Ekskursavodku Aksanu Mankievič asudzili da 3 hadoŭ chatniaj chimii

Prysud vyniesła Viktoryja Šabunia. Paśla troch miesiacaŭ u SIZA Aksanu vyzvalili ŭ zale suda, piša «Viasna».

Mankievič nie zmoža bolš u Biełarusi pracavać ekskursavodkaj, bo, pavodle pastanovy ŭrada ad 7 śniežnia, z novaha hoda ekskursavodami nie zmohuć pracavać tyja, kaho sudzili pa «pratesnych» kryminalnych artykułach.

Aksanu zatrymali 14 vieraśnia ŭ Minsku ŭ miežach kryminalnaj spravy ab hrupavych dziejańniach, jakija hruba parušajuć hramadski paradak (art. 342 KK). Na praŭładnych kanałach źjaviłasia videa ź joj, na jakim dziaŭčyna kaža, što «prymała ŭdzieł u masavych mierapryjemstvach u 2020 hodzie, a taksama vychodziła na darohu z BČB-ściaham». 

U 2021 hodzie Aksanu aryštoŭvali ŭ miežach administracyjnaj spravy dva razy. Pieršy raz heta adbyłosia naprykancy studzienia 2021 hoda — tady Aksanu zatrymali z cełaj ekskursijnaj hrupaj i asudzili pavodle art. 23.34 KaAP (niesankcyjanavanaje masavaje mierapryjemstva). Aksanu aryštavali na 15 sutak, inšych udzielnic ekskursii asudzili taksama da aryštaŭ i štrafaŭ. 

Druhi raz Aksanu zatrymali 2 listapada 2021 hoda na padstaŭnoj ekskursii, jakuju zamoviŭ supracoŭnik HUBAZiKa. Na vychadnych joj patelefanavaŭ małady čałaviek, nazvaŭsia Alaksiejem i zamoviŭ ekskursiju dla svajoj dziaŭčyny. Jany damovilisia sustrecca ŭ 11 hadzin 2 listapada na płoščy Svabody, 4. Kali Aksana pryjšła ŭ pryznačanyja miesca i čas, to nie ŭbačyła nijakaj dziaŭčyny. Padyšoŭ małady čałaviek, pakazaŭ paśviedčańnie i akazałasia, što heta i byŭ toj Alaksiej, jaki zamaŭlaŭ ekskursiju. 

«Spačatku niešta skazaŭ pra słužbovy aŭtamabil, ale potym skazaŭ, što chutčej budzie pieššu dajści. I ja zrazumieła, kudy my pojdziem, bo pobač Revalucyjnaja, 3 [tam znachodzicca budynak HUBAZiKa]». 

Pa słovach Aksany, tam u jaje zapatrabavali ŭvieści parol na telefonie, kab jaho razbłakavać. Z-za chvalavańnia jana nie mahła ŭspomnić. Praz toje, što niekalki razoŭ prykładvali palec, parol źbiŭsia. Potym usio ž taki ŭskryli telefon, ale ničoha patrebnaha tam nie vyjavili. Dziaŭčynie ŭ HUBAZiKu prapanavali zapisać videa, ale jana admoviłasia, bo «nie razumieła, u čym treba kajacca». Paśla hetaha supracoŭniki pajechali da Aksany dadomu i praviali pieratrus. Paśla hetaha jany viarnulisia ŭ HUBAZiK i pavieźli Aksanu ŭ Centralnaje RUUS. 

«Tam pryparkavalisia kala tratuara. Jany bačyli, što ja adekvatna siabie pavodžu i navat nie trymali mianie za ruku. Prajšli spakojna razam u RUUS». 

U vyniku jaje aryštavali na 15 sutak za niepadparadkavańnie milicyjantam pavodle art. 24.3 KaAP. Zhodna z pratakołam, Mankievič 2 listapada ŭ 15:10 na vulicy Arłoŭskaj 58/1 «akazała niepadparadkavańnie Aleksandroviču, admoviłasia prajści ŭ RUUS pa fakcie raźbiralnictva pa padazreńni ŭ zachoŭvańni ekstremisckich materyjałaŭ, upirałasia nahami, chapała za formiennaje abmundziravańnie».

• 0
• 0
• 0
• 0
• 0
• 0
• 8
• 0