Суддзя, вядомая многім палітвязням, і пракурор з медалём ад Лукашэнкі. Хто судзіў Алеся Пушкіна
Сёння ўначы палітвязень і мастак Алесь Пушкін памёр за кратамі. Распавядаем, што вядома пра тых, хто прысудзіў яму пяць гадоў строгага рэжыму.
Алена Шылько
Суддзёй па справе Алеся Пушкіна, які сёння памёр за кратамі, была Алена Шылько. Яна сапраўдны ветэран рэпрэсій супраць беларускіх актывістаў.
Алене Шылько 51 год, на пасадзе суддзі не менш за 17 гадоў. Палітычныя справы яна вядзе як мінімум з 2006-га.
Сітуацыя тады была адметная. Былы кіраўнік «Алмаза» Мікалай Карпянкоў (той самы, што пазней кіраваў ГУБАЗіКам) без дай прычыны страляў па машыне Юрыя Радзівіла, аднаго з кіраўнікоў штаба кандыдата ў прэзідэнты ў 2006-м Аляксандра Казуліна. Юрый Радзівіл падаў за гэта на Карпянкова ў суд, але сам быў арыштаваны і асуджаны на тры месяцы арышту за быццам бы «супраціў міліцыянтам», хоць Карпянкоў не здолеў уцямна патлумачыць, якая была нагода страляць.
Сярод самых вядомых спраў Шылько ў мінулым таксама прысуд Змітру Дашкевічу і Эдуарду Лобаву ў 2010-м. Мужчынам прысудзілі два і тры з паловай гады адпаведна за нібыта напад на выпадковых мінакоў, які насамрэч быў правакацыяй беларускіх спецслужбаў напярэдадні прэзідэнцкіх выбараў 2010 года.
Зміцер Дашкевіч і Эдуард Лобаў падчас суда ў 2011 годзе. Фота: «Радыё Свабода»
Яна судзіла яшчэ як мінімум чацвярых фігурантаў справы «Плошчы-2010» і ўсім дала розныя тэрміны ў калоніі, агулам каля 15 гадоў. За гэта яе ў 2011-м уключылі ў санцыйны спіс ЕС.
Пачынала Шылько ў судзе Маскоўскага раёна Мінска, а пасля перайшла ў Мінскі гарадскі суд. Тут яна паспела прысудзіць болей за 60 гадоў зняволення беларускім палітвязням з 2020-га.
Падчас суда Алесь Пушкін парэзаў сабе жывот у знак пратэсту 25 сакавіка 2022 года. Суддзю гэта не засмуціла, а самога Алеся за гэта адправілі ў ШІЗА на 13 сутак. На абвяшчэнні прысуду Алесь зладзіў яшчэ адзін перформанс, распрануўшыся і паказаўшы свае шрамы, за што атрымаў яшчэ 13 сутак карцара. Алена Шылько прысудзіла яму пяць гадоў зняволення, як і прасіў пракурор.
Аляксандр Кароль
Аляксандру Каралю 31 год, і родам ён з Бабруйска. Выпускнік Акадэміі кіравання пры Лукашэнку, ён пайшоў працаваць у пракуратуру. Пачынаў памочнікам пракурора Заводскага раёна Мінска.
Цяпер Кароль атрымаў павышэнне — працуе старшым пракурорам аддзела дзяржаўнага абвінавачання Генеральнай пракуратуры. Палітвязні па абвінавачаннях, якія ён падтрымліваў, атрымалі амаль 70 гадоў зняволення. Але першая ягоная гучная справа была супраць «рускамірцаў», аўтараў скандальнага выдання «Рэгнум».
Тады быў чарговы віток канфлікту паміж Лукашэнкам і ўладамі РФ. Аўтараў кансерватыўнага выдання «Рэгнум» Юрыя Паўлаўца, Дзмітрыя Алімкіна і Сяргея Шыптэнку судзілі за «распальванне міжнацыянальнай варожасці» праз артыкулы, у якіх яны глуміліся з беларускіх улад і папракалі іх недастаткова адданым стаўленнем да Расіі. Тады Кароль запрасіў ім па пяць гадоў калоніі з адтэрміноўкай на тры гады, і ўсіх траіх вызвалілі ў зале суда.
Наступная палітычная справа Караля — суд над анархістам Змітром Паліенкам у 2019-м па чатырох крымінальных артыкулах. У знак пратэсту супраць закрыцця суда Паліенка парэзаў сабе вены, усчаўся вялікі скандал. У выніку суд зрабілі адкрытым і адмовіліся ад трох артыкулаў абвінавачання. Кароль запрасіў для Паліенкі шэсць гадоў калоніі, але прысудзілі яму тры гады «хатняй хіміі» і выпусцілі ў зале суда.
30 лістапада 2021 года Кароль атрымаў з рук Лукашэнкі медаль «За працоўныя заслугі». Тады падчас урачыстай цырымоніі Лукашэнка сказаў, што бачыць «людзей, якія генерыруюць выбітныя ідэі», а Швед кіруе «найлепшай у свеце пракуратурай».
Таксама Кароль быў пракурорам па справе Калеснікавай і Знака, справе «Вясны» і шэрагу завочных спраў супраць дзеячаў-эмігрантаў. А ўвесну 2022 года Кароль прадстаўляў дзяржабвінавачанне па справе Алеся Пушкіна. Ён запрасіў для мастака пяць гадоў строгага рэжыму. Сёння палітвязень памёр за кратамі.
«Наша Ніва» запыталася ў Аляксандра Караля, ці адчувае ён нешта з нагоды смерці Алеся Пушкіна. Ён прачытаў паведамленне і, не адказаўшы, выдаліў яго.
«Наша Нiва» — бастыён беларушчыны
ПАДТРЫМАЦЬ«Ціхі чалавек з мяккім голасам». Хто тыя суддзя і пракурор, якія адправілі ў калонію блогера Клімовіча — палітвязня, які памёр за кратамі
«Яна спачатку спужалася і пачала выносіць мяккія прысуды, але пасля ўсё вярнулася на свае кругі». Хто яна — наваполацкая суддзя Балаболава
Алесь Пушкін: хто гэты геніяльны мастак і палітвязень, што згінуў у зняволенні
Каментары