Nichto z aŭtaraŭ «Rehnuma» nie pryznaŭ vinu ANŁAJN z suda
18 śniežnia ŭ Minskim haradskim sudzie pačaŭsia praces pa spravie aŭtaraŭ prarasijskaha internet-resursu Regnum, jakich vinavaciać u raspalvańni mižnacyjanalnaj varožaści. Heta hramadzianie Biełarusi Juryj Paŭłaviec, Dźmitryj Alimkin i Siarhiej Šyptenka.
Skončyŭsia pieršy dzień razhladu kryminalnaj spravy nad prarasijskimi publicystami Juryjem Paŭłaŭcom, Dźmitryjem Alimkinym i Siarhiejem Šyptenkam. Usich ich abvinavačvajuć u raspalvańni mižnacyjanalnaj varožaści. Paŭłaŭca i Šyptenku jašče — u niezakonnnaj pradprymalnickaj dziejnaści. Paŭłaviec niezakonna atrymaŭ bolš za 40 tysiač rubloŭ, Šyptenka — bolš za 22 tysiačy. Hrošy pieravodzilisia z Rasii, jak hanarary za publikacyi. Nichto z abvinavačanych svajoj viny nie pryznaŭ navat častkova. 19 śniežnia a 10:00 praces uznovicca.
Što viadoma pra fihurantaŭ spravy?
Juryju Paŭłaŭcu 37 hadoŭ. Pavodle adukacyi jon historyk, pracavaŭ dacentam katedry humanitarnych dyscyplin u Biełaruskim dziaržaŭnym universytecie infarmatyki i radyjoelektroniki (BDUIR). Pra jaho pišuć, što jon adznačaŭsia radykalnymi prarasiejskimi pohladami, drukavaŭsia na takich rasiejskich sajtach, jak Regnum, «Zapadnaja Ruś», «Ruspravda» i niaredka krytykavaŭ biełaruskija ŭłady za spryjańnie «nacyjanalizmu».
45-hadovy žychar Bieraścia Dźmitry Alimkin — vypusknik Akademii kiravańnia pry prezydencie Biełarusi. Da zatrymańnia ŭ śniežni 2016 hodu Dźmitry Alimkin pracavaŭ vartaŭnikom u škole i rehularna pisaŭ artykuły na rasiejskija imperskija sajty. Na sajcie Regnum jon vystupaŭ pad pseŭdanimam «Ała Broń». Mienavita pad hetym imiem 25 kastryčnika byŭ apublikavany materyjał, dzie Biełaruś nazyvałasia «zvarjaciełaj niedadziaržavaj», a biełaruski akcent — «prykmietaj nizkaha pachodžańnia».
Siarhiej Šyptenka, jak i Dźmitry Alimkin, — vypusknik Akademii kiravańnia pry prezydencie Biełarusi. U internecie Šyptenka časam padpisvaŭsia pseŭdanimam Artur Hryhorjeŭ, ale na sajcie Regnum vystupaŭ pad ułasnym proźviščam. Voś što paviedamiła pra Siarhieja Šyptenku hazeta «Naša Niva» nieŭzabavie paśla jaho zatrymańnia ŭ kancy 2016 hodu: «Čyrvonaj stužkaj praź jaho publikacyi prachodziła ideja ab «separatnym» charaktary biełaruskaj dziaržaŭnaści i patrebie «ŭźjadnańnia» z Rasiejaj. Sioletni «Dzień vyšyvanki» ŭ Miensku Šyptenka paraŭnaŭ z prymusovymi mierapryjemstvami časoŭ niamieckaj akupacyi». «Dalej padać niama kudy. Albo my adnovim krainu, uźjadnajemsia i adrodzimsia, albo budziem praklatyja nazaŭždy, zahiniem u pakutach i staniem hnojem», — cytavała biełaruskamoŭnaje vydańnie karespandenta rasiejskaha ahienctva Regnum.
Staršynia BAŽ: «Svaboda słova — taksama kaštoŭnaść»
Krytyčna stavicca da spravy aŭtaraŭ Regnum staršynia Biełaruskaj asacyjacyi žurnalistaŭ Andrej Bastuniec, jaki nazyvaje jaje «vidavočnym abmiežavańniem svabody vykazvańnia».
«Nam mohuć vielmi nie padabacca ich mierkavańni, jany mohuć supiarečyć našym kaštoŭnaściam, ale ž svaboda słova — heta taksama kaštoŭnaść, i zabyvać pra heta nielha», — kaža staršynia BAŽ Andrej Bastuniec.
Pavodle Andreja Bastunca, BAŽ budzie ŭvažliva sačyć za pracesam nad aŭtarami Regnum. Spravaj Juryja Paŭłaŭca, Dźmitryja Alimkina i Siarhieja Šyptenki zacikaviłasia taksama mižnarodnaja žurnalisckaja arhanizacyja «Repartery biaź miežaŭ».
Pravaabaroncy: Ich varta razhladać jak kandydataŭ u palitviaźni
Źbirajucca ŭvažliva sačyć za pracesam u Mienharsudzie i biełaruskija pravaabaroncy. Juryst «Viasny» Valancin Stefanovič napiaredadni sudu nie vyklučaŭ, što pa vynikach pracesu aŭtaraŭ Regnum daviadziecca pryznać palitviaźniami.
«Treba budzie adkazać na pytańnie, ci padpadaje heta pad dapuščalnaje abmiežavańnie svabody vykazvańnia dumak, ci nie padpadaje. Kali nie padpadaje, dyk heta budzie ličycca palityčnym pieraśledam. Nam mohuć nie padabacca ichnija idei, my možam ich absalutna nie padtrymlivać, ale heta nie aznačaje, što za ich treba sadžać u turmu», — kazaŭ Valancin Stefanovič.
Zastupiłasia rasiejskaje MZS
Sioleta ŭ kastryčniku, kali stała viadoma pra nakiravańnie spravy aŭtaraŭ Regnum u sud, za ich zastupiłasia rasiejskaje Ministerstva zamiežnych spraŭ.
«My chacieli b zaklikać biełaruski bok maksymalna adkazna padychodzić da razhladu dadzienaj kryminalnaj spravy, u strohaj adpaviednaści z uziatymi na siabie Biełaruśsiu abaviazańniami, najpierš u planie zachavańnia svabody vykazvańnia mierkavańniaŭ», — kazała pradstaŭnica rasiejskaha MZS Maryja Zacharava.
Na Juryja Barančyka zaviali asobnuju spravu
Jašče adzin fihurant spravy, šef-redaktar Regnum Jury Barančyk, na zapyt biełaruskaha boku byŭ zatrymany ŭ sakaviku 2017 hodu ŭ Maskvie, ale nieŭzabavie jaho vyzvalili. Jak paźniej paviedamiła Cvabodzie pradstaŭnica Śledčaha kamitetu Biełarusi Julija Hančarova, sprava suprać Juryja Barančyka vydzielenaja ŭ asobnuju vytvorčaść, jon zastavaŭsia ŭ vyšuku, z Rasiei jaho tak i nie departavali ŭ Biełaruś.
Praces nad Juryjem Paŭłaŭcom, Dźmitryjem Alimkinym i Siarhiejem Šyptenkam budzie adkryty. U Mienharsudzie čakajuć, što na praces pryjdzie šmat žurnalistaŭ, pravaabaroncaŭ i pradstaŭnikoŭ hramadzkaści, u tym liku adnadumcaŭ aŭtaraŭ Regnum.
«A što ŭ vas za prablemy? Daloka da Minska ci niama kamu padvieźci?» Publičnaja pikiroŭka Łukašenki i Pašyniana13
Kamientary