Bundeśvier čakaje hibrydnych pahroz i ataki na infrastrukturu Hiermanii. Mahčyma, siońnia takaja adbyłasia
Hienierał Bundeśviera Karsten Brojer, jaki ź vieraśnia ŭznačalvaje terytaryjalnaje kamandavańnie niamieckaj armii, ličyć nadzionnymi dla Hiermanii hibrydnyja pahrozy i mahčymyja ataki na krytyčnuju infrastrukturu. Jak paviedamlaje «Jeŭrapiejskaja praŭda», pra heta Brojer zajaviŭ u intervju Bild.
«My havorym nie pra varožaje vojska z sałdatami i tankami, jakija atakujuć našu krainu. Ale jość akty ŭździejańnia, z atakami na infrastrukturu, z kibieratakami, ci, naprykład, raźviedvalnyja paloty bieśpiłotnikaŭ nad kazarmami. To-bok «kropkavyja ŭdary», jakija majuć na mecie pasiejać niaŭpeŭnienaść siarod nasielnictva i pachisnuć davier da našaj dziaržavy», — rastłumačyŭ jon.
Pa słovach kamandujučaha terytaryjalnaj abaronaj Bundeśviera, cellu złamyśnikaŭ moža być «kožnaja transfarmatarnaja stancyja, kožnaja elektrastancyja, kožny trubapravod».
Terytaryjalnaje kamandavańnie Bundeśviera było aficyjna pradstaŭlenaje ŭ kancy vieraśnia. Štat składajecca z 550 vajskoŭcaŭ i 250 hramadzianskich asob. U vypadku nadzvyčajnych situacyj kamandavańnie moža taksama pryciahvać dadatkovyja siły z usich častak Bundeśviera.
Zaniepakojenaść pra biaśpieku krytyčnaj infrastruktury ŭ Hiermanii ŭzmacniłasia paśla vybuchaŭ u Bałtyjskim mory, jakija pryviali da paškodžańnia rasijskich hazapravodaŭ sistemy «Paŭnočny patok».
A ŭ subotu ŭ paŭnočnaj častcy Hiermanii ŭvieś ruch na čyhuncy spyniŭsia na try hadziny z-za paškodžańnia krytyčna važnych kamunikacyj. Ministr transpartu i ličbavaj infrastruktury Hiermanii Folkier Visinh paźniej paćvierdziŭ, što pryčynaj ranišniaha «paraliču» na Deutsche Bahn na poŭnačy krainy stali dyviersijnyja dziejańni.
Kamientary