Deputat Pałaty pradstaŭnikoŭ moža mieć da piaci pamočnikaŭ. Heta značyć, što apazicyja moža atrymać nie dvuch, a dvanaccać čałaviek, jakija vałodajuć asablivym statusam. Status pamočnika nie roŭny sa statusam deputata, ale ŭsio ž adroźnivajecca ad statusu prostaha hramadzianina. Što viadoma pra pamočnikaŭ Aleny Anisim i Hanny Kanapackaj, piša «Biełaruski partyzan».

Alena Anisim raspaviała «Biełaruskamu partyzanu», što ŭ jaje na hety momant try pamočniki.

Adzin ź ich na staŭcy. Heta juryst Mikałaj Novik sa Stoŭbcaŭ, jon viadzie pryjom hramadzian dvojčy na tydzień. Dvoje inšych — siabry TBM braty Kačanovičy, Anatol i Leanid. Anatol Kačanovič były dyrektar škoły, žyvie ŭ pasiołku Kołasava. Leanid Kačanovič z pasiołka Haradzieja Niaśvižskaha rajona, pracuje ŭ miascovym ŽKH.

Situacyja z pamočnikami Hanny Kanapackaj pakul nie vyśvietliłasia.

Pavodle «Biełaruskaha partyzana», viaducca pieramovy pra toje, kab pamočniki pradstaŭlali ŭsiu pravacentrysckuju kaalicyju, u jakuju ŭvachodziać ruch «Za Svabodu», Abjadnanaja hramadzianskaja partyja i arhkamitet pa stvareńni partyi «Biełaruskaja chryścijanskaja demakratyja».

Ale pakul viadoma tolki adno proźvišča — Volhi Kavalkovaj, eks-kandydata ŭ deputaty ad BCHD pa 103-j Dambroŭskaj vybarčaj akruzie ŭ Minsku. Volha pracuje biez «korački pamočnika», jak skazaŭ Vital Rymašeŭski. Zrešty, palityk zapeŭniŭ, što heta nie pryncypova — jość «koračka» ci nie. Adsutnaść paśviedčańnia jon patłumačyŭ składanaj praceduraj ŭzhadnieńnia i šmatlikimi pravierkami, u tym liku pa linii śpiecsłužbaŭ.

Ruch «Za Svabodu» infarmacyju ahučvać pakul admaŭlajecca, spasyłajučysia na toje, što iduć pieramovy.

Sama Hanna Kanapackaja patłumačyła, što nie maje pakul aficyjnych pamočnikaŭ. Pavodle deputata, źviazana heta «ź vielmi zaciahnutaj praceduraj pravierki dakumientaŭ i afarmleńnia na dadzienuju pasadu». Imiony kandydataŭ u pamočniki jana nie chacieła b nazyvać da aficyjnaha paćviardžeńnia ich statusu. Kaža, što ŭ pracy joj zaraz dapamahaje kamanda aktyvistaŭ AHP.

Клас
0
Панылы сорам
0
Ха-ха
0
Ого
0
Сумна
0
Абуральна
0