Хунта Нігера запрасіла ПВК «Вагнер» у краіну
Па інфармацыі журналіста France 24, адзін з лідараў прарасійскіх путчыстаў Нігера прыехаў у суседні Малі, дзе знаходзіцца адна з асноўных баз ПВК «Вагнер» у Афрыцы, каб прасіць іх аб дапамозе ў абароне хунты.
02.08.2023 / 20:37
Путчысты на чале з генералам Амарам Чыяні (другі справа), якія днямі захапілі ўладу ў Нігеры. Фота: Anadolu Agency / Getty Images
Адразу некалькі крыніц з Малі паведамілі, што да іх прыехаў адзін з лідараў прарасійскай вайсковай хунты Нігера, якая нядаўна захапіла ўладу ў краіне. Мэтай гэтага візіту з'яўляюцца перамовы аб хутчэйшым разгортванні наймітаў ПВК «Вагнер» у Нігеры на фоне магчымага ваеннага ўварвання ў краіну з боку празаходніх сілаў ў Афрыцы.
Як адзначае журналіст выдання France 24 Васім Наср, прадстаўніком путчыстаў на перамовах у Малі з'яўляецца генерал Саліфу Модзі, намеснік Амара Чыяні, галоўнага кіраўніка хунты Нігера.
Нагадаем, што Малі — адзін з галоўных апорных пунктаў «Вагнера» ў Афрыцы. У гэтай краіне ў 2021 годзе адбыўся такі самы прарасійскі вайсковы пераварот, лідары якога адразу ж выгналі адтуль французскую армію і затым запрасілі вагнераўцаў.
Сённяшняя колькасць расійскіх наймітаў у Малі ацэньваецца ад некалькіх сотняў да некалькіх тысяч чалавек.
Між тым, ужо прайшло некалькі дзён з моманту абвяшчэння ўльтыматуму вайсковай хунце Нігера, які зрабілі адразу некалькі краін Заходняй Афрыкі з падтрымкай ЗША, Вялікабрытаніі і Еўрасаюза.
Згодна з ультыматумам, путчыстам дадзены роўна тыдзень на вызваленне прэзідэнта Нігера і аднаўленне канстытуцыйнага ладу краіны. У адваротным выпадку можна чакаць поўнамаштабнага вайсковага ўмяшання з боку празаходніх сіл у Афрыцы.
Чытайце таксама:
У Пентагоне пракаментавалі інцыдэнт з беларускімі верталётамі, што заляцелі на тэрыторыю Польшчы
Вагнераўцы ўзводзяць фартыфікацыі на палігоне «Рэпішча» пад Асіповічамі. Спадарожнікавы здымак