio było ciomna. Zatym ja pastupova ŭbačyła, što ŭsio było achoplena połymiem», — raspaviadaje Ahura.
Pa ŭspaminach žančyny, nieŭzabavie paśla hetaha pačaŭsia «čorny, zabrudžany radyjacyjaj» doždž, a ŭ jaje rajon stali adusiul ściakacca ludzi, ź jakich žyŭcom abłaziła skura. Jany byli padobnyja da pryvidaŭ ci zombi, i jany pačali masava pamirać na vačach Ahury.
«Kali ja ŭspaminaju tyja dni, mnie adrazu chočacca płakać», — dzielicca žančyna z ABC News.
Akramia ŭspaminaŭ, jana taksama vykazała svajo mierkavańnie nakont padziej va Ukrainie, jakoj rehularna pahražajuć užyvańniem rasijskaj zbroi masavaha paražeńnia.
Kiejka Ahura ŭpeŭnienaja, što Uładzimir Pucin, vykarystoŭvajučy padobnyja pahrozy, nie maje nijakaha realnaha paniaćcia ab sutnaści jadziernaj zbroi.
«Ty nie viedaješ, što takoje jadziernaja zbroja i jakija nastupstvy jaje prymianieńnia. Tak što chadzi siudy i pierakanajsia sam», — kaža Ahura ŭ svaim zvarocie da Pucina.
Na dumku japonki, usiamu śvietu treba zadumacca ab budučych pakaleńniach i całkam admovicca ad zła ŭ vyhladzie jadziernaj zbroi.
Nahadajem, što ciapier u Japonii prachodzić čarhovy samit G7, adnoj z tem jakoha taksama stali płany Rasii pa raźmiaščeńni svajoj jadziernaj zbroi na terytoryi Biełarusi. Pavodle zajavy Pucina, budaŭnictva schoviščaŭ u Biełarusi dla raźmiaščeńnia rasijskaj jadziernaj zbroi pavinna skončycca ŭžo da 1 lipienia.
Kamientary
ludzi ŭsiudy adnolkavyja