Miniust pravioŭ jašče adnu atestacyju advakataŭ, z 11-ci prajšli tolki dvoje
Kvalifikacyjnaja kamisija Miniusta praciahvaje pazbaŭlać «niazručnych» advakataŭ licenzij. Čarhovaja atestacyja prajšła siońnia, i pa jaje vynikach z 11 jurystaŭ tolki dvoje nie sutyknulisia z prablemami.
Licenzij pazbavili advakataŭ Taćcianu Lišankovu i Dźmitryja Pihula. Rašeńnie pryniata «ŭ suviazi z prymianieńniem da ich Minskaj haradskoj kalehijaj advakataŭ dyscyplinarnych spahnańniaŭ u vyhladzie vyklučeńnia z kalehii za ździajśnieńnie praviny, nie sumiaščalnaj sa zvańniem advakata».
Taćciana Lišankova pracavała abaronkaj kaardynatarki «Latučaha ŭniviersiteta» Taćciany Vadałažskaj, jakuju ŭ červieni prysudzili da 2,5 hadoŭ chimii pavodle abvinavačvańnia ŭ hrubym parušeńni paradku (Častka 1 artykuła 342 KK).
Dźmitryj Pihul abaraniaŭ u sudzie adnaho ź fihurantaŭ spravy «Busły laciać». Praces pa spravie išoŭ u zakrytym režymie, i navat blizkija abvinavačanych nie viedali, jakija epizody i artykuły Kryminalnaha kodeksa stavilisia im u vinu.
Taksama kamisija pastanaviła, što pa vynikach atestacyi advakaty Aksana Biełaja, Natalla Vołkava, Volha Dziamidčyk i Siarhiej Dziemjančuk nie mohuć vykonvać svaje prafiesijnyja abaviazki «z-za niedastatkovaj kvalifikacyi».
U dačynieńni da advakataŭ Dzianisa Koŭtuna, Anastasii Małachavaj, Łarysy Suślikavaj pryniataja pastanova ab niapoŭnaj adpaviednaści patrabavańniam zakanadaŭstva z adterminoŭkaj atestacyi na šeść miesiacaŭ pry ŭmovie vykanańnia rekamiendacyj kvalifikacyjnaj kamisii, u tym liku ab prachodžańni «pavyšeńnia kvalifikacyi».
Nie mieli padčas atestacyi nijakich prablem tolki Kaciaryna Malukova i Ivan Marčankoŭ.
«A što ŭ vas za prablemy? Daloka da Minska ci niama kamu padvieźci?» Publičnaja pikiroŭka Łukašenki i Pašyniana13
Kamientary