Sa sportu ŭ Administracyju prezidenta: piać faktaŭ pra Maksima Ryžankova
Pamočnik Alaksandra Łukašenki pa pytańniach sportu, a taksama vice-prezident Nacyjanalnaha alimpijskaha kamiteta Maksim Ryžankoŭ pryznačany pieršym namieśnikam kiraŭnika Administracyi prezidenta. «Naša Niva» sabrała cikavyja fakty pra čynoŭnika.
Baćka byŭ ministram sportu
Maksim Ryžankoŭ naradziŭsia ŭ 1972 hodzie ŭ Minsku. Jahony baćka, uradženiec Dobruša, u hety samy hod skančaŭ Biełaruski dziaržaŭny instytut fizičnaj kultury.
Pa skančeńni VNU Uładzimir Ryžankoŭ zastaŭsia tam vykładać. Paśla pačaŭ budavać karjeru pa partyjnaj leśvicy. Ad 1979 pracavaŭ u kamitecie fizičnaj kultury i sporcie pry Saviecie ministraŭ BSSR. Ad 1990 Ryžankoŭ-starejšy faktyčna kuryravaŭ uvieś sport u respublicy. Pa atrymańni niezaležnaści jon staŭ pieršym ministram sportu Biełarusi, a taksama pieršym kiraŭnikom Nacyjanalnaha alimpijskaha kamiteta (druhim budzie Alaksandr Łukašenka).
Uładzimir Ryžankoŭ raptoŭna pamior 12 śniežnia 1996 hoda, u 51 hod. Tady jakraz išoŭ razbor vystupleńnia nacyjanalnaj zbornaj na letniaj Alimpijadzie ŭ Atłancie. Ministra vielmi žorstka ŭ toj čas krytykavała hazieta «Priessboł». «Apošnija hady my vielmi siabravali, byli ŭ davierlivych adnosinach. Ciapier mnohija kažuć, što ja zahnaŭ jaho ŭ mahiłu. Mnie heta vielmi kryŭdna», — kazaŭ były redaktar «Priessboła» Uładzimir Bieražkoŭ.
«U siamji baćka zaŭsiody byŭ «dobrym palicejskim». To bo, heta była apošniaja instancyja, jakaja rasstaŭlała usie kropki nad i. Jon moh i mamu supakoić, pierakanać, što taja ci inšaja prablema nie vartaja takich pieražyvańniaŭ. Jaho ž samoha vyvieści z raŭnavahi zdolnyja byli tolki sapraŭdy surjoznyja momanty, što, na ščaście, zdarałasia redka», — uzhadvaŭ Maksim.
Maci Ryžankova, Branisłavy Francaŭny, užo taksama niama ŭ žyvych.
Dypłamatyčnaja karjera
Maksim Ryžankoŭ skončyŭ jurydyčny fakultet BDU, adnak karjeru pačaŭ budavać pa dypłamatyčnaj linii. Ad 1994 Ryžankoŭ na słužbie ŭ centralnym aparacie MZS.
«Nichto nie ŭzhadaje mianie jak «tatavaha synka», — kazaŭ Maksim pra kaleh u MZS. Zrešty, mienavita baćka prapanavaŭ jamu schadzić u ministerstva, pasprabavać uładkavacca na praktyku, choć sam Maksim maryŭ być prakurorskim rabotnikam, a nie dypłamatam.
«Byŭ 1993 hod, išło stanaŭleńnie biełaruskaj dziaržaŭnaści. Adčuvańnie adzinaj dypłamatyčnaj siamji, poŭnaj navizny, kali ŭsie pracavali načami napralot, kab padrychtavać pieršy ŭ tvaim žyćci vizit, pieršy dakumient, pieršaje pahadnieńnie. Ja vielmi mocna zaraziŭsia hetym i ni razu potym nie paškadavaŭ», — uzhadvaŭ spadar Ryžankoŭ.
U 1996 hodzie jaho adpravili supracoŭnikam pasolstva Biełarusi ŭ Izraili. A z 2003 da 2005 Ryžankoŭ pracavaŭ u pasolstvie ŭ Varšavie.
Zrešty, pa dypłamatyčnaj pracy Ryžankoŭ nie sumuje. «Žadańnia žyć za miažoj u apošni čas nie adčuvaŭ. Najeździŭsia, pabačyŭ usiakaha, viedaju, što značyć žyć udalečyni ad radzimy», — kazaŭ ciapierašni pieršy namieśnik kiraŭnika Administracyi.
Pamočnik i namieśnik Łukašenki
U dziacinstvie Maksim Ryžankoŭ zajmaŭsia baskietbołam. «Pa-pieršaje, napeŭna, z-za hienietyčnych dadzienych: z ulikam majho rostu hety vid mnie musiŭ pasavać. Pa-druhoje, baćka ličyŭ, što chłopcu nieabchodna zajmacca sportam dla ahulnafizičnaha raźvićcia, kab być mocnym i zdarovym, ale zusim nie abaviazkova stanavicca alimpijskim čempijonam. Pa-treciaje, baćka ŭ svoj čas zajmaŭsia baskietbołam i viedaŭ, što heta adzin z samych roznabakovych vidaŭ sportu», — kazaŭ Ryžankoŭ.
Adnak potym jahonaje žyćcio sa sportam nijak nie pierasiakałasia. Vosieńniu 2012 hoda Ryžankova niečakana pryznačyli pamočnikam prezidenta pa pytańniach sportu.
Sam Maksim skazaŭ, što ad prapanovy da pryniaćcia rašeńnia prajšło mienš za sutki. «Dla mianie heta byŭ vielmi składany krok», — kazaŭ čynoŭnik.
Praź niejki čas, paśla taho jak Ihara Račkoŭskaha adpravili ŭ chakiej, Ryžankoŭ staŭ vice-prezidentam u Nacyjanalnym alimpijskim kamitecie, jaki ŭznačalvaje sam Alaksandr Łukašenka.
Pry Ryžankovu Biełaruś udzielničała ŭ dźviuch Alimpijadach. Zimovaja ŭ Sočy, dziakujučy bliskučamu vystupu Darji Domračavaj, stała samaj udałaj u historyi Biełarusi. A voś sioletniaja letniaja Alimpijada ŭ Rya, naadvarot, była samaj niaŭdałaj. Łukašenka niekalki razoŭ krytyčna vykazvaŭsia ab vystupie atletaŭ, ale tak i nie pravioŭ naradu z razboram palotaŭ.
A jašče pry Ryžankovu Biełaruś dabiłasia praviadzieńnia Druhich Jeŭrapiejskich hulniaŭ. Profit ad hetaj padziei dastatkova sumnieŭny, zatoje možna dasiahnuć ideałahičnaha efiektu.
Viadzie tvitar
Maksim Ryžankoŭ — adzin ź niamnohich vysokich čynoŭnikaŭ, chto viadzie aktyŭny akaŭnt u sacyjalnych sietkach. Pamočnik prezidenta piša ŭ tvitar. Letam Ryžankoŭ «razmazaŭ» alimpijskaha miedalista, šmatborca Andreja Kraŭčanku. Kraŭčanka pakrytykavaŭ praviadzieńnie ŭ Minsku Jeŭrapiejskich hulniaŭ i sistemu padrychtoŭki atletaŭ.
Na heta Ryžankoŭ zaŭvažyŭ: «Inšym razam treba lepš treniravacca, a nie havaryć… Jak bač, i na Alimpijskija hulni adbiarešsia».
Inohda nado łučšie trienirovaťsia, čiem hovoriť... Smotriš, i na Olimpijskije ihry otbieriešsia... https://t.co/yJWwWlhPVq
Ryžankoŭ krytykavaŭ spartoŭcaŭ, jakija ŭžyvajuć dopinh: «Kali prezident daviedajecca, što niechta prymianiaje zabaronienyja preparaty, to ŭ atleta buduć vielmi vialikija prablemy».
Novy pieršy namieśnik Administracyi prezidenta da niadaŭniaha času žyŭ u trochpakajovaj vialikaj kvatery na praśpiekcie Pieramožcaŭ nasuprać steły «Minsk — horad-hieroj», jakaja zastałasia ad baćki. Ale niadaŭna pierajechaŭ za horad. «Ciapier na rovary na rabotu nie pajeździš», — sumavaŭ Ryžankoŭ.
U šlubie ź pieršaj žonkaj Paŭła Łatuški
Maksim Ryžankoŭ u šlubie z 43-hadovaj Natallaj. U pary jość dačka Uładzisłava, joj 8 hadoŭ. Natalla rodam ź Minska, jana skončyła bijałahičny fakultet BDU. Jaje dziavočaje proźvišča Mińko.
Admietna, što pieršym mužam Natalli Ryžankovaj byŭ ciapierašni pasoł Biełarusi ŭ Francyi Pavieł Łatuška. U ich jość dačka Jana, jakaja žyvie z baćkam. Ryžankoŭ u pieryjad ad 2002 da 2005 akurat pracavaŭ u padnačaleńni Łatuški. Pavieł Łatuška byŭ pasłom Biełarusi ŭ Polščy, a Maksim Ryžankoŭ — daradcam u pasolstvie.
U Maksima Ryžankova taksama jość siastra Darja. Jana žyvie ŭ Francyi, jaje syna zavuć Teador.
Chto jašče pracavaŭ pieršym namieśnikam kiraŭnika Administracyi prezidenta:
- Michaił Sazonaŭ (1995—1997)
- Uładzimir Rusakievič (1997—2000)
- Uładzimir Zamiatalin (2000—2001)
- Stanisłaŭ Kniazieŭ (2001—2003)
- Alaksandr Papkoŭ (2003—2006)
- Anatol Rubinaŭ (2006—2008)
- Natalla Piatkievič (2009—2010)
- Alaksandr Radźkoŭ (2010—2014)
- Kanstancin Martyniecki (2015—2016)
- Maksim Ryžankoŭ (2016 — da ciapierašniaha času)
Natalla Kačanava stała kiraŭnikom Administracyi prezidenta, Maksim Ryžankoŭ — jaje namieśnikam
Pad Varšavaj trahična zahinuŭ 31-hadovy biełaruski ravaryst Alaksandr Pustavitaŭ1
Kamientary