«Damoŭ biez Kubka, zatoje z katom». Zbornaja Anhlii znajšła na čempijanacie śvietu simpatyčny talisman
Zbornaja Anhlii nie zmahła pieramahčy Francyju ŭ čverćfinale čempijanatu śvietu pa futbole ŭ Katary i nie pryviazie dadomu zapavietny Kubak, ale zatoje pryviazie — dakładniej, pieraviazie — kata Dejva, ź jakim hulcy pasiabravali padčas turniru, piša Bi-bi-si.
Plamista-pałasaty badziažny kot Dejv prybiŭsia da futbalistaŭ na trenirovačnaj bazie ŭ horadzie Vakra praktyčna adrazu i staŭ nieaficyjnym talismanam kamandy.
How my journey began…
pic.twitter.com/FajjTkUcG6
Hulcy «Mančester Sici» Džon Stoŭnz i Kajł Uokier adrazu vyrašyli, što zabiaruć jaho dadomu, kali zbornaja stanie čempijonam śvietu, ale navat paśla projhryšu francuzam futbalisty vyrašyli, što ŭžo nie zmohuć rasstacca z katom.
Na praciahu niekalkich tydniaŭ, pakul zbornaja była ŭ Katary, Dejv uvieś čas kruciŭsia pobač z anhličanami — jany padkormlivali jaho i hulali ź im kožny viečar. Stoŭnz i Uokier asabliva pryviazalisia da Dejva, rehularna vykładvali pasty ź im u sacsietkach.
«Tolki my pryjechali — i adrazu źjaviŭsia Dejv», — raspavioŭ Stoŭnz, jaki i daŭ katu novuju mianušku.
Pra los kata futbalistaŭ zbornaj pytalisia navat na pres-kanfierencyi niezadoŭha da čverćfinału.
«Dejvu dobra, — skazaŭ žurnalistam Kajł Uokier. — Unačy ŭ jaho była nievialikaja sutyčka ź inšym katom. Ja dumaju, jany pabilisia za terytoryju i ježu. Ale ŭ jaho ŭsio dobra».
Welcome to the team Dave x https://t.co/xfhtNl939h
Dejv, jaki pramianiaje katarskaje sonca na anhlijskuju prachałodu, nie zmoh adrazu dałučycca da hulcoŭ zbornaj i palacieć u Łondan — spačatku jaho advieźli ŭ miascovuju vieterynarnuju kliniku, dzie jamu zrobiać analizy i pryščepki, paśla čaho kot praviadzie čatyry miesiacy ŭ karancinie.
«Niachaj futboł nie vierniecca dadomu, zatoje vierniecca Dejv», — pišuć brytanskija ŚMI.
Hałoŭny myšałoŭ rezidencyi brytanskaha premjera na Daŭninh-stryt kot Łary ŭžo pavitaŭ Dejva.
«Sardečna zaprašajem u kamandu, Dejv», — napisaŭ jon u tvitary.
Kamientary