Apazycyja maje lepšyja šansy pieramahčy, ale baraćba budzie žorstkaj

Siońnia, u pieršy rabočy dzień paśla doŭhich vialikodnych vychodnych, prem'jer-ministar Vialikaj Brytanii atrymaŭ sankcyju karalevy na rospusk parlamenta i abvieściŭ pra pryznačeńnie čarhovych vybaraŭ na 6 traŭnia.

Parlamenckija vybary — klučavyja dla krainy, bo novy parlament budzie farmavać i novy ŭrad.

Asnoŭnaja kankurencyja adbyvajecca pamiž levacentrysckaj Partyjaj pracy (lejbarystami), pravacentrysckaj Kanservatyŭnaj partyjaj i levacentrysckaj Liberalna-demakratyčnaj partyjaj.

Lejbarysty kirujuć krainaju na praciahu ŭžo 13 hadoŭ i patreba ichnaje zamieny ŭžo nazreła. Favarytami na sioletnich vybarach vyhladajuć kanservatary, ichnaja pieradvybarčaja ahitacyja trochi nahadvaje abamaŭskuju rytoryku pra «pieramieny», a lib-demy ŭ značnaj častcy jadnajuć levych vybarcaŭ, što rasčaravalisia ŭ lejbarystach.

Adnak nia ŭsio tak prosta — jašče hod tamu kanservatary mieli, pavodle apytańniaŭ, pieravahu ŭ 20 pracentaŭ, ale z taho času razryŭ skaraciŭsia da 4–10%. Navat ichnyja prychilniki aburajucca tym, što na fonie ekanamičnaha kryzisu kanservatary nia zdoleli sfarmulavać uciamnaj pazycyi ŭ supraćvahu pravaliŭšajsia palitycy lejbarystaŭ. U takich umovach padvyšajecca rola lib-demaŭ jak «treciaj siły». U lubym vypadku, hetyja vybary majuć kudy bolšuju intryhu, čym mnohija papiarednija.

Hałoŭnaj temaj pieradvybarčych dyskusij budzie ekanomika i vychad z ekanamičnaha kryzisu, ad jakoha Vialikaja Brytanija paciarpieła macniej za mnohija inšyja krainy Eŭrapiejskaha źviazu.

jak ža zapuścić ekanomiku biez taho, kab skaracić dla hetaj samaj ekanomiki padatki?

Nas čakajuć čatyry tydnia napružanych debataŭ, chacia ahitacyja tam-siam pačała źjaŭlacca ŭ Londanie ŭžo ź miesiac tamu. Vynik vybaraŭ nie pieradvyznačany, tamu baraćba budzie vielmi intensiŭnaju.

Siońnia ranicaj BBC pryśviaciła čatyry hadziny svajho eteru vyklučna vybaram: išli ŭklučeńni to z Bukinhemskaha pałacu, to z rezydencyi pram'jer-ministra na Downing Street, to z parlamenta ŭ Vestminstery. Nam pakazali vystupy lidaraŭ asnoŭnych partyj, interviju z palitolahami i pradstaŭnikami partyj. Byli ŭklučeńni i z Šatlandyi i Ŭelsa, dzie na pośpiech raźličvajuć partyi miascovych separatystaŭ — Šatlandzkaj nacyjanalnaj partyi i Plaid Cymru.

Brytanskija vybary buduć cikavymi, jaskravymi, vostrymi i, hałoŭnaje, maksymalna prazrystymi i sumlennymi — amal takimi, jakimi jany i pavinny być.

Jak ža nam u Biełarusi daloka da ŭsiaho hetaha.

• 0
• 0
• 0
• 0
• 0
• 0
• 0
• 0