Parad Pieramohi pakazaŭ źniasileńnie rasijskaj armii na druhi hod vajny va Ukrainie
U Paradzie Pieramohi 9 maja pryniali ŭdzieł tolki kala 8 tysiač vajskoŭcaŭ. Heta minimalnaja kolkaść udzielnikaŭ z 2008 hoda. U paradzie nie ŭdzielničali adrazu niekalki voinskich złučeńniaŭ, jakija byli pradstaŭlenyja letaś, piša «Ahientstvo. Novosti». Parad upieršyniu za 16 hadoŭ prajšoŭ biez udziełu ciažkaj bronietechniki. Adzinym tankam, jaki vyjšaŭ ranicaj na hałoŭnuju płošču Rasii, byŭ vieteran T-34-85.
Pieršapačatkova ŭ Minabarony zajaŭlali, što ŭ paradzie voźmuć udzieł kala 10 tysiač vajskoŭcaŭ, adnak u realnaści ich akazałasia mienš. Padčas tranślacyi dyktar zajaviŭ tolki pra 8 tysiač vajskoŭcaŭ, jakija ŭdzielničajuć.
U apošni raz 8 tysiač vajskoŭcaŭ na Čyrvonuju płošču padčas paradu vychodzili ŭ 2008 hodzie. U 2022 hodzie ŭ paradzie ŭdzielničali 11 tysiač vajskoŭcaŭ. U karanavirusnym 2020-m hodzie, kali parad byŭ pieraniesieny praz pandemiju na 24 červienia, na im było 14 tysiač vajskoŭcaŭ.
Na bruk Krasnaj płoščy ŭ hety raz nie vyjšli paradnyja raźliki adrazu niekalkich voinskich złučeńniaŭ, jakija byli pradstaŭlenyja letaś. Nie było vajskoŭcaŭ 4-j hvardziejskaj tankavaj Kantemiraŭskaj dyvizii, Tamanskaj dyvizii, 27-j asobnaj hvardziejskaj motastrałkovaj Sievastopalskaj bryhady, 45-j asobnaj inžyniernaj bryhady.
4-ja hvardziejskaja tankavaja Kantemiraŭskaja dyvizija znachodziłasia na Charkaŭskim napramku padčas kontrnastupleńnia Ukrainy vosieńniu minułaha hoda. Amierykanski instytut vyvučeńnia vajny i Forbes tady paviedamlali ab surjoznaj škodzie, naniesienaj dyvizii.
Siońniašni Parad Pieramohi na Krasnaj płoščy ŭpieršyniu za 16 hadoŭ prajšoŭ biez udziełu ciažkaj bronietechniki. Adzinym tankam, jaki vyjšaŭ ranicaj na hałoŭnuju płošču krainy, byŭ vieteran T-34-85.
Pa Krasnaj płoščy prajechali braniavanyja aŭtamabili «Tyhr», «Urał», «KamAZ», rakietnyja kompleksy «Iskander», S-400, «Jars», BTR «Bumieranh».
Dla paraŭnańnia, letaś pa Krasnaj płoščy prajechali 10 tankaŭ T-72, try tanki «Armata», siem tankaŭ T-90, try BMP «Kurhaniec», try BMP-3, čatyry BMP-2, Piać BRR-82A, 10 BTR-MDM, 10 BMD-4m, try BTR «Bumieranh». Akramia taho, u paradzie pryniali ŭdzieł šeść «Iskanderaŭ», čatyry kompleksy «Buk-M3», čatyry «Tor-M2», vosiem rakietnych ustanovak S-400, vosiem haŭbic «Msta-S», try «Jarsy», siem mašyn «Tarnada-H», siem «Tajfun-K», try «Tajfun-PDV», šeść «Tyhr-M», dzieviać robatechničnych kompleksaŭ «Uran-M», čatyry mašyny «Urał-63704».
Pavietranaja častka Parada była naohuł admienienaja.
Čytajcie taksama:
Alaksandr Łukašenka nie išoŭ razam z Pucinym i inšymi haściami Kramla pieški ŭ Alaksandraŭski sad
Hniłoje, zatoje niadoraha. Jak papuliscki ŭkaz Łukašenki ab abmiežavańni nacenki ŭpłyvaje na ŭsich udzielnikaŭ łancužka pastavak harodniny1
Kamientary