Što adbyvajecca z Fejsbukam i Instahramam: pałomka, chakierskaja ataka, techničny pravał?
Facebook, Instagram i WhatsApp adklučylisia dla karystalnikaŭ pa ŭsim śviecie, zajaviŭ hihant sacyjalnych sietak u paniadziełak, pracujučy nad adnaŭleńniem servisaŭ paśla adnaho z samych praciahłych zbojaŭ.
Facebook niedastupny, tamu što karystalniki nie nakiroŭvajucca ŭ patrebnaje miesca sistemaj damiennych imionaŭ. Sacsietka sama kantraluje adpaviednyja nałady, tłumačyć Reuters.
Ekśpierty pa biaśpiecy, jakija adsočvajuć situacyju, zajavili, što adklučeńnie, vierahodna, było vyklikana pamyłkaj kanfihuracyi, z-za jakoj maršruty da siervieraŭ Facebook byli niedastupnyja. Heta mahło być vynikam unutranaj pamyłki, choć tearetyčna mahčymy sabataž zvonku.
Uzłom zvonku ličycca mienš vierahodnym. Ź inšaha boku, masavaja ataka typu «admova ŭ absłuhoŭvańni», jakaja zdolnaja pakłaści adzin z samych papularnych u śviecie sajtaŭ, patrabuje albo kaardynacyi pamiž mahutnymi złačynnymi hrupoŭkami, albo vielmi inavacyjnaj techniki.
Facebook pryznaŭ, što ŭ karystalnikaŭ uźnikli prablemy z dostupam da jaho prahramy, ale nie padaŭ nijakich padrabiaznaściaŭ ab charaktary prablemy abo ab tym, kolki karystalnikaŭ paciarpieli ad zboju.
«My pracujem nad tym, kab jak maha chutčej viarnuć usio ŭ normu, i prynosim prabačeńni za lubyja niazručnaści», — napisaŭ u Tvitery Facebook prykładna praz 30 chvilin paśla pieršych paviedamleńniaŭ ab zboi.
Adkazać Fejsbuku było našmat składaniej, tamu što supracoŭniki stracili dostup da niekatorych svaich ułasnych instrumientaŭ z-za adklučeńnia, kažuć ludzi, jakija adsočvajuć hetaje pytańnie.
Jak kaža Brajan Krebs, viadomy ekśpiert u śfiery kibierbiaśpieki, vyhladaje, što DNS-zapisy Fejsbuka byli kimści prybranyja z hłabalnych tablic maršrutyzacyi — inakš kažučy, z «adrasnaj knihi» internetu.
Heta datyčycca taksama Instahrama i, vierahodna, inšych resursaŭ, jakija trapili pad ataku. Kali vy ŭvodzicie ŭ radok braŭziera adnu z spasyłak na hetyja sajty, jana pavinna vieści na resurs. Ale sistema, što davała mahčymaść hetaj suviazi pracavać, zaraz nie funkcyjanuje.
«Heta možna paraŭnać z tym, što vy prychodzicie ŭ vialiki ofisny centr na sustreču, ale sakratara niama na mieście. Vy (ci, u vypadku ź siońniašnim zbojem, vaš kampjutar) prosta zastajaciesia na svaim mieście, bo nie viedajecie, u jaki kankretna ofis vam treba trapić», — tłumačyć ekśpiert.
Pakul niajasna, jak heta zdaryłasia. Fejsbuk — nastolki vialikaja kampanija, što jana sama kantraluje ŭłasny DNS, tamu tolki niechta ŭnutry kampanii moh spynić pracu hetaj sistemy.
Akcyi Fejsbuka, u jakoha amal 2 miljardy aktyŭnych štotydniovych karystalnikaŭ, u paniadziełak źnizilisia na 5,7%. U pieravodzie na rynačny košt heta aznačaje padzieńnie bolš čym na 50 miljardaŭ dalaraŭ.
Dziŭnaje supadzieńnie: litaralna za niekalki hadzin da hłabalnaha zboju Fejsbuk trapiŭ u stužki navinaŭ va ŭsim śviecie praź śviedčańni vykryvalnika, što śćviardžaŭ, nibyta kampanija addała pieravahu vyhadzie, a nie biaśpiecy.
Frensis Chaŭhien, byłaja mieniedžarka kampanii, pradstaviła žurnalistam Wall Street Journal šerah unutranych dakumientaŭ Fejsbuka. Zhodna ź imi, u kampanii viedali, što praca ich sacsietak drenna ŭpłyvaje na hramadstva i karystalnikaŭ, adnak ničoha ŭ suviazi z hetym nie pradprymali.
Naprykład, palityka Fejsbuk sadziejničaje raspaŭsiudu dezynfarmacyi i źviazanaha z hvałtam kantentu, a sacsietka Instahram, što naležyć karparacyi, drenna ŭpłyvaje na stan dziaŭčat-padletkaŭ.
U svaju čarhu Tviter, inšy papularny servis paviedamleńniaŭ, pažartavaŭ navat sa svaich kankurentaŭ: «Pryvitańnie ŭsim», — napisaŭ aficyjalny akaŭnt u Vialikabrytanii.
«Na praciahu 30 hadoŭ niezaležnaści biełaruskamoŭnyja biuleteni zadavalniali ŭsich». Kamunisty abvinavacili Bondaravu ŭ raspalvańni varožaści na moŭnaj hlebie1616
Kamientary