Usiaho praź miesiac paśla taho, jak vajskoŭcy Nihiera zrynuli prezidenta, padobnyja padziei adbylisia ŭ Habonie. U vyniku kolkaść vajskovych pieravarotaŭ u krainach Afryki na poŭdzień ad Sachary z 2020 hoda dasiahnuła dzieviaci. Čamu tak adbyvajecca i jakija nastupstvy?
Jak piša Bloomberg, padziei ŭ Habonie rušyli ŭśled za vajskovym pieravarotam u Nihiery, dvuma ŭ Mali (2020 i 2021) i Burkina-Faso (studzień i vierasień 2022 hoda) i Hviniei (2021). Lidar Sudana byŭ zrynuty ŭ 2021 hodzie. U tym ža hodzie vajskoŭcy Čada zamianili zahinułaha prezidenta jaho synam, hienierałam armii.
Jak śćviardžaje vydańnie, usie hetyja pieravaroty mieli svaimi pryčynami ekanamičny kryzis i słaboje kiravańnie, što vyklikała rasčaravańnie siarod nasielnictva i — asabliva ŭ Zachodniaj Afrycy — raspaŭsiudžvańnie ekstremizmu. Adnak, niahledziačy na zajavy novych lidaraŭ ab tym, što jany zmahajucca ź niestabilnaściu, kolkaść zabitych u rehijonie Sachiel rezka ŭzrasła ŭ pieršaj pałovie hoda.
Vydańnie nahadvaje, što ŭ vyniku pieravarotaŭ u Mali i Burkina-Faso ich urady byli zamienienyja chuntami, varožymi svajoj byłoj mietrapolii — Francyi, jakaja na praciahu dziesiacihodździa viała baraćbu z ekstremizmam u rehijonie. Hetyja krainy vyhnali francuzskija vojski i naniali najmitaŭ hrupy «Vahnier».
U vyniku Nihier staŭ najvažniejšym rehijanalnym sajuźnikam Zachadu, ale paśla pieravarotu ŭ lipieni hetaha hoda novaja vajskovaja chunta ŭ hetaj krainie abjaviła ab anulavańni ŭsich pahadnieńniaŭ z Francyjaj u halinie biaśpieki i vajskovych pytańniaŭ.
Paśla pieravarotu ŭ Nihiery ŭtvaryŭsia pojas krain pad kiravańniem vajskoŭcaŭ, jaki raspaścirajecca ad Atłantyčnaha akijana da Čyrvonaha mora. Bolšaść z hetych krain bolš ciesna źviazana z Rasijaj, čym z Zachadam.
Što ŭ Habonie
Adnak vyklučeńnie składaje Habon — kraina, jakaja pa danych AAN maje samy vysoki indeks čałaviečaha raźvićcia ŭ krainach Afryki na poŭdzień ad Sachary.
Jak piša Le Monde sa spasyłkaj na svaje krynicy, padziei ŭ Habonie — «pałacavaja revalucyja». Hienierał Brys Alihui Nhiema, jaki abvieščany prezidentam pierachodnaha pieryjadu, «zaŭsiody byŭ łajalnym prezidentu, a nie jaho žoncy i synu, jakija kiravali Habonam pa davieranaści».
Zhadvajecca, što maci Nhiema — stryječnaja siastra byłoha prezidenta Amara Bonha Andzimba. A sam Alihui Nhiema byŭ jaho apošnim adjutantam.
Kali pra zrynutaha prezidenta Ali Bonha Andzimba było abvieščana, što jon «pajšoŭ na piensiju», to jaho syn Nuredzin Bonha Valancin byŭ aryštavany pa abvinavačańni ŭ «dziaržaŭnaj zdradzie», «masavym kradziažy dziaržaŭnych srodkaŭ» i «handli narkotykami».
U adroźnieńnie ad inšych dziaržaŭ, vajskoŭcy ŭ Habonie zajavili ab praciahu supracoŭnictva z Francyjaj.
Ekanamičnyja nastupstvy
Niekatoryja z krain majuć vialikija zapasy karysnych vykapniaŭ. Tak, u Sudanie znachodziacca radoviščy zołata, marhancu, kremniju i ŭranu. Pa danych Suśvietnaj jadziernaj asacyjacyi, Nihier źjaŭlajecca druhim pa vieličyni vytvorcam uranu ŭ Afrycy i ekspartuje bolšuju častku svajoj pradukcyi ŭ Francyju. U minułym hodzie tut było vyrablena 2020 ton mietału.
Bahaty svaimi nietrami i Habon. Akramia nafty, kraina źjaŭlajecca druhim vytvorcam marhancu ŭ śviecie paśla Kitaja.
Jak adznačajuć analityki, u bolšaści krain, jakija paciarpieli ad vajskovych pieravarotaŭ u rehijonie ŭ apošnija hady, nie adbyłosia surjoznych źmien u zdabyčy karysnych vykapniaŭ, niahledziačy na źmienu ŭłady.
Čytajcie jašče:
Vajskoŭcy ŭ Nihiery abviaścili pra źviaržeńnie prezidenta
Rasija vyciskaje Francyju ź jašče adnoj bahataj resursami afrykanskaj krainy
«Siarhiej» nie adzin. Voś jak KDB prapanuje zarabić na sačeńni za biełaruskimi emihrantami2
Kamientary