Čarhovaja abłava HUBAZiKa — hetym razam na žycharoŭ minskaj Čyžoŭki
Kali vieryć siłavikam, zatrymanyja 12 čałaviek. Miarkujučy pa videa, jak minimum adnaho źbili paśla zatrymańnia.
Rajon Čyžoŭka — adzin z samych aktyŭnych u Minsku. Aktyŭ Čyžoŭki raspaŭsiudžvaje samvyd u rajonie, vydaje hazietu «Siem čyžoŭ» i čas ad času pravodzić fotaakcyi z aktualnych nahodaŭ. Za heta jany časta stanoviacca abjektam ataki śpiecsłužbaŭ.
U videa HUBAZiKa pakazanyja brutalnyja zatrymańni z vybivańniem dźviarej i maski-šou sa zbrojaj. Bolš za ŭsio dastałasia adnamu z mužčyn, u jakoha raźbitaje voka — imavierna, jaho źbili pry zatrymańni. Niahladziečy na heta, mužčyna trymajecca hodna.
Taksama pakazany ździek ź jašče adnaho zatrymanaha — jaho vyvodziać z padjezda ŭ kajdankach, ale z usunutym u ruki parasonam bieł-čyrvona-biełaha koleru. Ale heta videa raniejšaha zatrymańnia, vierahodna, vosieńskaha.
U videa skazana, što była «źniščanaja pratesnaja hrupa «Recepty zakatak i nastojek», ale na skrynšocie, jaki demanstrujuć siłaviki, bačna, što heta sapraŭdy rajonnaja bałbatałka nie pra palityku (heta nam paćvierdziŭ adzin z udzielnikaŭ hrupy).
A kulminacyjaj «śpiecapieracyi» HUBAZiKa suprać biełarusaŭ stanovicca vykopvańnie skrutkaŭ z pratesnaj simvolikaj i atrybutykaj na dačnym učastku niekaha z aktyvistaŭ Čyžoŭki. U ich — ściah, bieł-čyrvona-biełyja stužki i žuraŭliki, a taksama ŭlotki i nalepki.
Voś jak prakamientavali nam hetuju situacyju administratary supołki «Čyžoŭka siem čyžoŭ»:
«Z našym botam, kanałam i čatami ŭsio ŭ paradku. My čuli, što ŭ našym rajonie pavialičyłasia kolkaść zatrymańniaŭ. Ale jana pavialičvajecca, na žal, pa ŭsioj Biełarusi. Vyhladaje tak, byccam biaruć vypadkovych ludziej.
Chutčej za ŭsio, hetyja zatrymańni — častka kampanii pa zapałochvańni našaha rajona. Čamu abirajuć tych ci inšych ludziej, my nie viedajem».
Niadaŭna čat i kanał «Čyžoŭka siem čyžoŭ» byli pryznanyja ekstremisckim farmiravańniem. Zvyčajna heta robicca paśla taho, jak zatrymlivajuć udzielnikaŭ adkrytych čataŭ, kab «naviesić» im bolš ciažkija artykuły (kamientavańnie ŭ «ekstremiścich farmiravańniach» advolna traktujecca jak sadziejničańnie dziejnaści «ekstremisckaha farmiravańnia»).
«Naša Niva» — bastyjon biełaruščyny
PADTRYMAĆČytajcie jašče:
Čarhovaja abłava, ciapier u Žłobinie: zatrymali nie mienš za piać čałaviek
Tłumačym, jakim čynam siłaviki znachodziać karystalnikaŭ Telegram i jak hetaha paźbiehnuć
«A što ŭ vas za prablemy? Daloka da Minska ci niama kamu padvieźci?» Publičnaja pikiroŭka Łukašenki i Pašyniana11
Kamientary