Kałaž: Financial Times

Kałaž: Financial Times

Niadaŭna my pisali pra toje, jak pravilna pačyścić miesiendžary i abaranić sacyjalnyja sietki. Ciapier nadyšoŭ čas raskazać, jak nie dać znajści vas u Telegram.

Jakim čynam pracuje Telegram?

Kali vy rehistrujeciesia ŭ miesiendžary, vykarystoŭvajučy vaš numar telefona, za kožnym akaŭntam zamacoŭvajecca ID. Heta «radnić» jaho z sacyjalnymi sietkami kštałtu Facebook abo «Ukantakcie».

Kožnaha razu, kali vy ździajśniajecie dziejańnie, vy pakidajecie niejkuju častku svaich danych. Da prykładu, kali vy pišacie ŭ čat, to siłaviki atrymlivajuć datu napisańnia paviedamleńnia, ID, imia i vaš juziernejm. Hetyja danyja atrymlivajuć abodva baki, heta značyć, jak vy, tak i vaš surazmoŭca abo ŭsie členy hrupy.

Važna zrazumieć, što Telegram dazvalaje atrymać ID luboha ŭdzielnika čata, luboha surazmoŭcy i luboha karystalnika bota, kali jon naležyć siłavikam ci byŭ uzłamany. ID pryviazany da akaŭnta i źmianić jaho nielha, nie źmianiajučy akaŭnt, a taksama jon zastajecca ŭ vydalenych akaŭntaŭ.

Ale jak pa hetych danych možna znajści čałavieka? I jak źmienšyć imaviernaść hetaha?

Sposab №1: pa infarmacyi, jakuju jany ŭžo majuć

Siłaviki mohuć pravieryć ID karystalnika pa ŭžo isnujučaj u ich bazie. Jak jaje napaŭniajuć, vy zrazumiecie paźniej, ale nazyvajecca jana «T-Poisk». Kali vaš ID z danymi pra vas užo jość u bazie, to znajści vas — sprava pary chvilinaŭ.

Sposab №2: pa numary telefona

Luby karystalnik, jaki zarehistravaŭ akaŭnt na biełaruski numar telefona, patencyjna ŭraźlivy.

Pa-pieršaje, hihanckija bazy źviazak ID-telefon byli sabranyja ŭ toj čas, kali luboha karystalnika možna było znajści pa numary. Takaja mahčymaść źjaviłasia ŭ 2019 hodzie.

Nie jasna, jaki abjom tych bazaŭ, ale patencyjna luboha karystalnika možna znajści, kali jahony akaŭnt stvorany da 2020 hoda.

Nakolki viadoma, źbiralisia danyja, uklučna z fota i telefonami, usich karystalnikaŭ jašče ŭ samim 2020 hodzie, kali ludzi biaśpiekaj nie pierajmalisia. Kali akaŭnt nie mianiaŭsia, to nie važna, ci schavali vy niejkija paramietry — vy ŭžo ŭraźlivy.

Pa-druhoje, kali vy stvarajecie novy akaŭnt i čałaviek u vašych kantaktach, to jamu aŭtamatyčna prychodzić paviedamleńnie takoha vyhladu, jakoje niemahčyma adklučyć:

Tearetyčna, siłaviki mohuć składać śpisy novych rehistracyj na biełaruskija numary. I heta vialikaja niebiaśpieka.

Praviła №1: vaš akaŭnt lepš zarehistravać na niebiełaruski numar. Jaho vy možacie paprasić u siabroŭ za miažoj abo tanna nabyć na siervisie virtualnych numaroŭ (lepš taksama ź niebiełaruskaj kartki). Heta nie dazvolić na raz-dva znajści vaš akaŭnt.

Jak zarehistravać ananimnyja akaŭnty ŭ Telegram, sacsietkach i inšych miesiendžarach — padrabiazny hajd

Praviła №2: adrazu paśla rehistracyi ŭstalujcie maksimalnuju pryvatnaść akaŭnta. U naładach heta musić vyhladać tak:

Praviła №3: varta rehularna vydalać i stvarać nanova vaš akaŭnt — raz na niejki čas, skažam, na miesiac abo na dva miesiacy. Heta ŭskładnić identyfikacyju i katałahizacyju karystalnikaŭ telehram. Kali vaš akaŭnt stary (to-bok, jamu bolš za hod ci navat jon stvorany da pratestaŭ), to vam dakładna treba źmianić jaho.

Praviła №4: budźcie pilnyja i pastajanna dumajcie pra toje, što vy robicie ŭ sietkach uvohule — ci vartaje jano mahčymaj adkaznaści.

Rekamiendacyja: možacie stvaryć jak minimum dva akaŭnty — rabočy i «aktyviscki». Z rabočaha padpišyciesia na nie zabaronienyja ŭ Biełarusi resursy, a taksama stasujciesia z kalehami i siabrami. Z «aktyvisckaha» rabicie, što ličycie patrebnym, ale nie zabyvajciesia pra pieryjadyčnaje vydaleńnie akaŭnta.

Parada: pasprabujcie vykarystoŭvać Partyzanski Telehram (dla kampjutara, dla Android). Jon dazvolić vam nie pakazvać «asnoŭny» akaŭnt, vychodziačy ź jaho pry ŭviadzieńni parola. Apisańnie mahčymaściaŭ tut. Niadaŭna prahrama, raspracavanaja «Kibierpartyzanami», prajšła aŭdyt koda u Ročesterskim instytucie technałohij, jaki paćvierdziŭ jaje nadziejnaść i biaśpiečnaść.

Sposab 3: pa historyi źmianieńnia imia akaŭnta

Samy prosty sposab — pravieryć, ci nie nazyvaŭsia čałaviek niekali svaim imiem. Pryčym heta pracuje navat dla vydalenych akaŭntaŭ. Dla siłavikoŭ heta mocnaja začepka.

Heta nastupstva taho, što ID akaŭnta nie mianiajecca i kali prosta zachoŭvać źviazku ID-imia-juzierniejm, to možna adsačyć historyju akaŭnta. Taksama dla hetaha raniej siłaviki masava dadavali ludziej u kantakty.

Da žniŭnia 2020 hoda ludzi nie nadta pierajmalisia zachavańniem ananimnaści ŭ telehramie, tamu kali akaŭnt stary ci vy choć niekali zvalisia ŭłasnym imiem, to chutčej za ŭsio vas mahčyma znajści.

Siłaviki mohuć dziejničajuć tak: znajści karystalnika, jakoha chočuć «zdeanonić», a paśla «prabić» jaho pa viadomych bazach. U ich jość ułasnaja baza akaŭntaŭ, jakaja nazyvajecca «T-Poisk», taksama jany karystajucca płatnymi botami dla «prabivu».

Sposab №4: pa juziernejmie

Tut usio vielmi prosta — kali vy vykarystoŭvajecie vaš juziernejm jašče na niejkim sajcie, akramia telehrama, to jaho možna znajści. Navat kali vy rabili tak niekali, ale paśla «vypravilisia» na tym ža akaŭncie.

Dla hetaha isnuje viadomy instrumient Maigret, nazvany ŭ honar piersanaža Žorža Simianona kamisara Žula Miehre. Jon dazvalaje šukać imia karystalnika siarod tysiačaŭ resursaŭ na ŭsich movach śvietu.

Dziela ekśpierymientu my pahladzieli sudovyja spravy niekalkich palitviaźniaŭ, jakich sudzili na adkrytych sudach za kamientary ŭ telehramie. U dvuch ź piaci vypadkova abranych ludziej my zdoleli vyśvietlić imia i proźvišča čałavieka pa źmienie imia i proźvišča, pryčym adzin akaŭnt užo byŭ vydaleny.

U adnym vypadku znajšli pryviazany telefon čałavieka i takim čynam atrymali inšuju infarmacyju. U jašče adnaho juziernejm byŭ amal taki ž samy, jak i adkryty instahram, i atrymałasia znajści jahonuju vyjavu za niekalki chvilin.

Pryčym my znajšli i inšyja sacsietki i infarmacyju pra čałavieka, nie majučy napačatku dziela čyścini ekśpierymientu ani jahonaha imia, ani jahonaha fota, tolki kamientary.

Ahułam «ekśpierymient» zaniaŭ kala 30 chvilin i my adšukali čatyroch ź piaci kamientataraŭ. 

Sposab №5: pa avatarcy

Kali ŭ telehramie ŭ vas staić vaša fota abo niejki ŭnikalny malunak — heta taksama surjoznaja začepka dla siłavikoŭ. Taki zdymak možna adšukać praz pošuk ci roznyja instrumienty, kali jon jość u vas u sacsietkach ci vy jahony aŭtar. Kali heta niejkaje miesca, to heta ŭsio roŭna daść «navodku» siłavikam — prynamsi, adkul vy, dzie padarožničali, i hetak dalej.

Praviła №5: nikoli nie nazyvajciesia svaim imiem i nie davajcie «začepak» na vašu realnuju asobu ŭ infarmacyi pra akaŭnt. Kali vy tak užo rabili raniej — vydalicie i stvarycie nanova vaš akaŭnt na niebiełaruski numar.

Sposab №6: pa infarmacyi z čataŭ

Šmat ludziej jašče ŭ 2020 hodzie pakinuli ślady svajoj dziejnaści. Časta heta adrasy žycharstva (u dvaravych čatach), imiony, hieapaznaki, navat kavałki dakumientaŭ ci fota aŭtamabilaŭ. Navat prostaja prynaležnaść da čata niejkaj vybarčaj akruhi ci doma vielmi zvužaje koła mahčymych ludziej, nie kažučy ŭžo pra pramyja navodki.

U zakrytych čatach časta ludzi ŭvohule nie «šyfrujucca» i kali siłaviki atrymali da jaho dostup, to adtul možna «dastać» vielmi šmat infarmacyi.

Praviła №6: nikoli nie vydavajcie vašu realnuju infarmacyju ŭ čaty. Dla taho, kab było składaniej vas identyfikavać, možacie, da prykładu, čarhavać vaš rod (pisać pra siabie to jon, to jana) i davać vypadkovuju falšyvuju infarmacyju.

Praviła №7: nie ŭstupajcie ŭ čat tolki vašaha dvara ci akruhi. Kali chočacie być u takim čacie, zajdzicie ŭ 10-15 čataŭ z roznaj łakalizacyjaj adnačasova. Kali vy ŭžo «praštrafilisia» — vydalicie i stvarycie akaŭnt na niebiełaruski numar.

Sposab №7: praz fejkavyja boty

Hety sposab asabliva «vystraliŭ» padčas zapusku čat-bota «Pieramoha» ad BYPOL. Tady siłaviki stvaryli sietku botaŭ, jakija źbirali piersanalnyja danyja biełarusaŭ. I dla niedaśviedčanaha čałavieka jany vyhladali absalutna adnolkava, tolki hubazikaŭski źbiraŭ jašče i telefon, jaki paśla dazvalaŭ znajści čałavieka.

Uvohule, kali vy zapuskajecie niejkaha bota, to jon atrymlivaje vaš ID. I heta ŭžo vialikaja ryzyka navat kali vy nie dajacie tudy nijakaj infarmacyi.

Praviła №8: daskanała praviarajcie, u jaki bot vy dasyłajecie paviedamleńnie. Nie šukajcie ich pošukam, a pierachodźcie z aryhinalnych staronak miedyjaŭ ci kanałaŭ.

Sposab №8: praz fejkavyja spasyłki i sajty

U siłavikoŭ jość ułasnyja servisy dla stvareńnia fejkavych spasyłak. Hetyja sposaby «zatočanyja» na toje, kab atrymać IP-adras karystalnika.

Schiema takaja: kali vy kantralujecie resurs, to možacie stvaryć spasyłku na niejki materyjał, stvoranuju admysłova dla niejkaha čałavieka. Kali jon adziny, chto zojdzie na resurs, to vy ŭžo viedajecie jahony IP-adras.

Heta robicca z dapamohaj roznych servisaŭ. Naprykład, vy možacie stvaryć lusterka viadomaha resursu abo całkam vydumać niejki inšy. Važna, kab u vas byŭ kantrol nad statystykaj i hieałakacyjaj tych, chto na jaho zachodzić.

Razam z hieałakacyjaj možna «vyciahnuć» jašče i inšuju infarmacyju ŭ Fingerprint. Heta adbitak vašaha braŭzera i, častkova, vašaj sistemy. Jon dazvalaje atrymać proćmu infarmacyi — mova braŭzera, jakija šryfty ŭstalavanyja na kamputary, viersiju vašaj sistemy i šmat inšaha, što dazvolić adnaznačna identyfikavać vašu pryładu paśla.

Praviła №9: nie pierachodźcie biazdumna pa spasyłkach ad nieznajomych ludziej ci z adkrytych čataŭ. Kali heta spasyłka na niezaležnaje miedyja ci sajt, jaki vy viedajecie, to lepš adkryć jaho na sajcie miedyja. Kali heta spasyłka na niešta inšaje, to jość lohki sposab pravieryć, ci praŭdzivaja jana — prosta ŭbicie jaje ŭ luby papularny pošukavik i pierajdzicie pa joj ź jaho.

Sposab №9: kantaktnyja knihi i pierapiska

Schiema vielmi prostaja — treba atrymać dostup da akaŭnta čałavieka i spampavać jahonuju kantaktnuju knihu. Razam ź inšymi danymi heta dazvolić znajści bolšaść jahonych kantaktaŭ u realnym žyćci.

Taksama ludzi časta nazyvajuć adno adnaho pa imionach, asabliva ŭ zakrytych čatach i asabistych pierapiskach.

Praviła №10: nie dadavajcie ludziej u kantakty pad ichnimi ŭłasnymi imionami ci viadomymi siłavikam psieŭdanimami.

Praviła №11: vydalajcie pierapiski z usimi inšymi ludźmi raz na sutki. Zrabić heta lohka i heta abaronić vas ad vypadkovych źlivaŭ lišniaj infarmacyi.

Praviła №12: raz na sutki čyścicie taksama keš telehrama i keš bazaŭ danych. Zrabić heta možna pa šlachu: Nałady — Danyja i schovišča — Vykarystańnie schovišča. Tam abiarycie punkty «Ačyścić keš Telegram» i «Ačyścić łakalnuju bazu danych». Heta važna, bo ŭ łakalnaj bazie danych zachoŭvajecca vielmi šmat infarmacyi — archivy vydalenych pierapisak i ačyščanych čataŭ, niekatoryja fajły i mietadanyja, a funkcyi aŭtamatyčnaha jaje vydaleńnia nie isnuje.

Sposab №10: praz fota i videa

Siłaviki mohuć znajści čałavieka ź biełaruskim hramadzianstvam, kali majuć fota jahonaha tvaru. Hałoŭnyja krynicy — infarmacyja ź pierapiski, hałasavyja i videapaviedamleńni ŭ dyjałohach i čatach, a taksama videazvanki.

Praviła №13: u adkrytych čatach i ŭ pierapiskach z aktyvistami nie zachoŭvajcie anijakaj fota— i videainfarmacyi, jakaja b raskryvała vašu asobu ci asoby inšych ludziej.

Sposab №11: praź mietadanyja fajłaŭ

Usie fajły, jakija vy stvaryli sami ci atrymali ad inšych, pa zmoŭčańni ŭtrymlivajuć u sabie mietadanyja. Dla fota i videa z samych adčuvalnych — heta pryłada, ź jakoj zrobleny zdymak abo videa. Dla dakumientaŭ — imia karystalnika kampjutara, na jakim jon byŭ stvorany. Takija mietadanyja stvarajuć usie kampjutary na ŭsich sistemach.

Telehram zachoŭvaje ich tolki kali vy dasyłajecie niešta jak «fajł», da prykładu, kali chočacie zachavać jakaść zroblenaha fota. Pierad adpraŭkaj adčuvalnych danych treba heta ŭličvać.

Praviła №14: pierad adpraŭkaj fajłaŭ «ačyščajcie» ich z dapamohaj roznych servisaŭ. Heta abaronić vas ad «źlivu» mietadanych.

Sposab №12: praz zvanki i hałasavyja paviedamleńni

Kali čałavieka zatrymali, siłaviki mohuć «vyvieści» karystalnika na zvanok ź videa ci prynamsi aŭdyja i takim čynam znajści jaho.

Aŭdyjapaviedamleńni dajuć šmat infarmacyi — pra toje, jakoha połu čałaviek, prykładny ŭzrost, tembr i styl maŭleńnia. Kali čałaviek viadomy siłavikam, to heta dazvolić znajści amal adrazu.

Taksama ŭ telehramie jość prablema, što pa zmoŭčańni zvanki z kantaktami — reer-to-peer. Heta značyć, što dva čałavieki złučajucca naŭprost i pakazvajuć svaje realnyja IP-adrasy. P2P-zvanki našmat palapšajuć jakaść huku, ale dazvolać siłavikam atrymać vaš realny IP, kali vy dazvalajecie zvanki, u vas uklučany internet i čałaviek u vašych kantaktach.

Praviła №15: nie skidvajcie hałasavyja paviedamleńni ŭ ahulnyja čaty.

Praviła №16: zabaranicie IP-zvanki. Zrabić heta možna pa šlachu: Nałady — Pryvatnaść i biaśpieka — Vykliki — P2P.

Sposab №13: praz styl napisańnia

Šmat chto z aktyŭnych kamientataraŭ paznajecca pa tym, jak jon piša. Vy nie zaŭvažajecie heta, ale navat svaich pastajannych kamientataraŭ my paznajem z tysiačy. Siłaviki taksama mohuć heta analizavać.

Sposab №14: falšyvyja fajły

Amal dla luboha typu fajłaŭ isnuje schiema, jakaja dazvalaje atrymać IP-adras pry adkryćci fajła. Takija fajły nie źjaŭlajucca virusami, tamu ich nie błakujuć antyvirusnyja prahramy.

Bolšaść takich «trukaŭ» pracuje na Windows, ale inšyja sistemy taksama ŭraźlivyja.

Praviła №17: nie adkryvajcie fajłaŭ z sumniŭnych krynicaŭ kštałtu adkrytych čataŭ i asabistych paviedamleńniaŭ ad nieznajomych ludziej.

Praviła №18: pastajanna vykarystoŭvajcie VPN, dla hetaha jość mahčymaści ŭ Android. Taksama takaja mahčymaść jość u šmatlikich VPN-klijentach na Windows, Linux, Mac i iOS. Nazyvajecca jana «Kill Switch». Heta zabaronić pryładzie ŭvachodzić u internet biez uklučanaha VPN.

Sposab №15: sacyjalnaja inžynieryja i ŭkaranieńnie ahientaŭ

Sacyjalnaja inžynieryja abo «ataka na čałavieka» — heta sukupnaść psichałahičnych i sacyjałahičnych pryjomaŭ, mietadaŭ i technałohij, jakija dazvalajuć atrymać kanfidencyjnuju infarmacyju. Faktyčna treba chitra padmanuć čałavieka. Jon kambinujecca ź inšymi sposabami, pieraličanymi vyšej.

Da prykładu, možna stvaryć fejkavy akaŭnt, jaki budzie aktyŭna kamientavać niešta ŭ čacie. Paśla vyśvietlić niešta pra šukanaha čałavieka, da prykładu, što jon lubić padarožžy. A paśla skinuć jamu spasyłku na niejki fejkavy tekst, jaki dazvolić atrymać jahony IP ci zrazumieć, što jon karystajecca VPN.

Ci, dalej-bolej, sprabavać zaviazać ź im hutarku i atrymać niešta pra jaho — poł, uzrost, miesca pracy, koła cikaŭnaściaŭ, prykładnaje miesca žycharstva. Ci, da prykładu, pisać ad imia ŭžo zatrymanaha čałavieka, kab niešta vyśvietlić.

Hety mietad adroźnivajecca ad inšych, bo zadača siłavikoŭ tut spačatku ŭstalavać davier. Toje ž i z ahientami — jany musiać rabić vyhlad, što jany prychilniki pieramienaŭ.

Siarod apošnich takich atakaŭ — stvareńnie «bataljona Kaściuški». Siarod bolš składanych — padčas ataki na hrupy OHSB siłaviki navat spalili niejki traktar, kab ukaranicca ŭ šerahi administraraŭ čata i znajści astatnich karystalnikaŭ i «zdeananimizavać» ichnija telehram-akaŭnty. Abo ŭkaranieńnie ahienta ŭ kanał Čornaj knihi Biełarusi, jakoje dazvoliła zatrymać Ramana Pratasieviča i Safiju Sapiehu, a taksama «zdeananimizavać» sietku administrataraŭ i maderataraŭ biełaruskich kanałaŭ.

Praviła №19: budźcie aściarožnyja. Nie vydavajcie ludziam z «pratesnych» čataŭ anijakaj infarmacyi pra siabie.

Sposab №16: katavańni

Heta pracuje tolki kali čałaviek zatrymany i siłaviki nie zdoleli znajści dakładna taho, chto chavajecca za imiem karystalnika, abo chočuć atrymać infarmacyju pra kantakty hetaha čałavieka. Ciapier hety sposab prymianiajecca vielmi šyroka — vas prosta bjuć ci źnievažajuć roznymi šlachami, pakul vy nie złamajeciesia.

Bolšaść ludziej nie vytrymlivaje katavańniaŭ i vydaje dostup da svajho akaŭntu.

Praviła №20: budźcie hatovyja da zatrymańnia. Dla hetaha čyścicie vašy pryłady i kłapaciciesia pra vašu biaśpieku rehularna, a nie čas ad času.

Sposab №17: šlacham sačeńnia za kankretnym karystalnikam

Navat kali vy ŭsio robicie idealna, imaviernaść taho, što vy rana ci pozna «vydadzicie» niejkuju infarmacyju pra siabie — vielmi vysokaja. Bo ŭsie rana ci pozna pamylajucca.

I kali za vami sočać piersanalna, to, chutčej za ŭsio, rana ci pozna znojduć. Heta pytańnie tolki taho, nakolki vy relevantny dla siłavych strukturaŭ, kab vydatkoŭvać na vas takija hihanckija resursy.

Sposab №18: šlacham vyvada čałavieka z-pad VPN, proksi abo TOR

Nastupnyja try sposaby — čysta hipatetyčnyja. My nie viedajem dakładna, ci karystajucca imi siłaviki, ale jany isnujuć i apisanyja ŭ litaratury, tamu my ličym vartym ich pryvieści.

Siłaviki mohuć imi karystacca tolki kali ŭsie inšyja bolš «chutkija» nie spracavali i treba adšukać niejkaha kankretnaha čałavieka, a nie aby-kaho. Bolšaści z čytačoŭ jany nie pahražajuć.

Dla hetaha siłavikam patrebny resurs, jaki jany mohuć kantralavać. Pryčym na heta viaducca navat sapraŭdnyja chakiery i viadomyja machlary.

Sutnaść takaja: kali vy zachodzić z-pad niejkaha «ananimizatara», sajt abo vas nie puskaje (jak ciapier sajty biełaruskich dziaržorhanaŭ), abo stvaraje dla vas nievynosna doŭhuju i składanuju sistemu pravierki. Heta zmušaje vas zachodzić pad svaim ułasnym IP-adrasam, a ŭ biełaruskich realijach heta značyć, što vy «papalisia».

Praviła №21: kali resurs patrabuje ad vas vyjści z-pad ananimajziera, to jon sumnieŭny ŭ lubym vypadku. Nie adklučajcie srodki ananimizacyi, navat kali nie možacie patrapić na niejki resurs.

Sposab №19: tajminh-ataka i supastaŭleńnie złučeńniaŭ

Adsočvajecca abo čas aktyŭnaści karystalnika, abo abjom trafiku, jaki jon spažyvaje. Da prykładu, kali vy ŭstalavali ź im kantakt, to vy možacie skinuć jamu fajł niejkaha vialikaha pamieru i ŭ momant zafiksavać usich ludziej, jakija spampavali niešta padobnaha abjomu. Tak možna zvuzić koła «padazravanych» u sotni razoŭ.

Z aktyŭnaściu sutnaść u tym, kab vielmi doŭha zapisvać usich, chto byŭ anłajn u toj ci inšy čas. Da prykładu, čałaviek aktyŭna piša kamientary — heta čas aktyŭnaści, u jaki jon dałučajecca da telehram. Vaša zadača ŭ tym, kab zapisać usich, chto dałučaŭsia da miesiendžara ŭ hety časavy pramiežak. Takim čynam rana ci pozna takich ludziej zastaniecca mała.

Prykładna taksama tearetyčna možna atrymać realny IP-adras čałavieka, jaki karystajecca «zvyčajnym» VPN. Treba atrymać IP-adras VPN i prosta praanalizavać, chto z karystalnikaŭ u Biełarusi «źviazvaŭsia» z hetym VPN u toj čas, kali čałaviek zrabiŭ važnaje dla siłavikoŭ dziejańnie.

Rekamiendacyja: nie zachodźcie ŭ miesiendžary adrazu paśla ŭklučeńnia VPN.

Rekamiendacyja: adklučycie aŭtamatyčnuju zahruzku fajłaŭ u telehram. Zrabić heta možna pa šlachu: Nałady — Danyja i schovišča — Aŭtaspampoŭvańnie miedyja. Zabaranicie aŭtaspampoŭvańnie dla ŭsich vidaŭ złučeńnia. Da taho ž, heta dapamoža vam chutčej zahružać telehram, bo ciapier vyjavy i videa nie buduć hruzicca aŭtamatyčna.

Sposab №20: technična składanyja sposaby

Jany vykarystoŭvajucca nadzvyčaj redka, ale jany isnujuć. Heta, da prykładu, ataka z dapamohaj hukavych majačkoŭ, deananimizacyja praz Cookies, User Agent i Fingerprint šlacham doŭhaha ich nazapašvańnia, praz admysłova stvoranyja fajły-prymanki, praz uraźlivaści samoha telehram (da prykładu, hetuju).

Kali suprać vas vykarystoŭvajuć takija sposaby, to vy amal napeŭna i tak pra ich viedajecie. Realnaje ich vykarystańnie suprać zvyčajnych biełarusaŭ małaimaviernaje.

Vyšejzhadanyja praviły i sposaby mohuć vas nie vyratavać, kali siłaviki ŭžo zapisali vašy danyja ci pryjduć da vas ź inšaj nahody.

Inicyjatyva CyberBeaver prapanuje ŭsim achvotnym kansultacyi pa kibierbiaśpiecy praz svajho abaronienaha bota, a ŭ ichnim kanale sabranyja dziasiatki instrukcyj pa tym, jak abaranić siabie ŭ internecie. Šmat karysnych paradaŭ pa biaśpiecy jość i ŭ «Kibierpartyzanaŭ».

Čytajcie jašče:

Telegram i nie tolki — jak pravilna pačyścić miesiendžary, kab nie trapić pad represii. Padrabiazny hajd

Jak zaścierahčy siabie ŭ VK, Facebook i «Adnakłaśnikach» — padrabiazny hajd

Клас
315
Панылы сорам
77
Ха-ха
78
Ого
188
Сумна
117
Абуральна
225