Rynak nieruchomaści adčuvaje siabie davoli stabilna. Jak pakazvaje statystyka, kolkaść ździełak raście — jak i ceny.
Što z popytam?
Pa vynikach maja 2024 hoda siaredni košt kvadratnaha mietra ŭ stalicy vyras na 2,4% i skłaŭ 1520 dalaraŭ. Pryčym havorka nie pra prapanovu, a pra realnyja ździełki. Płanka ŭ paŭtary tysiačy za mietr była pieraadolena ŭpieršyniu z 2015 hoda.
Raźbiežka siaredniaj ceny na kvatery pa rajonach Minska vyhladała tak: ad $1313 za kvadrat u Zavodskim rajonie da $1604 u Centralnym.
Ad pačatku hoda siaredni košt kvater u Minsku pa faktyčnych ździełkach pavialičyŭsia na 8%.
Tendencyja rostu maje ŭsio šancy zachavacca, bo maj 2024 hoda staŭ rekordnym pa kolkaści ździełak. Praŭda, nie ŭ absalutnych pakazčykach, a ŭ paraŭnańni z tym ža miesiacam u minułyja hady. Ahułam ža praź vialikuju kolkaść vychodnych majskija abjomy prodažaŭ byli krychu mienšymi, čym sakavickija i krasavickija.
Pa nazirańniach ryełtaraŭ, kala 20% prodažaŭ kvater u Minsku prychodzicca na žycharoŭ rehijonaŭ.
Situacyja ŭ abłasnych centrach
Ale ceny na nieruchomaść rastuć nie tolki ŭ stalicy. Kvatery daražejuć i ŭ abłasnych centrach.
Siaredni košt žytła ŭ Breście, jaki źjaŭlajecca samym darahim abłasnym centram, praciahvaje raści. Pa stanie na 1 červienia jon skłaŭ $936 za mietr. Miesiacam raniej było $925. Ad pačatku hoda ceny na kvatery ŭ Breście vyraśli na 7,2%.
U Hrodnie, jaki zajmaje druhoje miesca pa darahoŭli nieruchomaści siarod abłasnych centraŭ, ceny taksama rastuć.
Pa stanie na 1 červienia mietr u Hrodnie ŭ siarednim kaštavaŭ $824. Miesiacam raniej było $819. Ad pačatku hoda kvatery ŭ Hrodnie padaraželi na 3,8%.
Jak i ŭ vypadkach sa stalicaj, značnuju dolu kupcoŭ nieruchomaści ŭ Hrodnie i Breście składajuć žychary rehijonaŭ.
Inšyja abłasnyja centry taksama pakazvajuć rost cen na kvatery.
Mahiloŭ — plus 4,2% ad pačatku hoda ($801 za m² na 1 červienia).
Homiel — plus 7,3% ad pačatku hoda ($796 za m² na 1 červienia).
Aŭtsajderam siarod abłasnych centraŭ źjaŭlajecca Viciebsk, tam nie tolki samyja nizkija ceny za kvadrat, ale i samy ścipły rost cen. Ad pačatku hoda nieruchomaść u Viciebsku padaražeła tolki na 0,5% i dasiahnuła $743 za m².
Chto skuplaje kvatery?
Ludzi, znajomyja ź situacyjaj na rynku nieruchomaści, adznačajuć, što aproč rehijanałaŭ, jakija čaściakom nabyvajuć nieruchomaść u bujnych haradach dla dziaciej, niemałuju dolu składajuć biełarusy, jakija pracujuć za miažoj.
Bolšaść ź ich, pa nazirańniach pradaŭcoŭ, pracuje ŭ Jeŭropie dalnabojščykami.
Siarod čyńnikaŭ, jakija ŭpłyvajuć na rost cen na nieruchomaść, ekanamisty vyłučajuć źnižeńnie pracentnych stavak pa kredytach na kuplu nieruchomaści. A taksama źnižeńnie stavak pa valutnych układach. Častka ludziej prosta «bietaniruje» svaje źbieražeńni ŭ tym liku praź nizki ŭzrovień davieru da bankaŭ.
U mienšaj stupieni na rost cen upłyvaje popyt z boku zamiežnikaŭ, hałoŭnym čynam rasijan. Pradaŭcy nieruchomaści adznačajuć, što kali intares na nieruchomaść u Biełarusi z boku ŭschodnich susiedziaŭ i padros, to nieistotna.
U davieranaj asoby Łukašenki zabrali biznes pad Hrodnam: «Na paroh vyjšaŭ niejki mužyk i zajaviŭ, što ŭpieršyniu mianie bačyć»2
Kamientary