NAU pieradało ŭ Haahu dokazy vajennych złačynstvaŭ Łukašenki i jahonych prychilnikaŭ
Kiraŭnik Narodnaha antykryzisnaha ŭpraŭleńnia Pavieł Łatuška paviedamiŭ, što NAU pieradało ŭ Mižnarodny kryminalny sud u Haazie materyjały, jakija dakazvajuć ździajśnieńnie Alaksandram Łukašenkam i asobami ź jaho atačeńnia vajennych złačynstvaŭ.
U jakaści fihurantaŭ, akramia samoha Łukašenki, vystupajuć taksama dziaržsakratar «Sajuznaj dziaržavy» Dźmitryj Mieziencaŭ, kiraŭnik «Biełaruśkalija», člen Savieta Respubliki Ivan Hałavaty, člen paralimpijskaj zbornaj Biełarusi Alaksiej Tałaj i dyrektar danieckaj hramadskaj arhanizacyi «Delfiny» Volha Vołkava.
Zhodna z materyjałami, sabranymi NAU, usie hetyja ludzi «ździejśnili vajennyja złačynstvy», jakija prajavilisia ŭ «niezakonnym pieramiaščeńni ŭkrainskich dziaciej z akupavanych Rasijaj terytoryj u Biełaruś i ich pieraadukacyi».
Na siońnia, jak śćviardžaje NAU, u Biełaruś vyvieźli bolš za 2100 dziaciej. Vyvozili ich z akupavanych Rasijaj haradoŭ na ŭkrainskim Danbasie.
U dakładzie zafiksavanyja padrabiaznyja maršruty i sposaby pieramiaščeńnia ŭkrainskich dziaciej: z akupavanych terytoryj Ukrainy ich nakiroŭvali na terytoryju Rasii (u Rastoŭ-na-Donie), a dalej — u Biełaruś (u Minsk i da miescaŭ raźmiaščeńnia), dzie sialili ŭ dziciačych łahierach.
Najbolšuju kolkaść takich dziaciej, zhodna z dakładam, vyvieźli ŭ łahier Dubrava, jaki naležyć kampanii «Biełaruśkalij». Sudu pieradali dokazy taho, što kiraŭnik «Biełaruśkalija» Ivan Hałavaty asabista addavaŭ rasparadžeńni ŭ piśmovym vyhladzie, jakija vyznačajuć los hetych dziaciej u Biełarusi. Taksama sudu pieradali śviedčańni pra klučavuju rolu Mieziencava, Tałaja i Vołkavaj u niezakonnym pieramiaščeńni ŭkrainskich dziaciej u Biełaruś.
Va Ukrainie i na Zachadzie prymusovy vyvaz ukrainskich dziaciej u Rasiju i Biełaruś traktujecca jak vajennaje złačynstva. Mižnarodny kryminalny sud akurat za heta vydaŭ ordary na aryšt prezidenta Rasii Uładzimira Pucina i ŭpaŭnavažanaj pa pravach dziciaci pry prezidencie RF Maryi Lvovaj-Białovaj.
Biełaruskija demakratyčnyja siły dabivajucca taho, kab anałahičnyja kroki byli zroblenyja i ŭ dačynieńni da Alaksandra Łukašenki.
Kubrakoŭ davodziŭ, što milicyjant Zhirski nie datyčny da bandy nalotčykaŭ. Ciapier taho sudziać — pahražaje da 20 hadoŭ3
Kamientary