Пара купіла сабе цэлую вёску ў Францыі па цане аднапакаёўкі ў Віцебску
Закінутыя вясковыя дамы ў еўрапейскіх краінах можна набыць зусім нядорага. Цэлая вёска Ля-Бусліер у Нармандыі каштавала менш за 27 тысяч еўра.
27 тысяч еўра гэта па сённяшнім курсе 27 тысяч даляраў. За такія грошы не купіш нават аднапакаёўку ў мінскай панэльцы, хіба што нешта самае таннае ў Віцебску ці Кобрыне.
Пол Мэплі і Іп Уорд, 48-гадовыя ландшафтныя дызайнеры з Брытаніі, задумаліся пра набыццё нерухомасці ў Францыі пасля таго, як не ўдалося сабраць на ўласную нерухомасць у сябе на радзіме.
У Брытаніі нерухомасць каштуе дорага, а ўлазіць у крэдыты мужчыны не хацелі. У 2019 годзе яны ў выніку набылі цалкам прыстойны домік у Ля-Бусліеры ўсяго за 12 тысяч еўра.
Паступова яны скупілі рэшту будынкаў у бязлюднай вёсцы, расказала праграма брытанскага Channel 4 «Ратуйце! Мы купілі вёску».
У адрозненне ад густа заселенай Англіі, аддаленыя раёны Францыі перажываюць такую ж дэпапуляцыю, як некаторыя куткі нашай Віцебшчыны. Але там збудаваныя не драўляныя хаты, як у нас, якія хутка занепадаюць, калі іх не ацяпляць зімой і не праветрываць, а моцныя каменныя будынкі.
Цяпер пара валодае некалькімі дамамі, двума хлявамі, стайняй, двухузроўневай майстэрняй, выціскальняй соку для вырабу сідру і невялікай старой пякаранькай. І ўсё гэта на 80 сотках зямлі.
Брытанцы хочуць ператварыць вёску ў месца адпачынку. Аднак гэта запатрабуе немалых інвестыцый. Давесці да ладу старыя будынкі не так проста.
У некаторых еўрапейскіх краінах, да прыкладу, у Італіі, мясцовыя ўлады выдзяляюць датацыі людзям, якія гатовыя ўзяць старыя сядзібы і даглядаць іх. Такім спосабам там даюць другое жыццё старым селішчам.
У Беларусі перад выбарамі могуць блакаваць інтэрнэт — як да гэтага падрыхтавацца, каб быць на сувязі2
Каментары