U rasparadžeńni «Našaj Nivy» akazaŭsia list hienieralnaha prakurora Alaksandra Kaniuka na imia kiraŭnika MUS Juryja Karajeva.
Kaniuk prosić arhanizavać pravierku Valeryja Capkały na mahčymuju datyčnaść da supraćpraŭnaj dziejnaści, fota dakumienta apublikavana ŭ telehram-kanale HARBACEVIČ.
U jakaści padstavy da lista prymacavana zajava turka Ihdziedžy Siedata, jaki prosić pryciahnuć Capkału da kryminalnaj adkaznaści.
Siedat — heta kolišni zabudoŭščyk PVT, čyja kampanija raniej sapraŭdy fihuravała ŭ sumnieŭnych siužetach pobač z proźviščam Capkały.
Na pačatku lista, adrazu paśla ustanovačnych źviestak, idzie revierans u bok Łukašenki.
Sens pretenzij turka ŭ tym, što, nibyta, kali Capkała byŭ kiraŭnikom PVT, to, karystajučysia svajoj upłyvovaściu, abiacaŭ jamu vyhadnyja dzialanki dla dalejšaj zabudovy.
Za što, śćviardžaje Siedat, jamu davodziłasia ŭ roznych formach rabić pryjemnaje Capkału: ad apłaty adpačynkaŭ da budaŭnictva doma i pramych pieradač hrošaj.
Nazvanym padziejam, jakija nibyta mieli miesca, užo 7 hod.
Redakcyja nie pryvodzić całkam list Siedata, bo jon utrymlivaje infarmacyju, jakuju niemahčyma paćvierdzić, a taksama intymnyja detali žyćcia Capkały, jakija mohuć być vydumany.
Varta adznačyć, što Capkału ŭžo zadavali pytańni pra «kampramat» na jaho, pra jaki kazaŭ Łukašenka, ale Capkała tady prosta admachnuŭsia.
Dakumient pastupiŭ u MUS 24 červienia.
«Dla praviadzieńnia daśledčaj pravierki ŭ Ministerstva ŭnutranych spraŭ z Hienieralnaj prakuratury pastupili materyjały pa zajavie hramadzianina Turcyi ab faktach supraćpraŭnaj dziejnaści V. U. Capkały, pravodzicca pravierka, — raspaviała TUT.BY pres-sakratar MUS Volha Čamadanava.
Kamientary