Śviet88

Terakt u «Krokus Sici Chole» pad Maskvoj. Što viadoma pa stanie na viečar suboty

Kolkaść zahinułych užo pad paŭtary sotni, siarod ciažka paranienych jość biełarus, z zatrymanymi siłaviki abychodziacca pa-bandycku, Pucin abvinavačvaje Ukrainu i ŭsie choram patrabujuć viartańnia śmiarotnaha pakarańnia.

Fota: Investigative Committee of Russia via AP

Na hety momant aficyjnaja kolkaść zahinułych padčas teraktu ŭ kancertnym centry «Krokus Sici Choł» u Krasnahorsku Maskoŭskaj vobłaści składaje 133 čałavieki. Hetaja ličba nazvanaja rasijskim Śledčym kamitetam, ale jana, vidać, nie budzie kančatkovaj. Pavodle inšych krynic, zahinułych užo nie mienš za 150

Siarod paranienych, jakija znachodziacca ŭ balnicy ŭ ciažkim stanie, jość i biełarus — vychadziec z Babrujska Alim Kašavaraŭ. Jon daŭno žyŭ u Maskvie i nibyta pracavaŭ u «Krokusie» achoŭnikam. 

Za 23 sakavika ŭ rasijskich siłavikoŭ źjavilisia padazravanyja i zatrymanyja, ź imi pakazali niekalki videa, jakija vielmi žachlivyja. Asabliva ŭražvaje toje, jak užo schoplenamu i biezabaronnamu zatrymanamu adrazajuć vucha, a paśla sprabujuć jaho skarmić. Inšych zatrymanych pierad tym, jak pakazvać na kamieru, vidavočna taksama katavali, dy i padčas zdymak ź imi abychodziacca tak, što ŭźnikajuć vialikija sumnievy ŭ ščyraści i niazmušanaści ich pryznańniaŭ u ździejśnienym. Usie zatrymanyja — ludzi z paŭdniovaj źniešnaściu, jakija kiepska havorać pa-rasiejsku.

Adnosna ich nacyjanalnaj i dziaržaŭnaj prynaležnaści infarmacyja supiarečlivaja: havaryłasia i pra toje, što jany z Tadžykistana, i pra toje, što jany majuć rasijskaje hramadzianstva. Pavodle apošniaha paviedamleńnia rasijskaha MUS, rasijskaha hramadzianstva zatrymanyja nie majuć, a jakoje kankretna majuć — pakul nie ŭdakładniajecca. Na niekatorych hramadzian Tadžykistana rassyłali aryjenciroŭku, u tym liku, jak śćviardžaje «Biełpoł», i ŭ Biełaruś, ale prynamsi niekatoryja ź pieraličanych u aryjenciroŭcy asob majuć alibi, bo znachodzilisia ŭ čas teraktu na radzimie. MZS Tadžykistana nazvała infarmacyju pra datyčnaść da teraktu svaich hramadzian fejkam.

Čatyroch padazravanych u niepasrednym vykanańni teraktu zatrymali kala vioski Chacuń na Branščynie, jany jechali na biełym «Reno». Rasijskija prapahandysty i čynoŭniki z padačy samoha Pucina, jaki narešcie vystupiŭ sa zvarotam z nahody terakta praz 19 hadzin paśla jaho ździajśnieńnia, śćviardžajuć, što jany kiravalisia ŭ bok Ukrainy, dzie nibyta dla terarystaŭ byŭ pryhatavany prachod praz ukrainskija ŭmacavańni. Uvohule vyhladaje, što ŭ Kramli dali ŭkazańnie dziaržaŭnym i łajalnym uładzie ŚMI padkreślivać u terakcie «ŭkrainski śled», što mnohija pačali rabić jašče ŭčora, niahledziačy na toje, što aficyjnaj infarmacyi ŭvohule jašče amal nie było. Ukraina rašuča abviarhaje zakidy ab svajoj datyčnaści da teraktu.

Usiaho ž, jak dałažyła FSB Pucinu, pa hetaj spravie ŭžo zatrymanyja 11 čałaviek.

Miž tym adkaznaść za jaho nastojliva žadaje ŭziać na siabie t. zv. «Isłamskaja dziaržava». Jana zajaŭlała pra heta ŭčora, a siońnia znoŭ paŭtaryła. Arhanizacyja śćviardžaje, što 22 sakavika jaje bajeviki nibyta «raspačali skaardynavanuju ataku na vialiki natoŭp chryścijan». Taksama IDIŁ apublikavała hrupavoje fota mierkavanych terarystaŭ. Ich tvary zaretušavanyja, ale koler, kroj i prynt na vopratcy dvaich ludziej na fatahrafii supadaje z adzieńniem zatrymanych pa padazreńni ŭ ździajśnieńni teraktu.

Miž tym rasijskija čynoŭniki i deputaty adzin za adnym zaklikajuć viarnuć u rasijskaje zakanadaŭstva mahčymaść vykonvać śmiarotnyja prysudy. Jašče ŭčora da hetaha faktyčna zaklikaŭ Dźmitryj Miadźviedzieŭ, a siońnia hetaja dumka hučyć masava. Kiraŭnik frakcyi «Adzinaj Rasii» ŭ Dziarždumie Uładzimir Vasiljeŭ paviedamiŭ, što «pa śmiarotnamu pakarańniu my prymiem rašeńnie, jakoje budzie adpaviadać nastrojam i čakańniam našaha hramadstva».

Miž tym na Biełaruś situacyja z teraktam u Rasii ŭpłyvaje samym niepasrednym čynam. U minskim mietro ŭ suviazi ź im uzmacnili miery biaśpieki. U Pałacy Respubliki admianili zapłanavany na siońnia kancert «Biełaruś — maja pieśnia».

Uvohule ministr unutranych spraŭ Biełarusi Ivan Kubrakoŭ paviedamiŭ, što anałahična robicca šmat dzie:

«Vyznačanyja abjekty, jakija patrabujuć pavyšanaj uvahi. Pavialičanaja ščylnaść naradaŭ, jakija dla zabieśpiačeńnia efiektyŭnaści ŭzmocnienyja bajcami AMAP. Supracoŭniki dadatkova ŭzbrojenyja aŭtamatyčnaj zbrojaj».

A pasoł Biełarusi ŭ Rasii Dźmitryj Kruty zajaviŭ, što biełaruskija śpiecsłužby, maŭlaŭ. dapamahali łavić strałkoŭ z «Krokusa», kab nie dać terarystam «pajści praz našu ahulnuju miažu».

«Aktyŭnaje ŭzajemadziejańnie ź piatnicy ažyćciaŭlajecca pa linii śpiecyjalnych słužbaŭ. Kiraŭnik Kamiteta dziaržbiaśpieki znachodzicca ŭ pramoj suviazi sa svaim kaleham. I faktyčna asnoŭnaj zadačaj minułaj nočču było nie dać terarystam pajści praz našu ahulnuju miažu. Takaja zadača vykananaja», — skazaŭ Kruty.

Choć, kali vieryć Pucinu, jechać u Biełaruś terarystam patreby nijakaj i nie było, kali dla ich było zroblena «akno» na rasijska-ŭkrainskaj miažy.

Kamientary8

  • Babior
    23.03.2024
    Dy słon ja, słon, tolki chopić bić botami.
  • Śviedka
    23.03.2024
    Fakt, zato jeść videa, jak adrazajuć vucha čałavieku
  • Čarkaškvarka
    23.03.2024
    Zabrachalisia pucinisty i łukašysty.

Dar‘ja Łosik vyjšła na svabodu pa pamiłavańni16

Dar‘ja Łosik vyjšła na svabodu pa pamiłavańni

Usie naviny →
Usie naviny

Palitviazień Dzianis Ivašyn prysłaŭ baćkam parady, jak pieražyć śpioku: Nijakich vychadaŭ u ciaplicu

50 dzieciam admovili. U biełaruskamoŭnaj himnazii Vilni zamała miescaŭ, baćki prosiać nabirać bolš kłasaŭ11

Iłan Mask zajaviŭ, što zhubiŭ syna z-za błakataraŭ pałavoha vyśpiavańnia24

U Franciška Skaryny ŭ Prazie skrali piaro — heta zdaryłasia nie ŭpieršyniu3

Zamiežniki pišuć u sacsietkach, što źbirajucca ŭ Biełaruś pa biaźvizie. A ich uprošvajuć pieradumać11

Paŭła Łatušku vyklikali ŭ polskuju prakuraturu2

Rasijski vajskoviec, jakoha nibyta siońnia ŭzarvali ŭ Maskvie: Ja žyvy, siadžu na pracy

Śpievaka — pastajannaha ŭdzielnika aficyjnych kancertaŭ — buduć sudzić za pratesty1

Siaredni zarobak u červieni vyras na 50 rubloŭ, ale nakolki jon adlustroŭvaje realnuju situacyju?

bolš čytanych navin
bolš łajkanych navin

Dar‘ja Łosik vyjšła na svabodu pa pamiłavańni16

Dar‘ja Łosik vyjšła na svabodu pa pamiłavańni

Hałoŭnaje
Usie naviny →