Maryn Lo Pen: Kali my sfarmujem urad, francuzskich vajskoŭcaŭ va Ukrainie nie budzie

Faktyčny lidar ultrapravych Francyi Maryn Lo Pen zajaviła, što prezident Emanuel Makron nie zmoža adpravić francuzskija vojski va Ukrainu, kali paśla vybaraŭ jaje partyja sfarmuje ŭrad krainy, piša Bi-bi-si.

Raniej Makron nie raz zajaŭlaŭ, što prytrymlivajecca «stratehii niavyznačanaści» ŭ dačynieńni da Rasii i nie vyklučaje adpraŭku va Ukrainu francuzskich vajskoŭcaŭ.

Maryn Lo Pen, u adroźnieńnie ad Makrona, zaniała całkam ćviorduju pazicyju ŭ hetym pytańni, niahledziačy na toje, što farmalna hałoŭnakamandujučym francuzskimi ŭzbrojenymi siłami źjaŭlajecca prezident krainy.

Pavodle jaje, adpraŭka francuskich vojskaŭ va Ukrainu — heta čyrvonaja rysa, jakuju jaje partyja nie dazvolić pierajści.

«Dla prezidenta hałoŭnakamandujučy ŭzbrojenymi siłami — heta hanarovaje zvańnie, pakolki mienavita premjer-ministr kantraluje finansavyja patoki», — zajaviła Lo Pen u intervju haziecie Le Télégramme.

Na pasadzie prezidenta Makron źjaŭlajecca hałoŭnakamandujučym i tradycyjna adyhryvaje klučavuju rolu ŭ mižnarodnaj i abaronnaj palitycy svajoj krainy.

Jon byŭ adnym z tych jeŭrapiejskich lidaraŭ, chto najbolš aktyŭna padtrymlivaje Ukrainu paśla poŭnamaštabnaha ŭvarvańnia Rasii. Jon admoviŭsia vyklučyć mahčymaść adpraŭki vojskaŭ «kali Rasija navažycca pajści dalej», zapeŭniŭšy pry hetym, što Rasija nie zmoža pieramahčy va Ukrainie. Z tych časoŭ jaho padtrymali ŭ hetym pytańni niekalki inšych krain.

Adnak Maryn Lo Pen zajaviła haziecie Le Télégramme, što, na jaje dumku, kali staršynia Nacyjanalnaha abjadnańnia Žardan Bardeła stanie nastupnym premjer-ministram Francyi, mahčymaści prezidenta buduć skaročanyja.

Sajuźnik Makrona Fransua Bajru abvinavaciŭ Lo Pen u tym, što jana stavić pad sumnieŭ paŭnamoctvy prezidenta, praduhledžanyja francuzskaj Kanstytucyjaj, u tym liku pa kiravańni ŭzbrojenymi siłami i Radaj abarony.

Lo Pen adkazała ŭ X, što nie sumniavajecca ŭ paŭnamoctvach prezidenta krainy pa adpraŭcy vojskaŭ za miažu, a tolki nahadvaje, što premjer-ministr kantraluje biudžet i tamu zdolny supraćstajać rašeńniu prezidenta.

«Žardan nie maje namieru svarycca ź im, ale jon paznačyŭ čyrvonuju liniju: prezident nie zmoža pasłać vojski», — patłumačyła jana.

U niadzielu ŭ Francyi projdzie hałasavańnie ŭ pieršym z dvuch turaŭ daterminovych parłamienckich vybaraŭ.

Apošnija apytańni hramadskaj dumki pakazvajuć, što Nacyjanalnaje abjadnańnie patencyjna moža nabrać 36% hałasoŭ, choć jamu moža nie chapić absalutnaj bolšaści, nieabchodnaj dla kantrolu nad parłamientam.

Pavodle jaje słoŭ, kali Nacyjanalnaje abjadnańnie ŭsio ž atrymaje absalutnuju bolšaść u parłamiencie, u Makrona nie budzie inšaha vybaru, jak pryznačyć na pasadu premjer-ministra jaje 28-hadovaha staŭlenika, staršyniu jaje partyi Žardana Bardełu.

Bardeła, zrešty, zajaviŭ, što biez 289 miescaŭ, nieabchodnych dla absalutnaj bolšaści ŭ Nacyjanalnaj asamblei, jon nie pahodzicca stać premjer-ministram u «padviešanym» parłamiencie.

Tydzień tamu Žardan Bardeła zajaŭlaŭ, što całkam padtrymlivaje prava Ukrainy na abaronu i vystupaje za pastaŭki Kijevu bojeprypasaŭ, ale nie rakiet dalokaha radyusu dziejańnia. Pra adpraŭku francuzskich vajskoŭcaŭ va Ukrainu havorki być nie moža, skazaŭ jon tady.

U čaćvier padčas teledebataŭ z premjer-ministram Habryelem Atalem i kandydatam ad levych Aliŭje Foram Žardan Bardeła zajaviŭ, što kali jaho ruchu ŭdasca sfarmavać urad, jon «nie daść rasijskamu impieryjalizmu pahłynuć dziaržavu-sajuźnik, takuju jak Ukraina».

«Maja pazicyja pa hetym kanflikcie vielmi prostaja … jana nikoli nie źmianiałasia. Heta pazicyja padtrymki Ukrainy i paźbiahańnia eskałacyi z Rasijaj, jakaja, nahadvaju, źjaŭlajecca jadziernaj dziaržavaj», — cytuje Bardełu ahienctva AFP.

• 0
• 0
• 2
• 1
• 0
• 1
• 2