«Staŭleńnie absalutna inšaje». Ihar Bancar raskazaŭ, čym psichijatryčny špital u Polščy adroźnivajecca ad biełaruskaha
Ihar Bancar trapiŭ u psichijatryčnuju kliniku ŭ Varšavie i tam prabudzie sama mieniej try tydni. Sa słovaŭ Bancara, jamu ŭžo vystavili psichijatryčny dyjahnaz i pačali lačyć. Rok-muzykant z Hrodna raskazaŭ «Svabodzie», čym jaho špitalizacyja ŭ Polščy adroźnivajecca ad biełaruskaha dośviedu.
Jak raskazaŭ Bancar, historyja pačałasia rankam 27 krasavika. Jon pryjšoŭ u Centr dapamohi siamji ŭ Varšavie pa kansultacyju. Jak pradprymalnik, jaki arhanizoŭvaje imprezy, jon chacieŭ vyśvietlić, jak uziać čałavieka na pracu. Ale skončyłasia tym, što palicyja dastaviła jaho ŭ špital u kajdankach.
«Mianie zatrymali za toje, što ja Bancar: što ja vyhladaju tak, jak vyhladaju, maju dobra pastaŭleny hołas, i, kali razmaŭlaju, ludziam zdajecca, što ja kryču. Ludzi vielmi časta prymajuć maju ekspresiju za ahresiju», — kaža muzyka.
U Biełarusi dyjahnazu nie było
Muzykanta pryvieźli ŭ psichijatryčny špital u Varšavie na vulicy Navaviejskaj, 27. Pieršy dzień jon znachodziŭsia ŭ špitalnym karcary, u izalacyi. Potym jaho pieraviali ŭ ahulnuju pałatu ŭ adździaleńni pamiežnych razładaŭ.
Bancar raskazaŭ «Svabodzie», što nieaficyjna jon viedaje, jaki dyjahnaz jamu pastavili — šyzapadobny razład. Heta nie šyzafrenija. Pavodle Mižnarodnaj kłasifikacyi chvarobaŭ, hetaje rasstrojstva moža prajaŭlacca ŭ ekscentryčnych pavodzinach, nieadekvatnych emacyjnych reakcyjach, schilnaści da sacyjalnaj izalacyi, niezvyčajnych idejach.
U Biełarusi Bancaru nie stavili psichijatryčnych dyjahnazaŭ. Jon byŭ na prymusovym abśledavańni ŭ Navinkach padčas kryminalnaha pieraśledu. Lekary vydali zaklučeńnie: zdarovy.
Iharu pryznačyli lačeńnie: rankam i ŭviečary jamu dajuć niekalki tabletak. Jon viedaje, što prynamsi niekatoryja ź ich majuć zaspakajalnaje dziejańnie. Niekatorych ahresiŭnych pacyjentaŭ u špitali pryviazvajuć, robiać im injekcyi. Ź Iharam takich pracedur nie pravodziać. Jon znachodzicca ŭ špitali prymusova, nie moža vychodzić na vulicu. Nakolki jon viedaje, lačeńnie praciahniecca minimum try tydni.
«Aficyjna nichto ničoha nie paviedamiŭ: čamu zabrali, navošta. Heta parušeńnie zakanadaŭstva», — pierakanany Bancar.
Muzyka płanuje padavać u sud taksama na miedykaŭ, jakija jaho trymajuć u špitali i ničoha nie tłumačać.
Jakija ŭmovy
Ciaham dnia ŭ špitali Ihar moža zajmacca svaimi spravami. Na druhi dzień jamu viarnuli telefon. Jon moža zachodzić u internet. Dazvolili naviedvańni. U lakarni možna hladzieć televizar, naviedvać tancy, zaniatki pa art-terapii, sieansy ź psichołaham i psichijatram.
Ihar trymajecca viehanskaj dyjety. U špitali jaho kormiać pavodle adpaviednaha mieniu. U Biełarusi Ihar nie moh atrymać navat viehietaryjanskaje mieniu ŭ zakrytych ustanovach: izalatary, turmie, psichijatryčnym špitali.
Praŭda, viačera nadta rana — a 17-j hadzinie, tamu pacyjent zastajecca trochu hałodnym.
«Častka ludziej znachodzicca tut pa ŭłasnym žadańni. Lažyć dziaŭčyna, jakaja tut dziasiaty raz, ale na vychadnyja jaje adpuścili pahulać u horad.
Byvajuć ciažkija stany, kali ludzi ahresiŭnyja, ich pryviazvajuć i robiać ukoły. Ja baču tut, jak ludzi kryčać pa načach, jak pieratvarajucca ŭ harodninu. Ale heta ja bačyŭ i ŭ Biełarusi», — raskazvaje Ihar.
Pavodle Ihara Bancara, u polskaj lakarni lepšyja ŭmovy, čym u biełaruskaj.
«Staŭleńnie absalutna inšaje. Vidać, što Polšča zrabiła vielizarny krok napierad, što jana zjaŭlajecca častkaj Jeŭrasajuza. Staŭleńnie navat da mianie źmianiłasia. Mnie prapisali leki i supakoilisia, što ja nie budu biehać i nikoha nie zabju», — raskazvaje muzyka.
U polskim špitali jość mahčymaść kamunikavać sa śvietam: telefanavać, karystacca internetam, adviedvać pacyjenta.
«Dyskamfortu ja nie adčuvaŭ, kali vyklučyć, jak asabista da mianie pastavilisia. Usie paraŭnańni na karyść polskaha špitala», — kaža Ihar.
«Svaboda» źviarnułasia pa kamientaryj da polskaj palicyi z pytańniami pra abstaviny zatrymańnia Ihara Bancara. Adkazu pakul niama.
Ihar Bancar — hrodzienski muzykant, lidar hurta «Mister X». Padčas pratestaŭ 2020 hodu stancavaŭ biez štanoŭ pierad mašynaj milicyjantaŭ. Bolš za hod pravioŭ za kratami. Pravaabaroncy pryznali jaho palitviaźniem. 18 kastryčnika 2022 hodu pryjechaŭ u Polšču. U Varšavie praciahvaje zajmacca muzyčnaj dziejnaściu. Bancaru 43 hady. Žanaty, maje traich dziaciej.
«A što ŭ vas za prablemy? Daloka da Minska ci niama kamu padvieźci?» Publičnaja pikiroŭka Łukašenki i Pašyniana10
Kamientary