Biełarusy stvaryli bot, jaki dapamoža adšukać paviedamleńni ŭ čatach. Voś jak jon pracuje i čamu heta važna dla biaśpieki
Siońnia hrupa hrodzienskich pravaabaroncaŭ prezientavała bot, jaki šukaje vašy kamientary ŭ roznych čatach i padkazvaje, jak ich vydalić.
24.07.2023 / 21:37
Što heta za bot i dla čaho jon stvorany?
Telehram-bot «Maje paviedamleńni ŭ čatach» znachodzić vašy paviedamleńni ŭ roznych čatach i prapanuje vam, jak ich možna vydalić. Paviedamleńni šukajucca pa «pratesnych» čatach, jakija stvaralniki bota ŭnieśli ŭ svaju bazu. Kali zapuścić bot, možna adšukać paviedamleńni tolki svajho akaŭnta.
Pravaabaroncy ź inicyjatyvy «Sudy i zatrymańni. Hrodna i vobłaść» raskazvajuć, jak uźnikła ideja z botam.
«My źbirajem danyja ab palityčna matyvavanych sudach i vyvučajem, za što sudziać. U niejki momant nam stała cikava, jak šmat u čatach ludziej sa skampramietavanymi akaŭntami — i my praskanavali adzin z haradskich čataŭ, dzie adrazu znajšli bolš za sotniu padobnych akaŭntaŭ. My znajšli sposab atrymlivać paviedamleńni praktyčna z usich pratesnych čataŭ i supołak z kamientarami na kanałach, asabliva z tych, što ŭniesienyja ŭ śpisy «ekstremisckich», a z časam padumali, što možam dać usim achvotnym mahčymaść znachodzić svaje paviedamleńni dla ačystki.
My taksama dumali, ci jość ryzyki ad publičnaści takoha bota, ale vyrašyli, što možna zrabić jaho publičnym, bo ŭ siłavikoŭ i tak užo jość niekatoryja padobnyja pryłady (naprykład, svaja baza nazapašanych paviedamleńniaŭ i boty nakštałt «Mahnita», ź jakimi jany hladziać id akaŭntaŭ zatrymanych)».
Jak karystacca botam?
Kali vy aktyvujecie bot, jon pakaža vam čaty, u jakich jon zaŭvažyŭ vašy paviedamleńni, a taksama ichniuju kolkaść.
Paviedamleńnie z bota, jakoje pakazvaje, kolki paviedamleńniaŭ jon adšukaŭ i ŭ jakich čatach
Paśla źjavicca instrukcyja taho, jak vydalić paviedamleńni i śpis čataŭ, u jakija treba pierajści. A taksama śpis čataŭ kanałaŭ.
Instrukcyja ad bota pa vydaleńni kamientaroŭ
Pakažam, jak heta pracuje na prykładzie kanała «Biełaruś hałaŭnoha mozhu». Nielha pierajści ŭ čat adrazu — spačatku naciśnicie na spasyłku na kanał i naciśnicie na nazvu źvierchu. Paśla adkryjecca mieniu kanała, naciśnicie tam na ikonku dyjałohu.
«Šapka» kanała «Biełaruś hałaŭnoha mozhu». Naciśnicie tut sini łahatyp dyjałohu, kab pierajści ŭ čat
Paśla taho, jak vy pierajšli ŭ čat, naciśnicie na try kropki ŭ pravym vierchnim kucie.
Šapka z hrupy kanała «Biełaruś hałaŭnoha mozhu»
Abiarycie ŭ mieniu, jakoje vypadzie, «Pošuk». Dalej abiarycie značok z čałaviekam i łupaj.
Nižniaje mieniu, kali vy nacisnuli «Pošuk». Naciśnicie na značok čałavieka z łupaj
Paśla ŭviadzicie vaš niknejm (pry pošuku jon adlustrujecca pieršym — možna prosta na jaho nacisnuć). Vam pakažuć usie vašy paviedamleńni.
Naciśnicie na kožnaje doŭhim naciskańniem. Paśla naciśnicie značok «Śmietnicy». Paćvierdzicie vydaleńnie.
U bocie pracujuć taksama funkcyi paŭtornaha pošuku paviedamleńniaŭ i prahladu ich unutry braŭziera.
Paśla vydaleńnia ŭsich kamientaroŭ stvaralniki rajać vydalić akaŭnt (bo kamientary, naprykład, mohuć być raniej zachavanyja siłavikami). My ŭžo raspaviadali, jak zarehistravać novy ananimny akaŭnt.
Ad čaho heta nie dapamoža?
Mahčymaja situacyja, kali vaš akaŭnt byŭ identyfikavany raniej śpiecsłužbami.
Taksama nie fakt, čto čat-bot zachapiŭ usie čaty, u jakija vy pisali, asabliva zakrytyja. Vy možacie ekspartavać vašy paviedamleńni ŭ zakrytych čatach, kali jany nie byli vydalenyja raniej. Kali hrupa była vydalenaja abo stała zakrytaj paśla taho, jak vy vyjšli, a taksama kali vy ŭ joj zabanienyja, to vydalić kamientary nie atrymajecca. Tamu važna vydalać paśla akaŭnt.
Čytajcie taksama:
Kotatogram: hubazikaŭcy pakazali, jak jany analizujuć pratesnyja čaty. Voś što varta viedać
Tłumačym, jakim čynam siłaviki znachodziać karystalnikaŭ Telegram i jak hetaha paźbiehnuć