«Heta budzie našmat bolš vyhadny mir, čym Ukraina mahła b zaklučyć u lutym ci sakaviku»

Pres-sakratar Kramla Dźmitryj Piaskoŭ u mai zajaŭlaŭ, što pieramovy pamiž Rasijaj i Ukrainaj nie viaducca, bo ŭ Kijeva, nibyta, adsutničaje žadańnie praciahvać hety praces. 

«Maskva bačyć z boku Kijeva poŭnaje niežadańnie praciahvać pieramovy», — kazaŭ Piaskoŭ. 

Ministr zamiežnych spraŭ Rasii Siarhiej Łaŭroŭ śćviardžaje, što Ukraina sama raśpisałasia ŭ tym, što nie žadaje pieramovaŭ z Rasijaj. 

«Vaźmicie insceniroŭku pieramovaŭ, jakaja pravaliłasia paśla Stambuła: jany prosta sami raśpisalisia ŭ tym, što jany hetych pieramovaŭ nie chočuć. I dahetul nam niezrazumieła, jaki instruktaž atrymlivaje Zialenski ad svaich haspadaroŭ u Vašynhtonie, Łondanie», — zajaviŭ Łaŭroŭ. 

Mir, ale na jakich umovach? 

Vajna ciapier idzie na terytoryi Ukrainy. Choć straty rasijskaj armii ŭ žyvoj sile i technicy bolšyja, čym va ŭkraincaŭ, a ŭkraincy vajujuć aščadna, bierahuć svaich sałdat, usio adno źniščajucca ŭkrainskija harady, ukrainskaja pramysłovaść i ekanomika, hinuć mirnyja žychary Ukrainy. Ukraina tracić na abaronu bolšuju častku dziaržaŭnaha biudžetu. 

Vidavočna, što ŭkrainskaje hramadstva i kiraŭnictva zacikaŭlenyja ŭ skančeńni vajny. I ŭkrainskaje hramadstva pierad pačatkam vajny było našmat bolš miralubnaje, čym hramadstva rasijskaje (u Rasii impieryjalistyčnyja i militarysckija nastroi ŭłady raspalvali ŭsie apošnija hady). 

Ukraina hatovaja na pieramovy, kab damahčysia miru, ale jość pytańnie cany. 

Rasija napačatku patrabavała kapitulacyi Ukrainy i jaje rasčlanieńnia. Danbas, Krym, Charkaŭ, Čarnihaŭ, Dniapro i Adesu chacieli dałučyć da Rasii, a na rešcie terytoryi stvaryć psieŭdaniezaležnyja ŭtvareńni. Pad «denacyfikacyjaj» rasijanie razumiejuć admovu ad ukrainskaj movy, rusifikacyju, nasadžeńnie va Ukrainie svajoj, rasijskaj viersii histaryčnaj pamiaci i svaich pryncypaŭ dziaržaŭnaha ładu pa anałohii z tym, što adbyłosia ŭ Prydniastroŭi, Krymie, «DNR», «ŁNR» dyj, budziem ščyrymi, u łukašenkaŭskaj Biełarusi.

Na praktycy heta aznačała b masavyja represii, filtracyjnyja łahiery, aryšty, zabojstvy, vyciskańnie «ekstremistaŭ» u emihracyju. U Chiersonie ci Maryupali my ŭsio heta majem mahčymaść nazirać užo ciapier. 

Faktyčna, «mir», jaki prapanoŭvała Kijevu Maskva, byŭ tym «miram», jaki prapanoŭvaŭ Hitler Čechasłavakii ŭ 1938 hodzie. Pa tym miry, nahadajem, Praha sastupała nacystam Sudety (anałah Kryma i Danbasa va Ukrainie). A krokam numar dva była paśla likvidacyja čechasłavackaj dziaržaŭnaści z rasčlanieńniem krainy i hiermanizacyjaj, tolki «zmušanaja da miru» Čechasłavakija bolš nie mahła abaraniacca. 

Darečy, hitleraŭskaja prapahanda, jak tolki viermacht zabuksavaŭ, pačała vykarystoŭvać naratyvy, što Hiermanija choča miru, heta «suśvietny jaŭrejski kapitał», «płutakraty», «anhłasaksy» sutykajuć narody miž saboj. Heta tak nahadvaje miesedžy prapahandy rasijskaj siońnia.

Toje, što prapanoŭvała Maskva, heta byŭ nie mir, heta była hibiel dla Ukrainy, kaniec Ukrainy. Ukraina zamiest kapitulacyi dała boj. I pieramahła — pad Kijevam, pad Charkavam, pad Čarnihavam, pad Mikałajevam. Navat kali ŭjavić sabie, što Ukraina nie zdoleje advajavać Chierson ci Łuhansk i budzie vymušanaja zaklučyć mir pa stanie frontu na siońnia, heta budzie našmat bolš vyhadny mir, čym jana mahła b zaklučyć u lutym ci sakaviku. 

Mir abo pastka?

Ale ci Rasija ŭvohule da apošniaha była hatovaja na realnyja pieramovy? Ci nie prahnie Maskva imitacyi «pieramovaŭ» dla padmanu mižnarodnaj supolnaści? 

Padčas pieramovaŭ Rasii z Ukrainaj u pačatku vajny (dakładniej, imitacyi pieramovaŭ, bo pry hetym Maskva praciahvała bambić harady i rasstrelvać ukraincaŭ u Bučy) Rasija nikoli nie vyłučała kankretnych patrabavańniaŭ. Zvyčajna, kali dziaržavy viaduć pieramovy (u tym liku va ŭmovach vajny), jany majuć nabor kankretyki: naprykład, damaŭlajucca, dzie pavinna prachodzić dziaržaŭnaja miaža, pa jakich pryncypach buduć ažyćciaŭlacca paślavajennyja adnosiny pamiž dziaržavami, u jakoje miesca i kali buduć advodzicca vojski, chto pavinien kamu płacić reparacyi i hetaj dalej. 

Nijakich kankretnych patrabavańniaŭ (ni terytaryjalnych, ni ekanamičnych, ni vajennych) Rasija Ukrainie na «pieramovach» na vystaŭlała. Usio, što patrabuje Rasija ad Ukrainy, heta abstraktnyja paniaćci jak «denacyfikacyja» i «demilitaryzacyja». 

Adzinaje adnosna kankretnaje patrabavańnie Rasii — nieŭstupleńnie Ukrainy ŭ NATA. Ale stop. Nichto ni ŭ jakoje NATA Ukrainu nie kliča, dy i Ukraina nie hatovaja. Akramia taho, Rasija nie moža mieć prava vieta na spravy NATA i niezaležnych dziaržaŭ. Rasijanie śćviardžajuć, što hipatetyčny ŭstup Ukrainy ŭ NATA moža pahražać Rasii, ale navat u samim Kramli ŭ hetuju kazku nie vierać. Čamu ŭstupleńnie Finlandyi i Šviecyi ŭ błok Rasii nie pahražaje, a Ukrainy — pahražaje? Łuchta, začepka. 

Rasijanie vystaŭlajuć da ŭkraincaŭ pretenzii ŭ pytańniach histaryčnaj pamiaci i movy — ale heta ŭnutranyja spravy dziaržaŭ, takija pytańni na pieramovach pamiž dziaržavami nie vyrašajucca.

Maskva moža vykarystoŭvać pieramovy dla taktyčnaj paŭzy albo dla lehitymizacyi svaich učynkaŭ u budučyni, jak było ź Minskimi pahadnieńniami. 

Ukraina hatovaja padpisać mir choć zaŭtra, ale ź jasnaj kampramisnaj umovaj — advod rasijskich vojskaŭ na pazicyi, na jakich jany byli da 24 lutaha. Navat nie vyzvaleńnie Danbasa i Kryma, prosta kab adyšli na raniejšyja pazicyi.

Mir ci padparadkavańnie

Niama nijakich prykmiet, što Rasija maje namier padabru-pazdarovu viarnuć choć niejkija akupavanyja terytoryi — ani Krym, ani Danbas, ani Chierson. Rasija robić usio dla intehracyi hetych ziamiel u rasijskaje palityka-pravavoje i humanitarnaje pola.

Rasija adstupiła z-pad Kijeva, z-pad Sum i. sa Źmiainaha nie pa dobraj voli, a tamu što jaje vojski tam byli razhromlenyja i nieśli nieprymalnyja straty.

My dobra bačym, što i ŭ Rasii, i siarod jaje klijentaŭ-łukašystaŭ nijakich pieramien niama. Praciahvajecca šavinistyčnaja isteryka nakont «nielehitymnaści Ukrainy», pra nieabchodnaść jaje źniščeńnia jak asobnaj dziaržavy i naroda, ab jaje dałučeńni da Rasii. Asabliva ahresiŭnyja adepty kažuć «tak ukraincam i treba». Pra jakija pieramovy i davier moža iści havorka, pakul rasijskaje hramadstva chvoraje na fašyzm? 

Nie tolki ŭkrainskaje hramadstva, ale i krainy Zachadu majuć jasnaje razumieńnie, što takoje Pucin, što takoje Łukašenka i što lažyć na šalach ciapier.

Voś jak ministr zamiežnych spraŭ Hiermanii Annalena Bierbak adkazała na słovy ministra zamiežnych spraŭ Rasii Siarhieja Łaŭrova, skazanyja im 25 lipienia, što «Rasija dapamoža narodu Ukrainy pazbavicca ad antynarodnaha i antyhistaryčnaha kijeŭskaha režymu».

Heta havoryć pra namier Rasii «całkam padparadkavać sabie Ukrainu», — zajaviła Bierbak. 

«Nichto ciapier nie moža śćviardžać, što Rasieja vystupaje za niešta inšaje, akramia poŭnaha padparadkavańnia Ukrainy i jaje naroda», — skazała kiraŭnica niamieckaj dypłamatyi.

Mir — choć zaŭtra, ale padparadkavańnia Ukrainy impieryjalistyčnaj Rasii nie budzie, nie pa zubach Maskvie akazaŭsia hety arech. Paŭtoru Miunchiena 1938 hoda, na jaki spadziavalisia Maskva i Łukašenka, jaki tut apynuŭsia ŭ roli Musalini, nie adbyłosia. Naadvarot, jość usie padstavy ličyć, što vajna va Ukrainie stanie dla pucinskaj Rasii tym, čym stała dla Rasii mikałajeŭskaj rasijska-japonskaja vajna 1905 hoda. 

• 100
• 0
• 2
• 7
• 6
• 9
• 13
• 0