Ryžankoŭ zaklikaŭ Litvu adnavić adnosiny, ale supravadziŭ zaklik hrubaj prapahandaj

Ministr zamiežnych spraŭ Biełarusi Maksim Ryžankoŭ na staronkach dziaržaŭnaha vydańnia «Biełaruś siehodnia» apublikavaŭ vialiki artykuł, u jakim zaklikaŭ da pierazahruzki biełaruska-litoŭskich adnosin, jakija ciapier, pa jaho słovach, «pieražyvajuć najhoršy pieryjad za ŭsiu historyju dvuchbakovych uzajemaadnosin». Adnak artykuł składajecca z prapahandysckich kliše i naŭrad ci budzie ciopła ŭspryniaty ŭ Vilni.

«Nam niama čaho dzialić» — tak nazvaŭ ministr pieršy raździeł svajho artykuła, u jakim nahadaŭ, što «našy ludzi zaŭsiody znachodzili punkty sudakranańnia, siabravali, stvarali siemji, razam zajmalisia sportam, prybytkova handlavali».

Pa jaho słovach, navat niahledziačy na toje, što ŭ kancy XX stahodździa «zamiežnapalityčnyja pryjarytety dźviuch krain razyšlisia, heta nie pieraškodziła vybudoŭvać adnosiny na pryncypach uzajemapavahi».

Biełaruś, śćviardžaje Ryžankoŭ, praciahvaje «paśladoŭna prytrymlivacca» hetaha viektaru ŭ dvuchbakovych adnosinach, a voś aficyjnaja Vilnia «samastojna ci pa padkazcy z boku, vybrała inšy šlach, meta jakoha — źmiena palityčnaha kursa ŭ Biełarusi».

Litoŭskija ŭłady, śćviardžaje ministra zamiežnych spraŭ Biełarusi, raźviazali «niedalnabačnuju hibrydnuju vajnu suprać biełaruskaj dziaržavy i naroda, ź jakim litoŭcy viakami žyli ŭ siabroŭstvie i ŭzajemarazumieńni».

Ministr apisvaje nibyta «harotny» stan litoŭskaj ekanomiki — zabyvajučy skazać, što siaredni zarobak u Litvie ŭ 2,5 raza bolšy, čym u Biełarusi, a vałavy ŭnutrany pradukt na dušu nasielnictva pa parytecie kupčaj zdolnaści pieravyšaje biełaruski ŭžo ŭ 2 razy (50 600 dalaraŭ suprać 25 700).

Ryžankoŭ kancentrujecca na apisańni strataŭ, jakaja Litva paniesła ŭ vyniku ŭviadzieńnia sankcyj suprać Biełarusi i Rasii ŭ adkaz na ŭvarvańnie va Ukrainu. Pramyja straty Litvy ad razryvu suviaziej z našaj krainaj jon aceńvaje ŭ 1 miljard dołaraŭ.

Jon apisvaje źnižeńnie abjomu hruzapieravozak čyhunačnym transpartam, ekspartu i impartu i ahituje: «Kali hladzieć hłybiej, to straty prostych litoŭcaŭ značna vyšejšyja. Pry hetym vy ničoha nie pračytajecie ab hetym na svaich aficyjnych resursach».

«Niaŭžo vam nie patrebny tannyja stabilnyja pastaŭki biełaruskaj elektraenierhii, ceny za jakuju ŭ vašych žyroŭkach pastajanna bjuć rekordy?» — źviartajecca ministr da prostych litoŭcaŭ.

Ekspart elektraenierhii — heta balučaja tema dla łukašenkaŭcaŭ. Jany za rasijski kredyt pabudavali AES, raźličvajučy akupić jaje za košt pastavak elektryčnaści ŭ krainy Bałtyi i Polšču. Adnak vybar placoŭki kala samaj miažy biez uvahi na prośby Litvy nie budavać atamnuju stancyju ŭ takim miescy, a paśla i suŭdzieł u sprobie zachopu Ukrainy zrabili enierhietyčnuju supracu niemahčymaj. Litva ličyć pahrozaj dla svajoj biaśpieki trapić u zaležnaść ad pastavak enierhii ź Biełarusi.

Pobač z zaŭvahaju ab tym, što prostyja litoŭcy stracili ad zakryćcia pahranprachodaŭ i skaračeńnia aŭtobusnych znosin, adčuvajuć ciažkaści z tym, kab trapić na mohiłki svaich rodnych, ministr asnoŭny akcent robić na biznesoŭcaŭ, jakija raniej atrymlivali «značnyja dachody ad dystrybucyi našych tavaraŭ», a ciapier vymušanyja zakryć svaje pradpryjemstvy.

U hetaj častcy svajho artykuła Ryžankoŭ śćviardžaje, što Biełaruś «nie siadzić skłaŭšy ruki» i «dastatkova paśpiachova dyviersifikuje svaje ekanamičnyja suviazi». A voś litoŭskaj ekanomicy jon pradrakaje ciažkija časy ŭ budučyni.

Čaho choča aficyjny Minsk?

«Minsk nieadnarazova davodziŭ da litoŭskaha boku hatoŭnaść da kansultacyj ź Vilniaj pa adnaŭleńni narmalnaha dobrasusiedskaha ŭzajemadziejańnia. My hatovy da adnaŭleńnia kantaktaŭ pa linii pahraničnych i śpiecyjalnych słužbaŭ, halinovych viedamstvaŭ, ministerstvaŭ zamiežnych spraŭ.

Možam pačać pracu pa linii parłamientaryjaŭ, lubych upaŭnavažanych litoŭskich delehacyj. Hatovyja da raspracoŭki darožnaj karty pa razbłakavańni supracoŭnictva pa asobnych napramkach, zrazumieła, na pryncypach pavahi suvierenitetu i niezaležnaści Biełarusi i jaje prava na ŭłasny šlach raźvićcia ŭ supracoŭnictvie z partniorami».

Ryžankoŭ u svaim artykule ŭvieś čas apieluje da «prostych litoŭcaŭ»: «Zaklikaju prostych litoŭcaŭ jak sapraŭdnych nośbitaŭ suvierenitetu svajoj krainy spakojna i racyjanalna razabracca ŭ situacyi i skazać svajo važkaje słova ŭ abaronu cyvilizavanych znosin sa svaimi susiedziami. Kali ŭ vas, viadoma, jašče zastałasia mahčymaść adkryta vykazvać svajo mierkavańnie».

Artykuł usprymajecca jak adrasavany litoŭskim vybarcam napiaredadni parłamienckich vybaraŭ, što adbuducca 13 kastryčnika.

Kirujučaja partyja «Chryścijanskija demakraty — Sajuz Ajčyny» sastupaje ŭ rejtynhach apazicyjnym sacyjał-demakratam. Ale novy ŭrad, chutčej za ŭsio, taksama budzie kaalicyjnym. A ŭ pytańniach zamiežnaj palityki ŭsie asnoŭnyja partyi Litvy dziejničajuć kansensusna. Prarasijskija siły ŭ Litvie małapapularnyja, tamu palityka krainy adnosna vajny va Ukrainie i łukašenkaŭcaŭ naŭrad ci mocna źmienicca paśla farmiravańnia novaha ŭrada. 

• 1
• 1
• 11
• 24
• 1
• 0
• 5
• 0