Daśledavańnie: U Litvu pierajechali kala 40 tysiač biełarusaŭ, litoŭcam prablem heta nie stvaraje
Pavodle źviestak Litoŭskaha centra daśledavańniaŭ Uschodniaj Jeŭropy, ciapier u Litvie znachodzicca kala 40 tysiač hramadzian Biełarusi. Takuju kolkaść vyjaviła apytańnie i intervju, nakiravanyja na vyznačeńnie asnoŭnych pryčyn prybyćcia biełarusaŭ u Litvu i ź jakimi prablemami jany sutykajucca ŭ hetaj krainie, piša «Novy čas».
Jak ličać litoŭskija śpiecyjalisty, vajna Rasii va Ukrainie stała sihnałam taho, što časovaje pierasialeńnie ŭ Litvu moža zaniać bolš času, čym dahetul dumała bolšaść biełarusaŭ. Takaja situacyja moža paradaksalnym čynam stymulavać žadańnie biełarusaŭ macniej intehravacca ŭ Litvie (jak asobnych ludziej, tak i arhanizacyi).
Pa źviestkach praviedzienaha apytańnia, kala 86 % respandentaŭ pakinuli Biełaruś pa palityčnych matyvach. Bolšaść pryjechaŭšych u Litvu — ludzi pracazdolnaha ŭzrostu, jakija majuć na novym miescy pastajannuju krynicu dachodu (amal 70 % apytanych). 68% respandentaŭ majuć vid na žycharstva ŭ Litvie, 15% — humanitarnuju vizu, a krychu bolš za 8 % atrymali aficyjny prytułak abo čakajuć rašeńnia ab nadańni prytułku.
Asnoŭnymi pryčynami, pa jakich respandenty abrali Litvu zamiest inšaj krainy, źjaŭlajucca mahčymaść atrymańnia vizy abo dazvołu na časovaje pražyvańnie ŭ Litvie, adsutnaść moŭnaha barjera, asabisty vopyt žyćcia ŭ Litvie, lepšy palityčny klimat dla hramadskaj i prafiesijnaj dziejnaści, a taksama davier da viaršenstva zakona.
Pryjezd biełarusaŭ u Litvu nie stvaraje značnych vydatkaŭ dla litoŭskaha biudžetu: sacyjalnymi prahramami ŭ hetaj krainie karystajucca tolki 10 % biełarusaŭ, pry hetym niekatoryja z hetych prahram realizujucca niaŭradavymi arhanizacyjami.
Prybyćcio biežancaŭ z Ukrainy i bolš spryjalnyja ŭmovy dla intehracyi ŭkraincaŭ na rynak pracy nie vyklikali napružanaści pamiž biełarusami i ŭkraincami ŭ Litvie, ale pryviali da niedavieru biełaruskaj dyjaspary da litoŭskich ustanoŭ. Tym bolš, što pryčyny dla bolš spryjalnych umoŭ dla biežancaŭ z Ukrainy, z punktu hledžańnia biełaruskaj dyjaspary, naležnym čynam nie tłumačacca.
Biełarusy adčuvajuć siabie dadatkova ŭraźlivymi praz toje, što biełaruskija ŭłady mohuć vykarystoŭvać konsulskija pasłuhi jak srodak sačeńnia i cisku navat za miažoj.
Respandenty aceńvajuć pačućcio biaśpieki ŭ Litvie ŭ siarednim na 8,81 z 10 bałaŭ, a jakaść žyćcia ŭ Litvie ŭ siarednim na 7,62 z 10.
Biełarusy ŭ Litvie sutykajucca z prablemami, jakija aktualnyja dla ŭsich žycharoŭ Litvy: inflacyja, zaniepakojenaść adnosna mahčymaj vajennaj ahresii suprać Litvy, niedachop miescaŭ u dziciačych navučalnych ustanovach, doŭhija čerhi va ŭstanovach achovy zdaroŭja, nadzvyčaj vysokija ceny na arendu žylla i h.d.
Daśledavańnie pravodziłasia ŭ Litvie ŭ červieni-vieraśni 2022 hoda. Litoŭskija sacyjołahi adznačajuć, što było praviedziena kolkasnaje apytańnie hramadskaj dumki na anłajn-płatformie pry ŭdziele 335 respandentaŭ, a taksama 11 hłybinnych intervju, jakija pašyrajuć analiz kolkasnych danych.
Vynieśli prysud dokšyckamu piarevaratniu ŭ pahonach Zhirskamu2
Kamientary