Historyk Anatol Hryckievič u svajoj novaj knizie apisaŭ baraćbu za Biełaruś u 1918-1921

Aŭtar vietliva sustrakaje haściej, choć u jahonych ruchach adčuvajecca stoma, čas ad času jon mocna kašlaje.

A siadziba TBM nie źmiaściła ŭ sabie ŭsich achvotnych. 30 studzienia dziesiatki čałaviek zapoŭnili abodva pakoi, kab trapić na prezientacyju knihi historyka Anatola Hryckieviča «Vybranaje».

Jak adznačana ŭ samoj knizie: «Hetaja kniha raźličana na samyja šyrokija koły čytačoŭ, jakim peŭna mała što viadoma ab pierepietyjach vajny pamiž Savieckaj Rasijaj i Polščaj 1919–1920 hadoŭ. Aŭtary savieckaj historyi zaŭsiody vyznačali hetuju vajnu, jak „pachod Antanty“, niahledziačy na toje, što realnaja baraćba adbyvałasia za ŭstalavańnie novych miežaŭ pamiž Rasijaj i Polščaj. Abiedźvie dziaržavy pretendavali na terytoryju Biełarusi i Ukrainy».

Kniha raskryvaje miechanizmy vajny pamiž Rasijaj i Polščaj 1919—1920 hh.

«Knihu, jakuju ja prezientuju siońnia, heta vykład historyi 1918—1921 hh. u Biełarusi. Pryznacca, našyja biełaruskija historyki, kali i pisali pra hetyja hady raniej, to pisali z maskoŭskaha punktu hledžańnia. Ja pasprabavaŭ pahladzieć na tyja padziei z našaha boku i imknuŭsia być abjektyŭnym, — raspaviadaje pra svaju knihu aŭtar. — Rasiejski bok piša pra adny pieramohi. Kudy ni pahladzi, paŭsiul jany pieramožcy», — žartavaŭ jon.

Anatol Piatrovič žartuje, ale ruchajecca pavolna, lohkaja ščeć, zdajecca, adlustroŭvajecca na šerym švedry. Tolki vočy, sumnyja i mudryja, nieadryŭna sočać za kožnym vystupoŭcam.

Historyja ž ułasna knihi raspačałasia z adnaho telefanavańnia žonki historyka. Zasnavalnik sieryi «Biełaruski knihazbor» Kastuś Ćvirka ŭzhadvaje: «Jana mnie nabrała i skazała, što niakiepska było b vydać hetuju knihu ŭ sieryi «Biełaruski knihazbor». U vyniku kniha vyjšła ŭ zialonaj sieryi «historyka-litaraturnyja pomniki» i maje nakład 1000 asobnikaŭ.

U knizie adlustravana i historyja baraćby za Biełaruś, i historyja BNR, i polski nacyjanalny ruch u Biełarusi, i adnosiny pamiž BNR i Litvoj, a taksama vialikaja kolkaść histaryčnych padziej, jakija tyčylisia hramadzianskaj vajny ŭ Rasii.

«Baraćba za Biełaruś u pačatku XX stahodździa — heta jak hłytok pavietra, krynica natchnieńnia dla siońniašnich biełarusaŭ», — kaža Alena Anisim, pieršy namieśnik staršyni TBM.

«Biełarusam treba čytać svaju historyju, i čytać na biełaruskaj movie», — dadaje Anatol Hryckievič.

Darečy, 31 studzienia patryjarchu biełaruskaj histaryčnaj navuki spaŭniajecca 84 hady.

• 0
• 0
• 0
• 0
• 0
• 0
• 0
• 0