«Ty jak rab: prosta idzieš i robiš heta». Biełarusy, jakija ličać siabie seksaholikami i ćviorda vyrašyli «zaviazać», raskazali pra svoj dośvied

Andrej, 8,5 hadoŭ ustrymańnia: «Čysty seks — jon usio ž taki aduchoŭleny»

Andrej — samy darosły i daśviedčany seksaholik z tych, chto pahadziŭsia pahutaryć z žurnalistami. Mužčynu 54 hady, apošnija 8 ź ich jon chodzić na ananimnyja hrupy i trymaje pad kantrolem svaje seksualnyja žadańni. Udzielniki supolnaści nazyvajuć heta «ćviarozaściu» — tut bačycca poŭnaja anałohija z hrupami ananimnych ałkaholikaŭ i narkamanaŭ.

Pavialičyć

Mužčyna pierakanany, što seksahalizm — takaja ž chimičnaja zaležnaść, jak i astatnija, tolki zamiest psichaaktyŭnych rečyvaŭ zaležnyja «ŭžyvajuć pažadnaść».

Andrej tłumačyć: usia reč u chimii mozhu. Čałaviek padsadžvajecca na vypracoŭku endarfinaŭ i dofaminu, jakija dajuć jamu seks, porna i masturbacyja. Z časam zaležnaść prahresuje, apietyty rastuć, i pastajannaje žadańnie seksu pačynaje pieraškadžać.

Kali z ałkahalizmam 12-krokavaja prahrama pracuje, značyć, jana padychodzić i dla seksaholikaŭ — tak razvažajuć udzielniki supolnaści.

— Seksaholiki atrymali ad supolnaści ananimnych ałkaholikaŭ (AA) dazvoł vykarystoŭvać ich tradycyi i mietady dla vyzdaraŭleńnia jašče ŭ 1979 hodzie. Z tych časoŭ hetaj prahramaj karystajucca va ŭsim śviecie, heta suśvietnaja supolnaść. U Biełarusi pracujuć dźvie hrupy: u Minsku i ŭ Hrodnie, — raskazvaje Andrej.

Na schody ŭ Minsku rehularna prychodziać čałaviek ź dziesiać. Usie sustrečy, naturalna, ananimnyja. Možna nazvać svajo imia, a možna — psieŭdanim. Adkryćciaŭ sa startu nichto nie patrabuje: kali nie chočacca ničoha raskazvać — tvajo prava. Ale zvyčajna ludzi imknucca padzialicca svaim vopytam, kali pačynajuć zdaravieć.

Pavialičyć

Andrej mienavita tak siabie i pazicyjanuje — «seksaholik, jaki papraŭlajecca». Kaliści z dapamohaj padobnaj prahramy mužčyna zaviazaŭ z ałkaholem — i ŭžo amal 20 hadoŭ nie pje. A potym zrazumieŭ, što treba terminova niešta rabić z dakučlivym žadańniem seksu.

Jon užo prajšoŭ z nastaŭnikam uvieś šlach pa 12 krokach i ciapier dapamahaje pačatkoŭcam. A jašče niasie tak zvanaje słužeńnie: vykonvaje ŭ hrupie funkcyi sakratara. Chtości ŭ supolnaści adkazvaje za hrošy, chtości-za litaraturu, chtości — za harbatu ź piačeńkami. Usio na dobraachvotnych pačatkach.

— U jaki momant čałaviek stanovicca seksaholikam? — sa startu sprabujuć namacać miažu pamiž normaj i zaležnaściu.

— Kali pažadnaść stanovicca niekantralavanaj. Voś hladzicie: čałaviek maje siamju, niejkija maralnyja pryncypy, ale ŭ jaho ranicaj seks z adnoj žančynaj, viečaram — z druhoj, potym — z žonkaj, a pierad snom jon jašče idzie na kuchniu z noŭtbukam i masturbuje na parnahrafiju. Heta ja pra siabie, kali što, raskazvaju, — udakładniaje Andrej. — Ci voś siadziš ty na naradzie, abmiarkoŭvaješ važnyja pytańni. Sustreča doŭžycca ŭsiaho paŭhadziny, ale ty ŭvieś čas dumaješ tolki pra toje, kab zajści ŭ svoj kabiniet i zaniacca masturbacyjaj.

Pavialičyć

— Ale jak heta pieraškadžaje žyć? Mastrurbujuć mnohija, i sučasnyja lekary nie bačać u hetym ničoha drennaha.

— Nie ŭsie lekary. Asabista ja złoŭžyvaju pažadnaściu z 8 hadoŭ. I mnie zaŭsiody było ciažka z hetym žyć. U školnyja hady mnie ŭvieś čas chaciełasia masturbavać, ale ja hetaha saromieŭsia, ličyŭ siabie niejkim nikčemnaściu. Ažaniŭsia rana, u 21 hod. Pačalisia pastajannyja zdrady, plus jašče masturbacyja. Mnie składana było skancentravacca na niečym inšym. Ty nie možaš napisać vierš, nie možaš napisać analityčnuju spravazdaču, tamu što ŭ ciabie prosta mazhi nie varać. Pastajanna raśsiejanaja ŭvaha.

Samaje hałoŭnaje — enierhii niama. Vy ŭjavicie: čałaviek žyvie tydzień, i ŭ jaho šeść pałavych aktaŭ kožny dzień. Potym paru dzion pierapynak — i znoŭ taki ž cykł. U ciabie niama sił, źniasileńnie, pastajannaje pačućcio soramu.

Ja adčuvaŭ siabie vielmi drenna, motašna było žyć. Liču, što dajšoŭ da dna, kali da mianie stali prychodzić suicydalnyja dumki.

Andrej pastajanna davaŭ sabie abiacańni, što z zaŭtrašniaha dnia skončyć z masturbacyjaj, ale ničoha nie atrymlivałasia. A voś hrupa dapamahła. Z tych časoŭ mužčyna pierakanany, što adziny sposab spravicca z zaležnaściu — heta mieć znosiny z takimi ž, jak i ty.

— Što takoje ćviarozaść dla seksaholika?

— Jość dva vidy ćviarozaści. Dla chałaściakoŭ heta poŭny celibat, dla čałavieka ŭ šlubie (mienavita ŭ aficyjnym šlubie, hramadzianski nia ličycca) — tolki seks z mužam abo žonkaj. Heta značyć seksualnyja adnosiny z partnioram ličacca ćviarozymi. Choć usio heta vielmi ŭmoŭna, — padkreślivaje Andrej. — Možna i sa svajoj žonkaj užyć pažadnaść, znachodziačysia ŭ niejkaj fantazii. Albo prosta być padvierhnutym niejkaj ekzaltavanaj žarści. Čysty seks — jon usio ž taki aduchoŭleny. U čystym seksie možna, jak heta rablu ja, dumać pra Usiavyšniaha i apiavać śviatyja imiony Hospada. Heta dapamahaje zastavacca čałaviekam padčas koitusu.

Pavialičyć

Andrej nie ličyć, što jahonyja seksualnyja adnosiny z žonkaj stali lepšymi ci horšymi paśla taho, jak jon abraŭ dla siabie ćviarozaść. Ciapier heta prosta seks, jakim mužčyna imkniecca zajmacca nie čaściej čym raz na tydzień («kali chočaš mieć spakojny rozum, čaściej nie treba»).

— Spačatku ćviarozaść była dla vas pakutaj?

— Dla čałavieka, jaki dajšoŭ da dna, takaja pakuta — heta pamiarkoŭna, paviercie. Jašče ŭklučajecca taki miechanizm, što ty pačynaješ radavacca, što ćviarozy ŭžo miesiac, druhi, paŭhoda… Ale, viadoma, žadańnie było i zastajecca. Mnie pa vulicy chadzić ciažka, kali ja baču žančyn. Dvanaccacikrokavaja prahrama i nie dapamoža pierastać chacieć, ciaha nikudy nie źniknie. Ale ciapier ja nie idu za joj.

— Jak vy heta robicie?

— Jość roznyja prahramnyja instrumienty. Naprykład, padziaka. Jak tolki ja adčuvaju ciahu, kažu sabie: «Dziakuju tabie, moj stvaralnik, za spakusu i za pieramohu nad hetaj spakusaj». Pieramohi jašče nijakaj niama, ale ja ŭžo zahadzia ŭdziačny. Tolki na hetym instrumiencie ja pratrymaŭsia paŭtara hoda. Prychodzić pažadnaść-i ja dziakuju. Pažadnaść sychodzić — i ja atrymlivaju svabodu prykładna na 20 chvilin.

Inšy instrumient — heta zvanok takomu ž zaležnamu z prahramy. Ty kažaš: «Vasia, ja zdaju tabie pažadnaść». Vasia adkazvaje: «Dobra, prymaju». Adbyvajecca taki abmien, i mnohim heta dapamahaje. Jašče adzin raspaŭsiudžany sposab — malicca za abjekty svajoj pažadnaści.

Pavialičyć

Paśla paŭtara hadoŭ ćviarozaści piermanientnaja pažadnaść ad mianie adstała. Ciapier byvaje epizadyčna — razoŭ z 5-10 u dzień. Ale ŭžo niama takoj intensiŭnaści, niama takoj častaty. Hrupa asabliva i nie patrebna bolš, tamu što ja pačaŭ praktykavać sapraŭdnuju miedytacyju, jakaja daje mnie ŭ dziesiać razoŭ bolš. Ale mnie škada kidać hrupu, tamu što ja pamiataju, jak šukaŭ jaje ŭ svoj čas.

— Ź jakimi jašče prablemami, akramia dakučlivaj masturbacyi, prychodziać ludzi?

— Z roznymi, uklučajučy hvałtoŭnyja złačynstvy. Jość prynamsi adzin čałaviek, jaki adsiedzieŭ za heta termin. Piedafiła nie było nivodnaha, choć, viadoma, im treba da nas iści. Mahčyma, ź leta ich buduć nakiroŭvać da nas, kali taki dyjahnaz budzie pastaŭleny. Što jašče? Biazładnyja suviazi, luboŭnaja zaležnaść. Žančyny taksama źjazdžajuć z hłuzdu ad niastrymnaha seksualnaha žadańnia, rujnujučy svaje žyćci i siamji. Ich nie tak šmat u nas u hrupie ŭ Minsku, chtości papraŭlajecca ŭ supolnaści seksaholikaŭ anłajn.

Dźmitryj, 4,5 hoda ŭstrymańnia: «Nie było ŭžo ničoha, što mahło mianie ŭzbudzić»

Dźmitryju 28, apošnija niekalki hadoŭ jon viadzie amal manaski ład žyćcia: całkam vyklučyŭ seks i masturbacyju. Ličyć, što inšaha varyjantu ŭ jaho nie było. Dumki pra suicyd stali zanadta dakučlivymi — kali b nie hrupa, jon moh by nie vyžyć.

— Mnie tady było 23 hady, i ja byŭ pry śmierci. Lekary nie viedali, što sa mnoj rabić. U mianie była vielmi mocnaja chraničnaja depresija, jakaja nie prachodziła naohuł nijak. Antydepresanty asabliva nie dapamahali.

Pavialičyć

Seksahalizm u hetaj historyi adyhraŭ vielmi važnuju rolu, tłumačyć Dźmitryj. Tak atrymałasia, što masturbacyja ŭ peŭny momant stała sensam isnavańnia.

— Usio pačałosia ŭ vielmi rańnim uzroście. Mnie było hadoŭ 6. Ja jašče tołkam nie razumieŭ, što adbyvajecca, ale mnie spadabałasia hladzieć porna. Pačaŭ masturbavać, vielmi chutka heta stała štodzionnaj zvyčkaj. Ja zakryŭsia ad ludziej, u tavarystvie adnakłaśnikaŭ mianie nie prymali. Maimi mylicami, ź jakimi ja chadziŭ pa žyćci ŭ školnyja hady, stali videa i masturbacyja.

Ale paśla mnie stała mała zvyčajnych scen. Ja pačaŭ hladzieć niešta bolš ciažkaje: BDSM, fietyšy, hvałt i jašče niekatoryja rečy (nie budu nazyvać). Hadoŭ u 15 mianie ŭžo nie ŭzbudžaŭ kłasičny seks.

Paśla škoły chłopiec vyrašyŭ uciačy ad zmročnych dumak u Maskvu — za novaj pracaj i novymi znajomstvami. Tam sapraŭdy daviedaŭsia šmat novaha: naprykład, što takoje seks za hrošy.

— Ja vydatkoŭvaŭ na prastytutak usie hrošy, jakija zarablaŭ. Nie było hrošaj — prosta hladzieŭ videa doma. Paśla 20 hadoŭ znajšoŭ adzin raździeł parnahrafii, ad jakoha ŭ mianie ŭ pramym sensie źniesła viežu. Ja kožny raz klaŭsia, što nie budu heta hladzieć, bo heta dzika. Ale ništo inšaje ŭžo paprostu nie ŭstaŭlała.

Da 21 hoda sprava pryniała taki abarot, što ŭ mianie ŭvieś čas byli navušniki ŭ vušach. Heta byŭ taki styl žyćcia: pračnucca i hladzieć roliki, pakul nie vyrubišsia, abo zaniacca seksam, kali raptam atrymlivałasia kahości znajści.

Pavialičyć

Chłopiec tłumačyć: jak i lubaja zaležnaść, seksahalizm prahresuje, talerantnaść raście. U niejki momant jon zrazumieŭ, što bolš nie zdolny ŭzbudžacca ad porna.

— Navat samyja dzikija raździeły byli «vypyłasošanyja». Dalej padać było niama kudy. Za paŭhoda da prychodu ŭ hrupu ja ŭžo staŭ faktyčna impatentam. Nie było ničoha, što mahło mianie ŭzbudzić, ja zrazumieŭ, što «pryjechaŭ».

Budavać adnosiny ź dziaŭčatami taksama nie atrymlivałasia. U mianie było takoje ŭjaŭleńnie, što seks = kachańnie, i čym jon bolš žorstki, tym lepš. Ja ž bačyŭ heta ŭ filmach i dumaŭ, što tak i pavinna być. A kali pačynaješ mieć znosiny ź ludźmi, razumieješ, što ich seks nie asabliva cikavić, tym bolš u takich kolkaściach. U mianie heta ŭ hałavie nie ŭkładałasia.

Pavialičyć

Kali Dźmitryj pryjšoŭ na hrupu, vyśvietliŭ, što ciapier jamu daviadziecca žyć u poŭnaj ćviarozaści. Spačatku heta pałochała.

— Ja ž z 6 hadoŭ byŭ «dojnaj karovaj»… Ja isnavaŭ tolki dziela taho, kab vypracoŭvać śpiermatazoidy, i nie razumieŭ, jak biez hetaha žyć. Užo ŭ supolnaści mnie skazali, što arhanizm — mudraja štuka. U im usio praduhledžana: lišniaje vyvodzicca praz kroŭ, i nijakich prablem nie budzie, maksimum — palucyi ŭ śnie. Spačatku, viadoma, dyskamfort prysutničaŭ, bo zvyčka vypracoŭvałasia nie adzin hod i navat nie dziesiać hadoŭ. Ale paśla «abstyniencyi» ŭsio narmalizavałasia.

Chłopiec pryznajecca: praz 40 dzion ustrymańnia jon sarvaŭsia. Miełasia być niaprostaja apieracyja, i lekary trochi zhuścili farby z nahody jaho prahnozaŭ.

— Ja tady znajšoŭ padstavu, kab sarvacca, i syšoŭ u zapoj. Dumaŭ, darečy, što paśla ŭstrymańnia zmahu hladzieć łajtovyja standartnyja roliki, i ŭsio budzie kłasna. Ale viedajecie, kolki prajšło času da taho, jak ja apynuŭsia na tych ža resursach, ź jakich prypoŭz? Usiaho tolki try chviliny…

Niekalki miesiacaŭ ja nie moh spynicca. Nabiraŭ niekalki dzion ćviarozaści i zryvaŭsia. U mianie znoŭ stali źjaŭlacca suicydalnyja dumki… Ale potym u adzin momant ja zmoh skazać sabie «stop» i pačaŭ vykaraskvacca z hetaj jamy. Pry dapamozie inšych ludziej, pry dapamozie hrup.

Pavialičyć

— Vam nie chočacca chutčej ažanicca, kab zajmacca ćviarozym seksam?

— U nas jość strohaje patrabavańnie: hod ustrymańnia paśla prychodu na hrupu. Paśla hoda možna iści ŭ «ćviarozyja spatkańni». Nastaŭnik ciabie viadzie, tłumačyć, što treba rabić, jak siabie pavodzić.

Ja ž, jak seksaholik, nie ŭmieju vybudoŭvać zdarovyja adnosiny. Takoha, kab my razmaŭlali ź dziaŭčynaj, abdymalisia, za ručku chadzili, — nie, u mianie takoha nie było. Siońnia my paznajomilisia — i siońnia zajmajemsia seksam. Na hety momant u mianie było dva «ćviarozyja spatkańni». Ja pakul na šlachu da narmalnych stasunkaŭ.

— Jak źmianiłasia vaša žyćcio za čatyry hady?

— Pieršaje i samaje hałoŭnaje — ja žyvy, a moh užo pamierci. Druhoje — u mianie źjavilisia zachapleńni, jakich raniej nie było. Ja idu na pracu, viartajusia ź jaje, hulaju, hladžu, što adbyvajecca vakoł, što ludzi abmiarkoŭvajuć. Raniej mianie heta naohuł nie cikaviła.

— A ŭzbudžeńnie ŭsio ž taki pieryjadyčna prychodzić?

— Tak, ja ž žyvy čałaviek.

Pavieł, 5 miesiacaŭ ustrymańnia: «U ciabie najmacniejšy apietyt, jaki ty nie možaš zadavolić»

Da svaich 37 hadoŭ Pavieł sabraŭ cełuju kalekcyju z zaležnaściaŭ: jon adnačasova ałkaholik, narkaman i seksaholik. Dadamo važnyja słovy — «jaki papraŭlajecca».

— Pieršaje, ad čaho mnie ŭdałosia admovicca, — heta chimičnyja rečyvy. Dziesiać hadoŭ tamu ja trapiŭ u reabilitacyjny centr, prajšoŭ prahramu vyzdaraŭleńnia i mienavita tam paznajomiŭsia ź ludźmi, jakija žyvuć duchoŭnym žyćciom. Mianie heta pryciahnuła, ja pačaŭ taksama staracca. I ŭ toj momant zrazumieŭ, što, akramia psichaaktyŭnych rečyvaŭ, u mianie jość inšaja prablema — pastajannaja masturbacyja. Raniej ja dumaŭ, što heta norma, što ŭsie tak žyvuć. Ale kali ŭ majo žyćcio pačali ŭvachodzić novyja praviły i duchoŭnyja pryncypy, mnie stała brydka ad hetaha.

Pavialičyć

Jak i papiarednija hieroi, Pavieł pačaŭ masturbavać vielmi rana — hadoŭ u 7-8. Usio svajo junactva jon pravioŭ z karcinkami ŭ hałavie i fantazijami na hetuju temu.

Vy možacie zapiarečyć: heta norma dla padletka, z noh da hałavy prasiaknutaha testasteronam. Ale Pavieł zapeŭnivaje: u jaho vypadku ŭsio zajšło zanadta daloka.

— Mnie ŭvieś čas było mała. Prosta masturbacyi nie chapała, pačaŭsia seks z samim saboj z vykarystańniem roznych pradmietaŭ i inšaj dzikaści. U ciabie najmacniejšy apietyt, jaki ty nijak nie možaš zadavolić.

Z žančynami mnie taksama kožny raz chaciełasia čahości novaha. Ale, naturalna, partniorki nie zaŭsiody byli zhodnyja na ekśpierymienty. Ja sustrakaŭ admovu, heta złavała, ja staraŭsia manipulavać, lubymi sposabami atrymać toje, što ja chaču. Sproby spynicca ni da čaho nie pryviali.

Z časam usio heta vyliłasia ŭ zapojny seksahalizm, raskazvaje Pavieł.

— Viedajecie, jość dva vidy ałkaholikaŭ: zapojnyja i štodzionnyja. Dyk voś, ja zapojny seksaholik. Ja prymaŭ rašeńnie nie ŭžyvać pažadnaść, ale praź niejki čas abaviazkova zryvaŭsia. Hladzieŭ porna, masturbavaŭ — i nie moh spynicca, na praciahu niekalkich dzion, pa sutnaści, zajmaŭsia tolki hetym.

Heta emacyjna źniasilvaje. Ja rablusia jak draŭlany: lanivy taki, apatyčny. Mahu nie vykonvać svaje štodzionnyja abaviazki, ahresiŭny i razdražnialny ŭ znosinach ź ludźmi. Jak harodnina prosta, usie dumki i žadańni pra adno. Ja atručany pačućciom viny, heta nie pieradać słovami.

Ty razumieješ, što ŭsio heta dzikaść, i ničoha nie možaš z saboj zrabić. Jak rab, idzieš i robiš heta. Potym ty dasiahaješ niejkaha emacyjnaha dna i vykaraskvaješsia. A praz čas znoŭ zryvaješsia.

Pavialičyć

U hrupu seksaholikaŭ Pavieł trapiŭ piać hadoŭ tamu — i ŭ davoli adkrytaj formie pačuŭ toje, pra što zaŭsiody staraŭsia maŭčać.

— U nas jość takoje paniaćcie, jak identyfikacyja. Rybak rybaka bačyć zdalok. Heta, viadoma, vyklikaje davier: ty znachodzišsia ŭ supolnaści ludziej z takoj ža prablemaj. Začapiŭsia ja davoli chutka i ciaham dvuch hadoŭ zastavaŭsia całkam ćviarozym, čystym. Ale potym sarvaŭsia — i paŭtara hoda nie moh vybracca. Ale, dziakuj bohu, byccam by mnie znoŭ atrymlivajecca zastavacca ćviarozym — užo kala piaci miesiacaŭ.

— Ci lohka vam dajecca ŭstrymańnie?

— Jość peŭnyja rečy, jakija ja pavinien rabić pa prahramie. I kali ja niešta pierastaju rabić, mianie pačynajuć naviedvać roznyja dumki. Na kahości pahladzieŭ, zatrymaŭ pozirk na vulicy — možna skazać, užo atruciŭsia pažadnaściu, niešta pranikła ŭ majo myśleńnie. I dalej užo sprava techniki, da zryvu niedaloka. Mnie treba pastajanna być napahatovie. Kali da mianie raptam pačynajuć prychodzić nie vielmi dobryja dumki, treba niešta z hetym rabić.

Pavialičyć

— Vam nie škada siabie? Što vy žyviacie biez takoha prostaha zadavalnieńnia?

— U mianie byli takija dumki, kali ja pieršy raz pryjšoŭ u supolnaść. Byli pamknieńni, što mnie abaviazkova treba zavieści siamju, ažanicca i lehalna zajmacca seksam. Ale ni da čaho dobraha heta nie pryviało. Adnosiny ŭ mianie adbylisia, ale ja nie moh u ich znachodzicca (heta ŭžo inšaja historyja). Było škadavańnie da siabie: biedny, niaščasny, u mianie stolki zaležnaściaŭ. Ale ciapier takoha niama. Razumieju, što rablu ŭsio pravilna.

• 0
• 22
• 0
• 8
• 13
• 11
• 7