29 śpiecnazaŭcaŭ śviedčać suprać Mikity Lichavida

18:41

Abvieščany pierapynak da ranicy 23 sakavika. Praces adnovicca a 10-j ranicy. Zastałosia dapytać 19 śpiecnazaŭcaŭ. Tym, kaho apytali siońnia, sudździa dazvoliła na sud nie prychodzić.

Paśla abviaščeńnia pierapynku maci Mikity Lichavida sprabavała pierałdać jamu pasyłku, ale sudździa zabaraniła.

18:33

Pačynajecca dopyt čarhovaha śpiecnazaŭca. Heta - Alaksiej Sakač, jon taksama milicyjant PMSP. Rodam z Rahačova. Jon raskazvaje, što jaho ŭdaryli pa ruce, ale jon zdoleŭ utrymać ščyt i abaranicca ad napadnikaŭ.

18:27

Komar kaža, što atrymaŭ pa hałavie. U pratakole śledčaha i vynikach śpiecekśpiertyzy zapisana, što była traŭma kalena.

Da Lichavida pretenzij nie maje, na Płoščy jaho nie bačyŭ.

18:19

Nastupny paciarpieły -- Komar, milicyjant PMSP.

18:17

Imia śpiecnazaŭca, jaki zaraz daje pakazańni -- Jury Davidovič. Jon užo ŭdzielničaŭ u pracesie Breusa i Haponava. Taksama ŭ ŚMI śćviardžałasia, što mienavita jon 6 hadoŭ tamu pryludna ŭdaryŭ Śviatłanu Zavadskuju.

Davidovič nie čuŭ zaklikaŭ razyścisia na Płoščy. Pahromaŭ i padpałaŭ nie bačyŭ. Jon taksama nie viedaje ŭ tvar Lichavida i pretenzij da jaho nie maje.

18:10

Pačaŭsia dopyt nastupanah paciarpiełaha. Advakat dvojčy prasiła zrabić pierapynak i dvojčy atrymała admovu. U zale vielmi dušna, pierapynak a 10-j hadziny byŭ tolki adzin raz na 40 chvilin. Vokny niemahčyma adčynić, bo jany zakrytyja kratami.

17:55

Vołkaŭ kaža, što demanstranty bili jaho pa ščycie, adzin udar trapiŭ u kalena. Śpiecnazaviec čuŭ zakliki razyścisia, sam ludziej razyścisia nie prasiŭ. Da Lichavida nijakich pretenzij nie maje.

17:45

Pačynajecca dopyt paciarpiełaha Vołkava, jon, jak i papiarednija paciarpiełyja, milicyjant PMSP Minharvykankama.

17:42

Bažok pretenzij da Lichavida nie maje, jon jaho nie viedaje.

17:40

Bažok raskazvaje pra svaju traŭmu: "Udaryli pa patylicy i zorački zakrucilisia ŭ vačach". U pratakole śledčaha adnak paznačana, što Bažka ŭdaryli pa śpinie. Śpiecnazaviec kaža, što pratakoła dopytu jon navat i nie čytaŭ, a padpisaŭ prosta tak. "Heta ž prosta pracedura takaja", - kaža jon.

17:36

Bažok raskazvaje, što mała bačyŭ na Płoščy i mała što čuŭ. Kaža, što jaho aślapili fotakamiery i jon tolki čuŭ kryki ludziej. Nie bačyŭ pabitych šybaŭ, ni pahromaŭ, kaža, što demanstranty bajalisia śpiecnazaŭcaŭ. Raspaviadaje i pra sałdataŭ, što razhaniali ludziej.

17:30

Pačynajecca dopyt paciarpiełaha śpiecnazaŭca Juryja Bažka.

1?:27

Skarachod kaža, što ŭ Dom Urada sprabavali prabicca 35 čałaviek, 2-3 ź ich mieli draŭlanyja pałki ŭ rukach.

17:17

Pačynajecca dopyt paciarpiełaha Skarachoda. Jon taksama śpiecnazaviec. Dopyty paciarpiełych stanoviacca ŭsio karaciejšymi.

Advakatu Skarachod paviedamiŭ, što bačyŭ na płoščy bahor i ledarub. Jany taksama lažali kala pomnika Lenina ŭžo paśla taho, jak ludziej adahnali z płoščy Niezaležnaści.

16:56

Pačaŭsia dopyt milicyjaniera Bułavackaha -- supracoŭnika PMSP..

Bułavacki paŭtaraje svaje pakazańni z pracesa Breusa i Haponava. Kaža, što demanstranty bili śpiecnazaŭcaŭ nahami pa ščytach. Pahromy na Płoščy Niezaležnaści jon nie bačyŭ, kaža, što bačyŭ potym pa televizary. Lichavida jon nie viedaje.

16:49

Majsiejeŭ raspavioŭ, jak paśla razhonu jon źviedaŭ mocny stres, emacyjny šok. Užo ŭ słužbovym transparcie jon pabačyŭ, što kalena mocna paškodžana. Raskazvaje, što paškodžanymi byli i słužbovyja štany. Majsiejeŭ kaža, što chacieŭ prynieści padranyja štany siońnia na sud, ale zabyŭ.

Jon raskazvaje, što demanstranty kidali ŭ jaho kamieńniem i lodam. Havoryć enierhična, chvalicca apieratyŭnymi dadzienymi pa Płoščy. Raskazvaje, što maładyja demanstranty, sprabavali prarvać šerah śpiecnaza, ale milicyjanty hetaha zrabić nie dazvolili.

16:33

Pačynajecca dopyt Juryja Majsiejeva. Jon - milicyjant PMSP.

Majsiejeŭ raspaviadaje, što ŭ niejki momant niešta vylecieła z natoŭpu i zdyryła jaho ŭ kalena. Jon adčuŭ mocny bol, ale vystajaŭ. Na płoščy bačyŭ armaturu. Rydlovak i ledarubaŭ nie bačyŭ.

16:32

Ihar Ziańkievič na Płoščy zbroi ŭ rukach demanstrantaŭ nie bačyŭ. Jaho chutka dapytali. Mikitu Lichavida jon nie bačyŭ, pretenzij da jaho nie maje.

16:22

Pačaŭsia dopyt treciaha paciarpiełaha -- Ziankieviča. Raniej jon nie mieŭ dakumientaŭ i advakat nie pahadziłasia brać u jaho pakazańni. Zaraz Ziankievič prynios słužbovaje paśviedčańnie. Jon, jak i Kaštalanaŭ, byli paciarpiełymi na pracesie Breusa i Haponava.

16:04

Advakat zapytała ŭ Kaštalanava, ci bačyŭ jon na Płoščy ŭzbrojenych ludziej, ci viedaje jon Lichavida. Kaštalanaŭ na abodva pytańni adkazaŭ - nie.

Paśla hetych pytańniaŭ sudździa paprasiła advakata nie zaciahvać praces. Advakat adkazała, što prosta sprabuje vyśvietlić ci mieli miesca na Płoščy masavyja biesparadki, va ŭdziele ŭ jakich vinavaciać jaho padabaronnaha.

Kaštalanaŭ, jak i na pracesie Breusa i Haponava, raskazaŭ, što bačyŭ, jak demanstranty vykarystali vohnietušyciel.

15:54

Advakat zapytała ŭ Kaštalanava, kolki čałaviek sprabavali trapić u Dom Urada i bili vokny. Jon zadumaŭsia i paśla karotkaj paŭzy skazaŭ -- 35 čałaviek.

15:51

Na pytańnie advakata, ci źviartaŭsia Kaštalanaŭ da demanstrantaŭ z patrabavańniem adyści ad Doma Urada, jon adkazaŭ nastupnaje: «A navošta źviartacca? Usie ludzi, što znachodzilisia na hanku Doma Urada, ździajśniali supraćpraŭnuju dziejnaść. My ich adtul prybrali z prymianieńniem fizičnaj siły».

15:39

Advakat sprabuje vyśvietlić u Kaštalanava, dzie znachodziŭsia vialiki MAZ, abstalavany dynamikami, ź jakich hučali zakliki razyścisia. Milicyjant, jaki spačatku kazaŭ, što bačyŭ hruzavik i čuŭ zakliki razyścisia, zaraz dakładna nie moža paviedamić, dzie hety aŭtamabil znachodziŭsia. Jon taksama miarkuje, što demanstranty mahli zachapić MAZ, i tamu aŭtamabil źjechaŭ z Kastryčnickaj płoščy ŭ nieviadomym kirunku. Kaštalanaŭ znoŭ pabačyŭ jaho tolki na Płoščy niezaležnaści.

Abmierkavańnie hetaj prablemy było nastolki vostrym, što sudździa dała papiaredžańni i advakatu i paciarpiełamu.

15:27

Śpiecnazaŭcy słuchajuć pakazańni svajho kamandzira ŭvažliva. Nichto nie śmiajecca i nie śpić. Sam Alaksando vyrazna niervujecca.

15:22

Advakat Lichavida pačała zadavać pytańni Kaštalanavu. jana adrazu jaho papiarediła, što choča pačuć kankretnyja i dakładnyja adkazy, a nie asabistyja mierkavańni. Namieśnik kamandzira PMSP sumieŭsia, ale praciahnuŭ adkazvać.

15:18

Na pytańnie prakurora, jakija paškodžańni atrymaŭ Kaštalanaŭ, jon adkazaŭ, što ŭ peŭny momant adčuŭ bol u nazie. Adkul jana ŭziałasia, jon dakładna skazać nie moža.

15:09

Kaštalanaŭ raskazvaje, jak śpiecnaz baraniŭ Dom Urada: «My ŭvajšli śmieła zzadu i stali pierad iim (demanstrantami). Spracavaŭ fakt niečakanaści. Ale potym jany (demanstranty) pajšli na nas. Vykarystoŭvali plaški, čaranki ad rydlovak, vudački. Byli 3-4 sproby prarvacca. Potym naša kamandavańnie zahadała nam syści. Kali my sychodzili, to demanstranty sprabavali vyrvać supracoŭnikaŭ z šerahu. Adnak asabista mianie nie bili».

Kaštalanaŭ, jaki śviedčyŭ taksam ana pracesie Breusa i Haponava, zaraz paŭtaraje pakazańni, dadzienyja tady. Adnak słovazłučeńnie «biasčynstvujuščaja tałpa» ciapier nie vykarystoŭvaje. Demanstrantaŭ nazyvaje «hraždanie».

15:02

Advakat skončyła dapytvać Karavajeva. Nastupny paciarpieły - Ziańkovič, adnak jon nie mieŭ dakumientaŭ pry sabie, i advakat nie pahadziłasia na toje, kab jon davaŭ pakazańni. Abodva paciarpiełyja vyjšli z zały suda.

Zaraz pakazańni budzie davać Kaštalanaŭ -- namieśnik kamandzira pałka milicyi śpiecpryznačeńnia.

14:55

Karavajeŭ kaža, što nie bačyŭ Lichavida na Płoščy, nie bačyŭ jaho supraćpraŭnych dziejańniaŭ. Pahromaŭ, padpałaŭ, plašak i kanistr z haručaj vadkaściu, vostrych mietaličnych prutoŭ jon taksama nie bačyŭ. Karavajeŭ taksama skazaŭ, što prymianieńnia zbroi demanstrantami jon taksama nie bačyŭ.

14:45

Praces adnaviŭsia. Advakat praciahvaje dopyt Karavajeva. Jana znajšła supiarečnaści ŭ pakazańniach, dadzienym padčas śledstva i zaraz u zali suda. Raniej jon kazaŭ, što mieŭ zahad adsiačy hrupy ludziej, ciapier kaža, što tolki stajaŭ na płoščy.

Akramia rodnych Mikity Lichavida, u zali prysutničajuć jaho siabry -- 3 dziaŭčyny i chłopiec. Jany kažuć, što Mikita mocna źmianiŭsia ŭ SIZA -- inšy hołas, vyhlad.

13:52

Pierapynak da 14:30.

13:51

Advakat Lichavida praciahvaje dopyt Karavajeva. Jana vielmi padrabiazna raspytvaje jaho ab usich drobiaziach i terminach, užytych śpiecnazaŭcam. Toj błytajecca i hublajecca. Sudździa taksama patrabuje ad Karavajeva kankretnych adkazaŭ, ale jon nie moža ich dać. Nie moža dakładna skazać, jak daloka stajaŭ ad jaho natoŭp, jakija kamandy jon atrymoŭvaŭ, što adbyvałasia ŭvohule. Karavajeŭ kaža, što stajaŭ u šerahu śpiecnaza. Nazirać za ŭsim, što adbyvajecca, jon nie moh.

13:35

Śviedka paviedamiŭ advakatu, što z Płoščy ludziej rachvozili vojski, jon dumaje, što z častki 3214. Paciarpieły nie viedaje, čamu ludziej razahnali. Jon kaža, što ludzi na Płoščy tolki razmaŭlali pamiž saboj, nie akazvali supraciŭleńnia.

13:34

Karavajeŭ raskazaŭ, što na Płoščy ŭ dačynieńni da jaho ludzi pravodzili relihijnyja akty: zdymali porču, a taksama pahražali hvałtam jamu i jaho siamji.

Pryznańni Karavajeva ab relihijnych aktach vyklikali rohat sasłužboŭcaŭ. Sudździa była vymuhšana pavysić hołas treci raz na śpiecnazaŭcaŭ. "Paciarpiełyja, vam viesieła ŭsim?".

13:11

Dalejšyja pakazańni Karavajeva -- jon nie viedaŭ kolki ŭ jaho pałku čałaviek -- vyklikali rohat u śpiecnazaŭcaŭ. Sudździa znoŭ ich papiaredžvaje.

13:05

Advakat pasprabavała vyśvietlić, jakimi instrukcyjami kiravaŭsia śviedka Karavajeŭ. Sudździa spačatku admoviła ŭ hetym, ale paśla dadatkovych tłumačeńniaŭ dazvoliła. Adnak śpiecnazaviec admaŭlajecca adkazvać, ad kaho atrymlivaŭ zahady. Tolki paśla zaŭvahi sudździ jon uspomniŭ -- kiraŭnik pałka milicyi śpiecyjalnaha pryznačeńnia Łukomski Alaksandr Valancinavič. Śpiecnazaŭcaŭ upartaść svajho kalehi raźviesialiła, i jany pačali hučna śmiacca -- u zali ŭsčaŭsia verchał. Suddździa zrabiła zaŭvahu usim 29 paciarpiełym.

13:00

Karavajeŭ paviedamiŭ, što na Płoščy jaho zzadu ŭdaryli pa hałavie. Jon dumaje, što bili mietaličnym pradmietam. U vyniku jon atrymaŭ hiematomu, adnak nie viedaje, ci na jaho šlemie zastaŭsia śled ad udaru. Jon taksama nie viedaje, jak možna ŭpeŭnicca ŭ hetym.

12.55

Sudździa zapytałasia, ci naležyć Lichavid da niejkich partyj i ruchaŭ. Jon paćvierdziŭ, što naležyć da Ruchu "Za svabodu", ale jaho znachodžańnie na Płoščy z hetym nie źviazana.

Raspačynajecca dopyt śviedki Viktara Karavajeva. Advakat zapatrabavała pašpart śpiecnazaŭca -- jon pakazaŭ słužbovaje paśviedčańnie.

12:49

Lichavid śćviardžaje, što nie čuŭ zaklikaŭ razychodzicca. Kaža, što pabačyŭ śpiecnaz tolki tady, kali jon pačaŭ raśsiakać demanstrantaŭ. Patrabavańni milicyi pačuŭ, tolki kali ludziej pačali advodzić u aŭtazaki.

12:38

Mikita Lichavid: «Ja ŭpieršyniu ŭ žyćci zhubiŭ kantrol nad saboj. Ja raskajvajusia ŭ hetym».

Zaraz jamu zadaje pytańni advakat. Śpiecnazaŭcy admovilisia niešta ŭdakładniać u Lichavida. Paviedamili suddździ, što nie majuć da padazravanaha nijakich pytańniaŭ.

12:33

Mikita Lichavid raspavioŭ, jak jaho zatrymlivali. Skazaŭ, što pa darozie ŭ aŭtazak jaho znoŭ źbili. Heta paviedamleńnie znoŭ abudziła śpiecnazaŭcaŭ -- jany pačali aktyŭna pierašeptvacca i ŭśmichacca.

U aŭtazaku Lichavid siadzieŭ la akna i bačyŭ, jak pa Płoščy chadzili ludzi ŭ cyvilnym tudy i nazad ź nieviadomaj jamu metaj.

Kaža, što nie bačyŭ zbroi i niejkich vostrych pradmietaŭ, naprykład ledarubaŭ, u rukach demanstrantaŭ.

12:37

Abvinavačany kaža, što nie bačyŭ nijakich siłavych dziejańniaŭ z boku demanstrantaŭ u dačynieńni da milicyi. Naadvarot, jon pryhadaŭ, jak śpiecnazaŭcy nie davali razychodzicca ludziam, kaža, što mahčymaściaŭ syści z Płoščy ŭ zabłakavanych śpiecnazam ludziej nie było. Raskazvaje, jak śpiecnaz źbivaŭ dziaŭčat i chłłopcaŭ. Hetyja słovy abudziili śpiecnazaŭcaŭ. Jany zaraz uvažliva słuchajuć jaho pakazańni.

12:19

Lichavid raskazvaje, što bačyŭ na Płoščy šmat pabitych ludziej, taksama raskazaŭ pra toje, što jaho samoha źbili z noh, udaryŭšy paru razoŭ u śpinu.

Pałova z 29 śpiecnazaŭcaŭ-śviedkaŭ zadramała.

12:15

Lichavid admaŭlaje, što nanosiŭ udary pa supracoŭnikach milicyi. Paviedamiŭ tolki, što bačyŭ, jak adzin sa śpiecnazaŭcaŭ na jaho vačach zhubiŭ ščyt. Lichavid razam ź inšymi ŭdzielnikami akcyi viarnuli ščyt milicyjantu.

Lichavid śćviardžaje, što nie mieŭ mety paškodzić Dom Urada abo trapić tudy, kaža, što prosta trapiŭ pamiž natoŭpam i Domam Urada. Junak nazvaŭ ideju zachopu Doma Urada hłupstvam.

12:06

Lichavid kaža, što nanosiŭ udary u pieryjad času 5--10 chvilin. Skazaŭ, što vielmi škaduje ab tym, što zdaryłasia - jon nikoli nie dumaŭ, što moža padacca ŭpłyvu natoŭpu.

11.55

Mikita Lichavid praciahvaje raskazvać ab padziejach 19 śniežnia. Havoryć upeŭniena, padrabiazna raskazvaje a tym, što bačyŭ. Havoryć, što praciahvaŭ šukać svaju siabroŭku.

Tym časam tracina sa śviedkaŭ-śpiecnazaŭcaŭ zadramała. Jany schilili hałovy ŭniz albo siadziać prosta pierad sudździoj z zapluščanymi vačami.

11.45

Mikita Lichavid daje pakazańni. Jon raskazaŭ, što na Kastryčnickuju płošču 19 śniežnia pryjechaŭ u 19.50. Ab praviadzieńni akcyi daviedaŭsia sa ŚMI i ad znajomych. Jon paviedamiŭ, što vyrašyŭ pajechać na akcyju paśla taho, jak daviedaŭsia, što tudy źbirajecca jaho siabroŭka, ź jakoj niadaŭna pasvaryŭsia. M.Lichavid taksama paviedamiŭ, što niepakoiŭsia za jaje i heta było adnoj z tych pryčyn, jakija pryviali jaho na Płošču. Adnak tam jamu jaje znajści nie ŭdałosia.

Junak admoviŭsia paviedamlać prakuroru imia siabroŭki. Patłumačyŭ heta tym, što udzielniki Płoščy, jak praviła, majuć prablemy na vučobie i pracy i jon nie chacieŭ by pryčyniać joj škody.

Mikita taksama raspavioŭ, što nie bačyŭ na Kastryčnickaj płoščy ahresiŭnych i pjanych udzielnikaŭ. Z supracoŭnikaŭ pravaachoŭnych orhanaŭ jon bačyŭ tolki supracoŭnikaŭ DAI.

11.35

Sudździa admoviłasia vyzvalić Mikitu Lichavida pad padpisku ab niavyjeździe. Pasiedžańnie praciahnutaje. Zaraz prakuror apytvaje M.Lichavida.

11.15

Padčas pierapynku mama Mikity Lichavida chacieła praz advakata pieradać jamu nievialikuju plašku vady, kab jaje syn moh natalić smahu (u zali vielmi dušna). Achova zabaraniła žančynie heta rabić.

11.05

Vystupiła advakat Mikity Lichavida Darja Lipkina. Jana źviarnułasia da sudździ, z chadajnictvam ab źmianieńni miery strymańnia M.Lichavidu. Taksama vykazała dumku, što razhlad spravy pavinien być prypynieny da času zboru bolšaj kolkaści dokazaŭ viny jaje padabaronnaha.

Abaronca taksama źviarnuła ŭvahu sudździ na stanoŭčyja charaktarystyki M.Lichavida, stan jaho zdaroja (u Mikity chvoryja vočy) i małady ŭzrost — 20 hadoŭ.

Prakuror i paciarpiełyja ź mierkavańniem advakata M.Lichavida nie pahadzilisia. Sudździa pakinuła zalu pasiedžańnia dla pryniaćcia rašeńnia.

10.50

Advakat Mikity Lichavida prosić pierakvalifikavać spravu jaje padabaronnaha. Jana ličyć, što abvinavačańniu nie ŭdałosia dakazać taho, što ŭ Minsku mieli miesca masavyja biesparadki. «Ja źviartaju uvahu vysokaha suda, što fakt masavych biesparadkaŭ moža być ustanoŭleny tolki paśla asobnaha raźbiralnictva», — ličyć advakat. Jana taksama dadała, što pakul fakta masavych basparadkaŭ, što nibyta mieli miesca ŭ Minsku 19 śniežnia, nie ŭstanoŭlena.

10.45

Sudździa N.Pykina admoviłasia zadavolić chadajnictva advakata D.Lipkinaj. Usie 29 śviedkaŭ-milicyjantaŭ buduć śviedčyć na pracesie M.Lichavida. Paŭtornaje chadajnictva advakata junaka taksama było adchilenaje.

Pačaŭ svaju pramovu prakuror. Jon paŭtaraje toje ž, što užo havaryli prakurory na raniejšych pracesach nad udzielnikami Płoščy. Hučać słovy ab masavych biesparadkach, butelkach z haručaj sumieśsiu, uzbrojenym supraciŭleńni supracoŭnikam milicyi, paškodžańni Domu urada. Prakuror abvinavačvaje M.Lichavidu ŭ tym, što jon łamaŭ dźviery Doma urada, akazvaŭ uzbrojenaje supraciŭleńnie śpiecnazaŭcam, biŭ našami i rukami ŭ zaharodžu, prymaŭ udzieł u masavych biesparadkach. Mikita Lichavid svaju vinu pryznaŭ častkova — jon padćvierdziŭ tolki toje, što nanosiŭ udary ŭ draŭlanyja ščyty, jakimi byli zakrytyja vokny Doma urada.

Prakuror taksama apisvaje cialesnyja paškodžańni, jakija atrymali śpiecnazaŭcy na płoščy Niezaležnaści 19 śniežnia 2010 hoda.

10.25

Sudździa ŭsio jašče nie pryniała rašeńnia pavodle chadajnictva advakata M.Lichavida. Zala zapoŭnienaja całkam. Jana adnosna nievialikaja. Mikitu Lichavida achoŭvajuć 4 milicyjanty. U adroźnieńnie ad suda nad hramadzianami Rasii I.Haponavym i A.Breusam, dziejańni žurnalistaŭ jany praktyčna nie kantralujuć — nie pieraškadžajuć razmovam i telefanavańniam.

10.00

Sudździa Natalla Pykina pačała apytvać M.Lichavida. Adnym ź pieršych zapytała, ci vałodaje Mikita rasijskaj movaj i ci moža adkazvać na joj na pytańni. M.Lichavid pahadziŭsia vieści pasiedžańnie pa-rasijsku. Junak adkazvaŭ na pytańni kankretna i ŭpeŭniena, vyhladaje taksama badziora.

Paśla apytańnia padazravanaha sudździa paprasiła ŭstać paciarpiełych. Jany ustali — ich akazałasia 29. Advakat zapiarečyła tamu, što ŭsie 29 supracoŭnikaŭ milicyi mohuć ličycca paciarpiełymi. Raniej tolki 15 ź ich fihuravali ŭ spravie ab masavych biesparadkach. Ź piarečańniami advakata nie pahadziŭsia prakuror, a voś pytańnie sudździ da śpiecnazaŭcaŭ, ci ličać jany siabie paciarpiełymi vyklikała u ich roznahałośsi — častka supracoŭnikaŭ pravaachoŭnych orhanaŭ vykazała žadańnie nie pryznavać siabie paciarpiełymi. Adnak kali sudździa apytała kožnaha ź milicyjantaŭ asabista, to jany usie iznoŭ pahadzilisia być paciarpiełymi.

Zaraz sudździa vyjšła ŭ asobnaje pamiaškańnie dla pryniaćcia rašeńnia pa chadajnictvu advakata M.Lichavida.

9.50

U zalu suda zapuścili žurnalistaŭ. Zachodzić dazvolili prykładna u 9.30. Praź dziesiać chvilin z zali vydalili fotažurnalistaŭ i videapierataraŭ, paśla hetaha pieršyja čatyry šerahi zaniali mocnyja maładyja ludzi. Siarod ich niekalki «paciarpiełych» śpiecnazaŭcaŭ, viadomych pa pracesu nad Breusam i Haponavym.

U zali prysutničajuć naziralniki ad ABSIE, pravaabaroncy, maci Mikity Lichavida, pradstaŭniki niamieckaj i šviedskaj ambasadaŭ.

22 sakavika ŭ sudzie Partyzanskaha rajona Minska pačynajecca praces pa spravie Mikity Lichavida, jakoha abvinavačvajuć va ŭdziele ŭ masavych biesparadkach 19 śniežnia (pa č.2 art.293 KK RB).

Nahadajem, što aktyvist Ruchu «Za svabodu» Mikita Lichavid byŭ zatrymany 19 śniežnia na płoščy Niezaležnaci i asudžany na 15 sutak aryštu ŭ Žodzinskim SIZA. Adnak 23 studzienia pastanova ab aryšcie była admieniena, i Mikita byŭ pieraviedzieny ŭ status abvinavačanaha pa spravie ab masavych biesparadkach. Z Žodzina jaho pieraviali ŭ minskuju «Vaładarku».

Siońnia, u sudzie Maskoŭskaha rajonie Minska, a 13-j hadzinie taksama pačniecca razhlad kryminalnaj spravy Źmitra Daškieviča i Eduarda Łobava.

Maładafrontaŭcaŭ zatrymali 18 śniežnia, pierad samymi prezidenckimi vybarami. Pavodle viersii śledstva, Daškievič, Łazar i Łobaŭ 18 śniežnia 2010 hoda z chulihanskich pamknieńniaŭ biespadstaŭna i naŭmysna, kułakami i mietaličnymi abcuhami źbili dvuch hramadzian. Dzianis Łazar zranku 28 śniežnia byŭ adpuščany na volu i ŭsie padazreńni ź jaho byli źniatyja, sprava ŭ adnosinach da jaho spyniena. Abvinavačańnie Źmitru Daškieviču i Eduardu Łobavu było pradjaŭlena 6 studzienia. Im pahražaje pakarańnie ŭ vyhladzie pazbaŭleńnia voli na termin ad troch da dziesiaci hadoŭ.

***

Abvinavačvanymi pa spravie ab masavych biesparadkach źjaŭlajucca 42 čałavieki. Siamiora ź ich užo asudžany: za ŭdzieł u masavych biesparadkach Vasil Parfiankoŭ pryhavorany da čatyroch hadoŭ pazbaŭleńnia voli ŭ kałonii strohaha režymu; Alaksandr Atroščankaŭ — da čatyroch hadoŭ u kałonii ŭzmocnienaha režymu; Dźmitryj Novik i Alaksandr Małčanaŭ — da troch z pałovaj i troch hadoŭ u kałonii ŭzmocnienaha režymu adpaviedna; hramadzianie RF Arciom Breus i Ivan Haponaŭ — da štrafu ŭ 300 bazavych vieličyniaŭ (10,5 młn. rubloŭ) kožny; Dźmitryj Miadźviedź — da troch hadoŭ abmiežavańnia voli biez nakiravańnia ŭ papraŭčuju ŭstanovu.

• 0
• 0
• 0
• 0
• 0
• 0
• 0
• 0