Paplečnika Hajdukieviča sudziać za miljon dalaraŭ. Jon kazaŭ, što nie razumieje, čamu ŁDP nazyvajuć partyjaj zładziejaŭ
18 listapada ŭ sudzie Maskoŭskaha rajona Minska praciahnuŭsia praces pa spravie biznesoŭcy Alaksandra Kosača, viadomaha arhanizatara kancertaŭ. Zajmaŭsia Kosač i palitykaj: jon nie prosta byŭ čalcom libieralna-demakratyčnaj partyi Biełarusi, ale i najbližejšym paplečnikam lidara partyi — deputata Aleha Hajdukieviča. Ciapier mužčynu abvinavačvajuć u machlarstvie i karupcyi, śledstva naličyła sumy zvyš miljona dalaraŭ. Kosač sam bałatavaŭsia ŭ parłamient u 2019 hodzie. Tady ŭ intervju jon ščyra aburaŭsia, maŭlaŭ, nie razumieje, čamu ŁDP nazyvajuć «partyjaj žulikaŭ i zładziejaŭ». Ironija ŭ tym, što kali vieryć śledstvu, to ŭ toj momant jon sam užo ździejśniŭ niekalki surjoznych złačynstvaŭ.
Alaksandr Kosač na sustrečy z vybarcami ŭ 2016 hodzie. Fota dzerginsk.by
«Robim usio, kab imidž partyi byŭ pazityŭnym»
Alaksandru Kosaču 44 hady, jaho viedajuć jak zasnavalnika i dyrektara kancertnaha ahienctva Jet Sounds, arhanizatara viečarynaŭ i fiestyvalaŭ «Rok za babroŭ», Bright Fest, Armin Only, Transmission, MayDay Belarus, «Kosmas naš!» i inšych.
A jašče jon byŭ siabram Libieralna-demakratyčnaj partyi, časta supravadžaŭ na sustrečach lidara partyi Aleha Hajdukieviča.
Aleh Hajdukievič vystupaje na pieradvybarčym kancercie kandydata Kosača ŭ Dziaržynsku. Fota dzerginsk.by
Alaksandr Kosač dvojčy vyłučaŭsia kandydatam na parłamienckich vybarach. U 2016 — u Dziaržynsku, na sustrečy z vybarcami razam ź im pryjazdžaŭ Hajdukievič:
«My siudy pryjechali zrabić vam śviata. I ja vam abiacaju, što niezaležna ad taho, jaki budzie vynik na vybarach, naš kandydat Kasač, cudoŭny čałaviek, budzie vam rabić śviaty pastajanna».
Tady jon prajhraŭ praŭładnamu kandydatu Juryju Łobaču, jaki ŭznačalvaŭ budaŭničaje pradpryjemstva «Darbudindustryja». U 2019-m Kosač vyrašyŭ pasprabavać udaču ŭ Łahojsku. Voś što pra jaho kazaŭ tady Hajdukievič:
«Što da bujnoha biznesu i pradprymalnikaŭ, to jany ŭ mianie išli na vybary. Naprykład, Kosač Alaksandr — najbujniejšy arhanizatar kancertaŭ u Biełarusi, u mianie ludzi išli ź vialikim pachodam, asabliva ŭ Minsku, i ja liču, heta dobra».
Ale jahony paplečnik iznoŭ prajhraŭ kandydatu ad ułady, dziejnamu deputatu Piatru Vabiščavu. Tady, u listapadzie 2019-ha, u Kosača pytali, čamu niekatoryja nazyvajuć libieralna-demakratyčnuju partyju Biełarusi «partyjaj žulikaŭ i zładziejaŭ».
Tut varta zhadać, što čalcy ŁDPB prachodzili fihurantami kryminalnych spraŭ. Naprykład, u 2018 hodzie za machlarstva i karupcyju asudzili namieśnika staršyni partyi Uładzimira Karunasa. U 2019 hodzie sudzili kiraŭnika Viciebskaj abłasnoj arhanizacyi ŁDPB Siarhieja Jarmykina — za machlarstva.
Alaksandr Kosač tady rašuča abviarhaŭ suviaź partyi z kryminałam:
«Nasamreč heta niedarečnaje abvinavačvańnie. Mnie ciažka adkazvać za dumki inšych ludziej. My skancentravanyja na svajoj pracy. Robim usio, kab imidž partyi byŭ pazityŭnym. Mnie nieviadomyja fakty, jakija mohuć śviedčyć, kab nas tak nazyvali. Heta ŭstojlivy vyraz, jaki tyčycca inšaj partyi ŭ inšaj krainie (havorka pra «Jedinuju Rośsiju» — zaŭv. «NN»). Nie viedaju, z čaho heta čaplajuć da našaj partyi».
Siońnia Kosača sudziać pa tych ža artykułach, što Karunasa i Jarmykina.
Miljony dalaraŭ, machlarstva i karupcyja
Spravu Alaksandra Kosača razhladaje sudździa Siarhiej Kacar. Kosač byŭ zasnavalnikam i dyrektaram niekalkich kampanij.
Pa viersii śledstva, z 2016 pa luty 2019 jon chacieŭ pazyčyć nibyta na arhanizacyju kancertaŭ i finansavańnie budaŭnictva 1,1 miljona dalaraŭ, ale nasamreč nie płanavaŭ hetyja hrošy viartać.
Pa fakcie atrymaŭ ad šaści čałaviek 700 tysiač dalaraŭ. Z paciarpiełymi jon zaklučaŭ damovy pazyki ad svajho imia i imia svajoj kampanii. Hetyja dziejańni śledstva razhladaje jak machlarstva u asabliva bujnym pamiery (č. 4 art. 209 KK, ad 3 da 10 hadoŭ pazbaŭleńnia svabody).
Aproč taho, sa žniŭnia 2018 hoda pa vierasień 2019-ha Kosač, pa materyjałach spravy, skłaŭ i padpisaŭ ad imia zasnavalnika i dvuch supracoŭnikaŭ damovy na pradastaŭleńni pazyk.
Śledstva miarkuje, što na padstavie łžyvych dakumientaŭ Alaksandr atrymaŭ 800 tysiač rubloŭ, jakija naležali pradpryjemstvu. U hetym epizodzie taksama fihuruje kancert hurta Scorpions u «Minsk-Arenie».
Kosač damoviŭsia ź inšym arhanizataram kancerta, atrymaŭ na rachunak svajho pradpryjemstva 180 tysiač rubloŭ ad prodažu biletaŭ. Heta śledstva kvalifikuje jak kradziež u asabliva bujnym pamiery šlacham złoŭžyvańnia słužbovymi paŭnamoctvami (č. 4 st. 210 KK, ad 5 da 12 hadoŭ pazbaŭleńnia svabody sa štrafam).
Jašče adzin epizod pa machlarstvie: letaś Kosač prapanoŭvaŭ arhanizataru avijacyjnaha fiestyvalu Aviadrive 2020 u Ščučynie pryvieści na kancert adzin z muzyčnych hurtoŭ. Paprasiŭ za heta pieradapłatu 5 tysiač jeŭra i pracent ad hanararu, jaki składaŭ 33 tysiačy jeŭra. Abiacaŭ hrošy viarnuć, kali kancert nie adbudziecca.
I apošni epizod — karupcyjny. Pa viersii śledstva, u lutym 2021-ha Kosač razam sa znajomym schilaŭ dyrektara adnoj ź firmaŭ pieradać im 1,8 miljona dalaraŭ, kab damovicca na vydzialeńnie ziamli pad budaŭnictva žyłoha doma.
Dyrektar kampanii pieradaŭ im 75 tysiač dalaraŭ, u toj ža dzień ich zatrymali: 50 tysiač dalaraŭ znajšli ŭ Kosača, 25 tysiač — u jahonaha znajomaha, ale jaho pa hetaj spravie nie sudziać, u kletcy znachodzicca tolki adzin abvinavačany (č. 2 art. 431 KK, za saŭdzieł u karupcyi ŭ vyhladzie dačy chabaru pahražaje da 5 hadoŭ «chimii» abo ad 2 da 7 hadoŭ kałonii).
Alaksandr Kosač u sudzie zajaviŭ, što nie pryznaje siabie vinavatym. Jon utrymlivajecca pad vartaj.
Kubrakoŭ davodziŭ, što milicyjant Zhirski nie datyčny da bandy nalotčykaŭ. Ciapier taho sudziać — pahražaje da 20 hadoŭ3
Kamientary