Inha Chruščova: Napačatku ŭ jaho było ŭjaŭleńnie ab rečaisnaści, a potym pačaŭsia niejki cyrk z kaniami
Byłaja žurnalistka z pułu prezidenta Biełarusi raskazała ab pracy z Łukašenkam i rastłumačyła źmieny svajho śvietapohladu.
Vialikaja razmova ź Inhaj Chruščovaj źjaviłasia na jutub-kanale «Žyćcio — malina». Pryvodzim najbolš cikavyja momanty.
Jak śćviardžaje Inha Chruščova, u 1994 hodzie jana hałasavała za Stanisłava Šuškieviča. Jana vučyłasia ŭ BDU i viedała hetaha čałavieka. Chruščova śćviardžaje, što na toj čas jaje palityka nie cikaviła. Žurnalistka zajmałasia ŭ moładzievaj redakcyi telebačańnia inšymi prahramami. Pry hetym aktyŭna pisała pra Paźniaka, Biełaruski narodny front.
Paźniej jana ŭvajšła ŭ žurnaliscki puł abranaha prezidenta.
«Spačatku mnie było cikava. Nam padavałasia, što heta budzie niejkaje niezaležnaje telebačańnie. Što ty śviedka padziej. Potym, jak syšoŭ Jelcyn, stała zrazumieła, što adbyłasia padmiena paniaćciaŭ. Jon vyciahnuŭ naznačenca Pucina», — zhadvaje Inha Chruščova.
Viadomaść žurnalistka atrymała dziakujučy svajmu emacyjnamu repartažu z Čarnobylskaha šlachu 1996 hoda.
«Ja prysutničała na hetym mitynhu. My stajali pamiž mitynhujučymi i AMAPam. Ja tam była i atrymała kuchtaloŭ. Mianie ździviła toje, što ŭ pieršych šerahach išli ŭkraincy — UNA-UNSO. Na tym mitynhu nam złamali kamieru. Heta emacyjna paŭpłyvała na tekst repartažu. My atrymali dubinaj. Nam adłamali vidašukalnik, nadavali pa plačach. Ciažka zhadać, chto biŭ. Paźniejšy tekst byŭ napisany na emocyjach».
Jak źmianiaŭsia vobraz Łukašenki ŭ ŚMI
Znajomstva z Łukašenkam adbyłosia vypadkova. Inha Chruščova była adna ŭ redakcyi i jaje nakiravali na aśviatleńnie naviedańnia pieršaj asobaj kamvolnaha kambinata.
«Jon zachoplena hladzieŭ na žančyn, całkam imknuŭsia ŭniknuć u prablemy, jon byŭ tam, u momancie, na samaj spravie. U toj pieršy vizit, jaki ja bačyła, jon zdavaŭsia niejkim svaim. I žančyny jaho tam ledź nie ŭ koła schapili. Jon ich słuchaŭ, imknuŭsia im dapamahčy. Składałasia takoje ŭražańnie, što jon całkam žyvie prablemami taho pradpryjemstva, kudy jon pryjechaŭ, i choča im dapamahčy. Mianie ŭraziła, što jon rabiŭ heta ščyra», — zhadvaje žurnalistka.
Inha Chruščova paraŭnoŭvaje pajezdki Łukašenki ŭ pieršyja hady jaho ŭłady i paźniej. Jana ŭpeŭnienaja, što pačynajučy z 2000-ch hadoŭ jany stali padviarhacca režysury, źjavilisia ludzi, jakija na svaich pasadach adkazvali za arhanizacyju pajezdak.
«Ich zjaŭlałasia ŭsio bolej i bolej. Akramia adkaznych za pryjom na miescach, byli ludzi z boku administracyi. Raniej, kali jon tolki pačynaŭ svaju karjeru, takich było značna mieniej. Potym hetaja kolkaść razrastałasia i litaralna z vykankamaŭ, inšych ustanoŭ zjaŭlalisia hetyja ludzi, jakija rychtavali niejkija sceny pyłu ŭ vočy».
Chruščova zaŭvažaje, što Łukašenka lubiŭ sustrakacca ź ludźmi. Ale ź ciaham času ich stali zamianiać śpiecsłužboŭcy.
«Šmat ludziej prychodziła, stvarałasia karcinka, što jon razmaŭlaje z narodam. I voś adnojčy Andrej Uciuryn adniekul pryvioŭ ludziej, padobnych da ciapierašnich hubazikaŭcaŭ. Stvarałasia ŭražańnie, što heta niejkija nie prostyja hramadzianie. I niekalki hetych mužykoŭ byli ŭ prostym adzieńni, ale zabylisia źniać bejdžy.
Hetyja «narodnyja sceny» nahadvali niejki śpiektakl. Raniej heta byli sapraŭdnyja ludzi. Jon mieŭ zvarotnuju suviaź. U jaho było ŭjaŭleńnie ab rečaisnaści, jakaja jość u Biełarusi, atrymanaje ad samich ludziej. A potym pačaŭsia niejki cyrk z kaniami», — adznačaje Chruščova.
Inha Chruščova zhadvaje, što na samym pačatku nie było nijakich zabaron na zdymki Łukašenki. Jaho možna było zdymać z usich bakoŭ. Zabarona nie zdymać zzadu zjaviłasia, kali jaho pres-słužbu ŭznačaliła Natalla Piatkievič.
«Ja prapuściła momant zjaŭleńnia Piatkievič, bo była ŭ dekrecie. Kali ja sychodziła ŭ dekret, to słužbu ŭznačalvaŭ Mikałaj Barysievič, jaki paźniej pracavaŭ u MZS. A kali ja ŭžo vyjšła, była Piatkievič. I heta byŭ inšy śviet. Stała niejak sumna. Da hetaha byli libieralnyja časy. A kali ja viarnułasia, zjaviłasia adčuvańnie, što jon užo nie hraje toj roli, jakuju hraŭ u kancy 1990-ch — pačatku 2000-ch. Zjaviłasia šmat supracoŭnikaŭ, jakija rabili karcinku. Nam stali vydavać pytańni. Kali na pačatku 1990-ch žurnalisty pryjazdžali za hadzinu-paŭtary, prachodzili dahlad i čakali pryjezdu, to potym treba było pryjazdžać za 2-3 hadziny. Tam usio vyznačała Piatkievič. Ty siadzieŭ u čakańni nieviadoma čaho».
Inha Chruščova raskryła kuchniu padrychtoŭki pytańniaŭ. Za niekalki tydniaŭ da pajezdki Piatkievič prapanoŭvała žurnalistam padać svaje pytańni, jakija jany płanujuć zadać padčas padychodu Łukašenki. Piatkievič hetyja pytańni mahła pakidać u tym vyhladzie, jak ich padali. Z pytańniaŭ i składaŭsia padychod. Takim čynam Łukašenka byŭ padrychtavany. Časam Piatkievič napiaredadni davała žurnalistam pytańni z padrychtavanaha śpisa.
Žurnalistka raspaviała pra vypadak adłučeńnia ad prezidenckaha puła z-za zvyčki zadavać svaje pytańni.
«Kali ja vyjšła z dekretu, była niejkaja pres-kanfierencyja z rasijskim žurnalistami, i voś tady ŭpieršyniu Piatkievič mnie dała pytańnie. Heta była papierka z pytańniem. Ty moh jaho nie vučyć, jak vierš. Ale ahulny sens ty pavinien byŭ ahučyć. Ja nie zrazumieła hetaha tady i zadała svajo pytańnie, zychodziačy z kantekstu hetaj kanfierencyi. Jon adkazvaŭ. Było bačna, što jon nie padrychtavany da takoha. Paśla adrazu padyšła Piatkievič i, jak uładarka suśvietu, pačała raspaviadać, jakija ciapier praviły. I ja pavinna im padparadkoŭvacca. Ja dajechała da redakcyi, i tam mnie skazali, što Piatkievič patelefanavała, i mnie nie treba pakul jeździć. U mianie stała šmat volnaha času. Dla mianie heta byŭ padarunak. Ja narešcie mieła volny čas. Praź niejki čas, mahčyma praz paŭhoda, mianie viarnuli».
Inha Chruščova zhodnaja ź mierkavańniem, što siońnia z Łukašenki robiać niejkuju lalku ŭsimi miechanizmami, jakija dazvalaje Adobe. I ŭ jaho nie ŭsio dobra sa zdaroŭjem:
«Ciapier heta adbyvajecca tamu, što im treba stvaryć karcinku i pakazać, što jon zdarovy, u jaho ŭsio dobra, jon dobra vyhladaje. Ale razmovy pra insulty, infarkty, chvaroby. Ich zadača — upeŭnić, što ŭ Łukašenki ŭsio dobra. A voś kali jon byŭ u Zimbabve, jaho zdymali inšyja žurnalisty. Na zdymku zimbambijskaha fotakara jon staić taki, jaki jość. Heta dzied, jaki ŭžo raspłyŭsia, tłusty. A na videa jon ciahnie nahu. Jany dajuć kusok realnaha videa. Ja liču, što jon u drennym stanie zdaroŭja. Jak by nie imknulisia nakinuć skin-ton. Kali kidaješ u Adobe karcinku, bačna, što była apracoŭka. Inžynieram na telebačańni ciapier treba pracavać nad tvaram».
Spartoŭcy i palityka
Na dumku Chruščovaj, spartoŭcam u 2020 hodzie treba było zaniać niejki bok. Ale bolš za ŭsich jaje ŭraziła Domračava: «Paśla taho, kali źbili jaje brata, jana nijakaha mierkavańnia nie vykazała. Ja nie mahu rastłumačyć, čamu».
Na dumku Chruščovaj, u sporcie adbyłasia niejkaja dehradacyja. U hetym jość vina i samich spartoŭcaŭ:
«Im nie cikavyja tyja padziei, što adbyvajucca. Heta čałaviečyja rysy. Kali jany jość, ty možaš vykazać svaju pazicyju, jak heta zrabiła Nadzieja Astapčuk. Spartoviec Niedasiekaŭ — vynik dehradacyi. My ź im zapisvali siužet napiaredadni Jeŭrapiejskich hulniaŭ. Jon byŭ matyvavany sportam i nie vykazvaŭsia na palityčnyja temy. Potym mnie było dziŭna, što jon pačaŭ hetym zajmacca».
Inha Chruščova ličyć, što fraza «sport pa-za palitykaj» całkam nie adpaviadaje rečaisnaści:
«Sport nikoli nie byŭ pa-za palitykaj. Jon zaŭsiody vykarystoŭvaŭsia palitykami. Mnie zdajecca, što hety vyraz prydumany ŭ savieckija časy. A tady jakraz spartoŭcaŭ i vykarystoŭvali ŭ palityčnych metach».
Łukašenka i sport
Apantanaść Łukašenki sportam Inha Chruščova tłumačyć tym, što jon, faktyčna nie majučy da vynikaŭ spartsmienaŭ nijakaha dačynieńnia, atrymlivaje palityčnyja dyvidendy:
«Heta toje adzinaje stanoŭčaje, dla čaho jon ničoha nie robić. Domračava ci chtości inšy zavajoŭvaje miedali, prynosić słavu. A jon staić pry padziei, ničoha ŭ heta nie ŭkładajučy. Ułada — heta chvaroba. I tabie chočacca, kab usie ciabie viedali, usie pra ciabie havaryli. A sport daje takuju mahčymaść. Heta infarmacyjnaja nahoda zhadać pra siabie».
Na dumku Chruščovaj, napačatku Łukašenka zrabiŭ šmat dla sportu. U peŭny momant jon spryjaŭ hetamu raźvićciu. Ale svoječasova nie zmoh spynicca:
«Ty raspačaŭ hetuju spravu, ale potym addaj u ruki prafiesijanału. Dobry prykład — BATE. Zdajecca, jon tudy mała lez. I niejak u BATE ŭsio atrymałasia. A chakiej — heta prykład taho, što lepš dać prafiesijanałam».
Sychod u spartyŭnuju redakcyju i viartańnie da prapahandy ŭ 2010 hodzie
Pa svajoj pieršaj prafiesii Inha Chruščova lohkaatletka. Jana zajmałasia spryntam. Spačatku biehała na 100 i 200 mietraŭ. Paźniej, paśla traŭmy, na bolš doŭhija dystancyi — 200 i 400 mietraŭ. Skončyła Viciebskaje vučylišča alimpijskaha reziervu.
«Heta toje, što mnie padabajecca, čym ja žyła šmat hadoŭ. Ja chacieła zajmacca spartyŭnaj tematykaj. Pošuk svajho šlachu doŭha išoŭ. Mianie z palohkaj adpuścili. Jašče na pieršym kursie, kali ja pryjšła na telebačańnie, ja pajšła ŭ spartyŭnuju redakcyju. Ale tam nie było miescaŭ. Tamu ja apynułasia ŭ maładziožnaj redakcyi. Ale hienieralnaj linijaj było zajmacca spartyŭnaj žurnalistykaj».
Adnak u 2010 hodzie jana znoŭ zjaviłasia na ekranach u navinach. Chruščova tłumačyć heta tym, što vieryła ŭ Łukašenku.
«Łukašenka tady, pierad vybarčaj kampanijaj, vybiraŭ jeŭrapiejski šlach. U 2010 hodzie apazicyjnyja kandydaty imknulisia znajści adzinaha kandydata i doŭha damaŭlalisia. Unutry hetaj kaalicyi adbyvalisia nie zusim zrazumiełyja mnie rečy. Usio išło da taho, što jeŭrapiejskaje łobi rychtavała dla Łukašenki łahodny šlach u Jeŭropu. Było šmat śviedčańniaŭ taho, što budzie niejkaje paciapleńnie ŭ adnosinach ź Jeŭropaj. Heta va ŭsim adčuvałasia. U mianie była viera ŭ jeŭrapiejski šlach Biełarusi. Da hetaha ŭsio išło. Ale potym, paśla Płoščy, naradziłasia dumka, što treba sychodzić».
Inha Chruščova zhodnaja, što razam ź inšymi zajmałasia imidžam Łukašenki, prapahandaj. Ale tłumačyć svaju pazicyju ŭ 1990-ch tym, što ščyra vieryła prezidentu.
«Ty małady i haračy. U ciabie adno staŭleńnie da padziej. Potym pačynaješ razumieć, što tabie nie padabajecca, rabić niejkija vysnovy dla siabie. Dla kahości heta evalucyja, dla niejkaha — dehradacyja. My pracavali na złomie historyi i jašče nie viedali, chto taki Łukašenka. Zdavałasia, što hety čałaviek pryniasie Biełarusi dabro. Za 29 hadoŭ užo možna razabracca, što heta za čałaviek. U 96-m hodzie ja nie viedała pra Łukašenku ničoha».
Čytajcie jašče:
«Ajcišniki nie buntujuć, nu i chren ź imi». Libier pra Jančeŭskaha, Bahracova i Dobkina
Što zapisana aficyjnaj pryčynaj śmierci adzinaha syna Jarmošynaj?4
Kamientary