U Prykarpaćci razmnožylisia zialonyja papuhai. Zdajecca, chutka jany raśsielacca i na poŭdni Biełarusi
Ekzatyčnaja ptuška za paŭtara hoda nastolki raspaŭsiudziłasia ŭ Čarnaŭcach va Ukrainie, što pačynaje stanavicca prablemaj dla miascovaj faŭny.
Jak paviedamlajuć sacyjalnyja sietki, papuhai dobra siabie adčuvali hetaj zimoj u Čarnaŭcach i susiednich vioskach. A jašče ŭ 2022 hodzie mer horada vykłaŭ fota papuhajaŭ na haradskich drevach. Ciapier jany stali zvyčajnaj haradskoj ptuškaj.
Heta invaziŭny vid papuhajaŭ — papuhaj Kramiera, ci indyjski kolčaty papuhaj. Hetaja ptuška vytrymlivaje choład da minus 20 hradusaŭ marozu i ŭsiojednaja. Jana moža charčavacca adkidami sa śmietnicy. Heta adziny papuhaj, jaki žyvie adrazu ŭ dźviuch častkach śvietu. Zvyčajnym areałam raśsialeńnia hetaha vidu papuhajaŭ źjaŭlajecca Paŭdniovaja Azija i šerah rajonaŭ Afryki.
Adnak nie treba śpiašacca radavacca. Jany ŭjaŭlajuć taksama niebiaśpieku dla miascovych ekasistem, parušajučy isnujučy mižvidavy bałans i akazvajučy surjozny cisk na niekatoryja miascovyja vidy ptušak. Papuhai zajmajuć dupły, dzie pryvykli hniezdavacca inšyja ptuški-staražyły, asabliva dziatły. Navat papulacyi kažanoŭ ad ich vielmi pakutujuć, bo hetyja papuhai taksama ich «vysialajuć» z damoŭ.
Treba adznačyć, što papuhai Kramiera žyvuć kałonijami ci vialikimi hrupami. Arnitołahi paraŭnoŭvajuć hetuju ptušku z kałaradskim žukom, jaki taksama spačatku byŭ ekzotykaj, a paźniej staŭ asnoŭnym voraham paletkaŭ bulby i inšych paślonavych raślin.
Śpiecyjalisty adznačajuć, što hetych ptušak usio čaściej možna ŭbačyć u roznych miescach Jeŭropy, dzie ich raniej nie było.
U Łondanie papuhai apošnija hady pačali ŭjaŭlać surjoznuju prablemu dla horada, nanosiačy škodu pasadkam kulturnych pładovych dreŭ. Bolš za toje, papuhai Kramiera pačali chutka vyciaśniać spradviečnyja brytanskija vidy ptušak ź ich ekałahičnych nišaŭ. Niebiaśpieku ŭjaŭlaje taksama i toje, što papuhai mohuć raznosić zachvorvańni ptušak.
Jak raskazali niadaŭna «Našaj Nivie» miascovyja žychary, papuhajaŭ užo zaŭvažyli i ŭ adnym z rajonaŭ Bieraściejščyny.
Čytajcie jašče:
Jak adpudzić kunicu — hety źviarok miły, ale ad jaho byvaje stolki prablem
Kamientary