Vyprabavany pieršy lift biez trosaŭ, jaki ruchajecca viertykalna i haryzantalna
Mižnarodny kanhłamierat ThyssenKrupp 22 červienia prezientavaŭ pieršy ŭ śviecie lift Multi biez trosaŭ, jaki ruchajecca pa pryncypie mahleva. Hety lift padarožničaje pa pavierchach budynka, a taksama pa kalidorach u haryzantalnym kirunku, piša Wired.
Tower of Light — adzin z samych vysokich chmaračosaŭ Hiermanii. Hety 246-mietrovy bietonny hmach koštam €60 młn adnačasova źjaŭlajecca testavym palihonam dla samych sučasnych technałohij liftabudavańnia. U budynku pieršapačatkova praduhledžana 12 šacht śpiecyjalna dla vyprabavańnia liftaŭ.
U lifcie Multi ŭstanoŭleny liniejnyja ruchaviki, anałahičnyja tym, što pracujuć u mahlevie i ciahnikach HyperLoop. Na videa pakazana, jak kabina ruchajecca ŭzdoŭž rejki, a na pavarocie rejka pavaročvajecca na 90° — i lift moža źmianić kirunak ruchu ź viertykalnaha na haryzantalny ci naadvarot. Pavarot zajmaje niekalki siekund, a maksimalnaja chutkaść lifta składaje kala 5 m/ s.
Inžyniery ThyssenKrupp spadziajucca, što inavacyjny lift paśpiachova prajavić siabie padčas praciahłaj ekspłuatacyi, i tady takija lifty možna budzie ŭstaloŭvać i ŭ inšyja budynki va ŭsim śviecie. A heta nie prosta zručna dla pasažyraŭ — heta źmienić sami pryncypy architektury budynkaŭ, bo architektary nie buduć abmiežavanyja viertykalnaj aryjentacyjaj liftavych šacht, vakoł jakich budujecca ŭsia astatniaja płaniroŭka. A, kali źmienicca abličča chmaračosaŭ, źmienicca i abličča haradoŭ.
Kamientary