Eks-načalnik Hienštaba Małdovy źlivaŭ sakretnuju infarmacyju svaim kurataram z HRU Rasii

The Insider atrymaŭ dostup da pierapiski ŭ telehramie eks-načalnika Hienštaba Małdovy Ihara Horhana ź jaho kurataram z HRU Rasii pałkoŭnikam Alaksiejem Makaravym — Horhan rehularna dakładvaŭ ab unutranaj palityčnaj abstanoŭcy ŭ Respublicy. Bolš za toje, jon pieradavaŭ źviestki ab vizitach pradstaŭnikoŭ Minabarony Ukrainy, jakija zakuplali vajskovuju techniku i snarady dla svaich Uzbrojenych sił.

«Małdaŭski suviazny» pracavaŭ u Hienštabie da kanca 2021 hoda, pakul novy prezident Maja Sandu nie adpraviła jaho ŭ adstaŭku. A napiaredadni masavaj vysyłki z Małdovy rasijskich dypłamataŭ-špijonaŭ u lipieni 2023 hoda jon uładkavaŭsia na pracu ŭ AAN. Karystajučysia svaimi starymi suviaziami ŭ Minabarony Małdovy, Horhan zastajecca važnym infarmataram HRU.

Ihar Horhan i Alaksiej Makaraŭ pačali asabliva aktyŭna kantaktavać u krasaviku 2022 hoda, heta značyć užo paśla pačatku poŭnamaštabnaha ŭvarvańnia Rasii va Ukrainu.

Kanfidencyjnyja sustrečy ŭ asnoŭnym prachodzili ŭ kišynioŭskich kafe albo na rybałcy: «Ja mahu sustrecca z kim zaŭhodna, ja čałaviek dziejańnia, treba ruchacca napierad chutčej!!! Treba pajechać na rybałku i ŭsio abhavaryć! My žyviem u histaryčnyja časy! I nam rabić hetuju historyju!» — abviaščaje adzin ź listoŭ małdaŭskaha hienierała.

Miarkujučy pa hetych paviedamleńniach, HRU asabliva cikaviła, jakoje ŭzbrajeńnie Kijeŭ zakuplaje ŭ susiednich krainach, u tym liku ŭ Małdovie.

Hienierał Horhan tut ža dakładvaje: «Ukrainski Ukrabaronekspart sprabuje ŭ Małdovy vykupić (abo zabrać pry dapamozie» partnioraŭ») 6 MiH-29, jakija znachodziacca ŭ Markuleštach. Vielmi mocna nastojvajuć… Pakul samaloty na miescy. Apieracyju chočuć «prakrucić» praz padstaŭnuju firmu z Abjadnanych Arabskich Emirataŭ najbližejšym časam».

U toj ža dzień jašče adno paviedamleńnie: «Čyhunačnyja sastavy z haručym iduć z terytoryi Małdovy, a mienavita ź siała Jotulija — u nasieleny punkt Ukrainy Reni. Skład z palivam ruchajecca tolki nočču, dniom staić na miescy, kab nie stać mišeńniu VKS RF».

«Dziakuj», — adkazvaje pałkoŭnik Makaraŭ.

Čarhovaje pasłańnie kurataru nie prymusiła siabie doŭha čakać: «Ukraincy ŭžo 3 tydni chodziać pa našym Ministerstvie abarony i prosiać usio zapar, asabliva snarady da artyleryi».

Nie davali spakoju ahientu Horhanu i pastaŭki ŭzbrajeńniaŭ va Ukrainu praz Rumyniju, i jon daje parady pałkoŭniku Makaravu: «Treba chutčej pierakryć miažu z Rumynijaj! Heta vialikaja dzirka! Adtul vielmi šmat hruzaŭ pastupaje va Ukrainu. Asabliva vajennych hruzaŭ! U rumyn jašče pracujuć niekatoryja vajennyja zavody pa vytvorčaści ŭzbrajeńnia i bojeprypasaŭ».

Ahient Horhan

Bijahrafija ahienta Horhana vielmi typovaja dla aficera Savieckaj Armii. Jon naradziŭsia ŭ 1969 hodzie ŭ małdaŭskich Dubasarach. Paśla terminovaj słužby pastupiŭ u ahulnavajskovaje vyšejšaje vajennaje vučylišča ŭ Novasibirsku, jakoje skončyŭ u 1991 hodzie. Viarnuŭšysia ŭžo ŭ niezaležnuju Małdovu, Horhan spačatku słužyŭ u pavietrana-desantnaj dyvizii ŭ Adeskaj vobłaści, a zatym — kamandziram 2-j motapiachotnaj bryhady ŭ Kišyniovie.

U 2001 hodzie pierśpiektyŭnaha aficera adpravili na vučobu ŭ kaledž kamandavańnia i Hienieralnaha štaba armii ZŠA ŭ Fort-Livienvorcie. Z 2003 hoda jon udzielničaŭ u mižnarodnych misijach NATA ŭ Bośnii i Hiercahavinie, Hruzii i Iraku.

U 2013 hodzie hienierał zaniaŭ pasadu načalnika Hienieralnaha štaba Małdovy, ale ŭ vyniku kanfliktu z tahačasnym ministram abarony Anatolem Šałary jamu daviałosia pakinuć vajskovaje viedamstva. U 2019 hodzie paśla pieramohi na prezidenckich vybarach staŭlenika Maskvy Ihara Dadona Horhan znoŭ uznačaliŭ Hienštab. U hetym kreśle jon prasiadzieŭ da vieraśnia 2021 hoda, pakul novy prezident Maja Sandu nie adpraviła jaho ŭ adstaŭku.

Miž tym, u Ministerstvie abarony Małdovy zastałosia niamała staŭlenikaŭ Horhana, jakija zabiaśpiečvajuć jaho sakretnaj infarmacyjaj.

Kuratary z HRU

Kali mienavita Horhan vyjšaŭ na pradstaŭnika HRU i prapanavaŭ svaje pasłuhi, vyśvietlić nie ŭdałosia. Krynica The Insider u vajskovaj raźviedcy vykazała zdahadku, što, chutčej za ŭsio, aktyŭnyja kantakty pačalisia ŭ 2004 hodzie, kali Horhan słužyŭ u misii NATO. Prynamsi viadoma, što da pałkoŭnika Makarava jon znachodziŭsia ŭ ahienturnaj suviazi z rasijskim vajskovym ataše ŭ Kišyniovie Vadzimam Uchnalovym.

Da Małdovy hereušnik špijoniŭ u Litvie, ale «tam jon dzieści nakasiačyŭ, i jaho terminova adklikali». Ciapier pałkoŭnik Uchnaloŭ zajmaje pasadu vajskovaha ataše ŭ Kazachstanie, dzie «ŭstalavaŭ aktyŭnyja kantakty siarod vajskovaha kiraŭnictva».

Paśla adjezdu Uchnalova Horhan kuryravaŭ inšy vajenny ataše — Ihar Doŭbnia. U rasparadžeńni The Insider i «maleńkaj krainy» jość zapis telefonnaj razmovy pamiž Horhanam i Doŭbniaj, dzie jany damaŭlalisia sustrecca i «ŭsio abhavaryć» la miemaryjała zahinułym voinam-afhancam u Kišyniovie.

U rasparadžeńni The Insider majucca aŭdyjozapisy razmoŭ Horhana, i pry paraŭnańni jaho hołasu na hetych zapisach z uzorami z adkrytych krynic stanovicca vidavočna, što havoryć adzin i toj ža čałaviek.

U 2017 hodzie Doŭbniu vypravadzili z Małdovy za špijonskuju dziejnaść, ciapier jon uznačalvaje aparat rasiejskich vajskovych ataše ŭ Kyrhyzstanie i aktyŭna naładžvaje kantakty z byłymi aficerami Savieckaj Armii i vieteranskimi arhanizacyjami, jakija pražyvajuć u Biškieku.

Pałkoŭnik Makaraŭ

Z 2019 hoda «šefstva» nad Horhanam pierajšło da pałkoŭnika Makarava, jaki słužyŭ u vajskovym atašacie rasijskaj ambasady. U 2001 hodzie Makaraŭ skončyŭ Maskoŭskaje vyšejšaje ahulnavajskovaje kamandnaje vučylišča, i adtul jaho pieraviali ŭ vajennuju raźviedku.

Małdaŭskija žurnalisty-śledčyja, jakija śpiecyjalizujucca na rasijskim špijanažy, nie raz zaŭvažali hienierała Horhana ŭ rasijskaj ambasadzie ŭ Kišyniovie, a adnojčy — i padčas kanfidencyjnaj sustrečy z Makaravym.

Pavialičyć

U Małdovie ŭsio hatova da ŭvodu rasijskich vojskaŭ:

«Nam terminova treba ačyščeńnie krainy ad usiakaj fašysckaj mrazi!!! Šmat chto hatovy. Pieradajcie … čas pryjšoŭ. Ja ŭsiu situacyju ŭ vojsku trymaju na kantroli… Tut, da radaści, niama «Azova» i inšych nacfarmavańniaŭ, a z palitykami raźbiaremsia chutka». Pamiž ahientam i kurataram skłalisia całkam siabroŭskija adnosiny. Jak hienierał źbiraŭsia razabracca z palitykami, zdahadacca niaciažka.

Napiaredadni masavaj vysyłki rasijskich dypłamataŭ z Małdovy ŭ lipieni 2023 hoda Horhan pierastaŭ vychodzić na suviaź i ŭładkavaŭsia ŭ Pradstaŭnictva AAN pa spravach biežancaŭ u Kišyniovie (UNHCR-Moldova).

Ahienctva biare na ŭlik usich vymušanych pierasialencaŭ z Ukrainy i dapamahaje im z uładkavańniem na novym miescy. Ironija palahaje ŭ tym, što Horhan, jaki jašče niadaŭna prapanoŭvaŭ hereušniku ŭstalavać błakadu Ukrainy, ciapier zajmajecca dastaŭkaj humanitarnaj dapamohi dla ŭkrainskich dziaciej.

• 0
• 5
• 0
• 2
• 1
• 1
• 20