Za dva hady, pa padlikach analitykaŭ, Rasija straciła bolš za 3000 tankaŭ. Jak doŭha heta moža jašče praciahvacca?
Niamieckaje vydańnie Neue Zürcher Zeitung adznačaje, što ŭ vajnie Rasija štomiesiac hublaje zvyš sta tankaŭ.
Pa padlikach analityčnaj hrupy Oryx, jakija hruntujucca na paćvierdžanych zdymkami faktach, na siońnia ich ahulnaja kolkaść (jak likvidavanych, tak i paškodžanych i stračanych) składaje 3079. Hetaja ličba bolš čym u čatyry razy pieravyšaje kolkaść tankaŭ, jakija jość u arsienale Hiermanii, Francyi i Vialikabrytanii razam uziatych.
Niahledziačy na takija straty, Rasija praciahvaje kidać u boj novyja braniatankavyja kałony. Žurnalisty vydańnia pasprabavali razabracca, jak doŭha heta moža praciahvacca.
Brytanski Mižnarodny instytut stratehičnych daśledavańniaŭ (IISS) pryvodzić ličby, što na pačatak 2022 hoda rasijskaja armija mieła 2927 tankaŭ. Kali paraŭnać ich ź ličbaj stračanych, to stanovicca zrazumieła, što Rasija zdoleła kampiensavać straty jak za košt raskansiervacyi starych zapasaŭ, tak i za košt pavieličeńnia vytvorčaści.
Zachodnija ekśpierty miarkujuć, što za minuły hod rasijskaja armija atrymała da 1500 tankaŭ. Praŭda, bolšaść ź ich skłali raskansiervavanyja tanki, jakija prajšli peŭnuju madernizacyju. Pa acenkach zachodniaha vajskovaha pradstaŭnika, ciapier Rasija vypuskaje tolki 200 novych tankaŭ na hod, što tolki ŭdvaja pieravyšaje davajenny ŭzrovień.
U suviazi z hetym adkaz na pytańnie zaležyć ad taho, kolki jašče starych tankaŭ znachodzicca na zachavańni i kolki ź ich možna adramantavać.
U krasaviku hetaha hoda, pa padlikach ukrainskich analitykaŭ, na rasijskich składach i pierad ramontnymi majsterniami znachodziłasia kala 4500 spraŭnych tankaŭ. U pačatku 2022 hoda hetaja ličba była na 2400 adzinak bolšaj.
Taki padlik adpaviadaje vysnovam IISS i inšych ekśpiertaŭ ab tym, što Rasija za kožny hod vajny zmahła ŭvodzić u ekspłuatacyju pa 1200 tankaŭ sa svaich zapasaŭ.
Kali da ličby ŭ 4500 spraŭnych tankaŭ, što znachodziacca na składach, dadać 2000 tankaŭ, jakija ciapier znachodziacca na ŭzbrajeńni, to atrymajecca 6500. Za apošnija paŭhoda Rasija straciła tolki pa paćvierdžanych krynicach kala 620 adzinak. Kali da ich dadać niezarehistravanyja straty, to ličba moža nablizicca da 650. Atrymlivajecca, što zapasaŭ chopić na 5 hadoŭ.
Pa acenkach ekśpiertaŭ, krytyčnaj dla Rasii situacyja stanie tady, kali kolkaść tankaŭ stanie nižejšaj za 3000. Heta moža nastupić praz 2,7 hoda. Kali nie ŭličvać sastarełych tankaŭ 1950-1960-ch hadoŭ, to praz 2,1 hoda. Za hety čas Rasija zdoleje vypuścić kala 420 novych tankaŭ.
Takim čynam, u krytyčnym punkcie Rasija akažacca letam 2026 hoda. Na pavieličeńnie terminu moža paŭpłyvać pačatak pastavak kitajskich tankaŭ dla Rasii. A skaračeńnie terminu adbudziecca ŭ vypadku, kali Ukraina atrymaje ad Zachadu bolš artyleryjskich snaradaŭ ci supraćtankavych min.
Taksama vielmi imavierna, što staryja tanki, jakija Rasija adnaŭlaje, buduć nižejšaj jakaści. Heta źviazana z tym, što Maskva ŭ pieršuju čarhu zabrała sa składoŭ najbolš zachavanyja ekzemplary.
Ministerstva abarony Rasii, imavierna, razhladaje anałahičnyja scenaryi. Ale nieviadoma, jakuju stratehiju budzie rekamiendavać Kramlu rasijski Hienštab, viedajučy, što ŭ bačnaj pierśpiektyvie moža być stračany nastupalny patencyjał, jaki šmat u čym zaležyć ad najaŭnaj bajavoj techniki, u pryvatnaści tankaŭ.
Čatyrochhadovaja Maja Lubimcava, jakuju šukali bolš za sutki, zahinuła
Kamientary