U Minsku admianiajucca masavyja mierapryjemstvy, u restaranach zabaronienyja paminki i viasielli, dzieciam možna nie chadzić u sadki i škoły

U Minsku zaćvierdzili płan dadatkovych mierapryjemstvaŭ pa prafiłaktycy i źnižeńni raspaŭsiudžvańnia vostrych reśpiratornych infiekcyj, u tym liku vyklikanych COVID-19. Adpaviednaje rašeńnie było pryniataje 7 krasavika Minharvykankamam, piša Tut.by.

Arhanizacyi i pradpryjemstvy

Pradpryjemstvy i arhanizacyi pavinny nie dapuskać da pracy supracoŭnikaŭ z prykmietami reśpiratornych infiekcyj.

Narady, sieminary i pasiadžeńni pavinny pravodzicca z vykarystańniem aŭdyjo- i videakanfierencyj. Vyjezd supracoŭnikaŭ u kamandziroŭki nie dapuskajecca.

Masavyja mierapryjemstvy

U biblijatekach spyniajuć pracu čytalnyja zały. U muziejach i vystavačnych kompleksach zabaraniajecca praviadzieńnie masavych mierapryjemstvaŭ.

Taksama admianiajecca praviadzieńnie vystavak, prezientacyj, kirmašoŭ i inšych mierapryjemstvaŭ.

Dziciačyja sady, škoły i VNU

Dziciačyja sady praciahnuć pracavać, ale baćki mohuć pryniać rašeńnie nie vadzić dzicia ŭ sad, pry hetym za im zachoŭvajecca miesca, a płatu nie biaruć. Pry hetym u sadkach prosiać praduhledzieć miery, nakiravanyja na «raźjadnańnie dziaciej». Supracoŭniki dziciačaha sadka pavinny abmiežavać svajo pieramiaščeńnie adnoj hrupaj.

Baćki školnikaŭ taksama majuć prava sami vyrašać, adpraŭlać svajo dzicia ŭ škołu ci nie. U škole dzieci pavinny znachodzicca tolki ŭ svaim kłasie i nie kantaktavać ź inšymi.

Inšym ustanovam adukacyi i VNU rekamiendavana pierajści na dystancyjnaje navučańnie ci zaniatki pa indyvidualnym hrafiku. U vychadnyja studenty pavinny znachodzicca pa miescy pražyvańnia — doma ci ŭ internacie, i nie pakidać jaho. U internaty zabaronieny ŭvachod dla starońnich. Spartabjekty navučalnych ustanoŭ nielha naviedvać starońnim.

Damy-internaty i haścinicy

U damach-internatach dla sastarełych i invalidaŭ uvodzicca zabarona na naviedvańni. Piersanał i žychary pavinny vykarystoŭvać maski.

U haścinicach administracyja pavinna zabiaśpiečyć zasialeńnie z maksimalnym addaleńniem — na roznych pavierchach, u roznych kancach kalidora. U pastajalcaŭ pavinny štodnia cikavicca stanam zdaroŭja i vymiarać tempieraturu.

Hramadskaje charčavańnie

U abjektach hramadskaha charčavańnia stały pavinny stajać na adlehłaści adzin ad adnaho nie mienš za 1,5 mietra. Taksama patrabujecca zabiaśpiečyć pierapynak nie mienš za 60 chvilin dla praviadzieńnia dezynfiekcyi pamiaškańniaŭ i abstalavańnia.

Zakaznyja mierapryjemstvy (karparatyvy, paminki, viasielli i inš.) pavinny być admienienyja.

Dezynfiekcyja

U padjezdach žyłych damoŭ treba pravodzić uborku z vykarystańniem myjnych i srodkaŭ dezynfiekcyi: pavinny apracoŭvacca dźviarnyja ručki, poručni, vyklučalniki, panel kiravańnia liftam.

Hramadski transpart taksama pavinien prachodzić abaviazkovuju dezynfiekcyju.

• 0
• 0
• 0
• 0
• 0
• 0
• 0
• 0