Гасцінічны нумар у беларускім райцэнтры шакаваў сацсеткі
Жанчына ў тыктоку паказала, як выглядае нумар у гасцініцы ў пасёлку Акцябрскі Гомельскай вобласці, але многія ёй не паверылі.
25.08.2024 / 18:41
Нумар у гатэлі «Акцябрская». Фота: oktgkh.by
Пра гэта піша выданне «Зеркало».
Блогерка зняла на відэа нумар у гасцініцы ў пасёлку Акцябрскі, суткі пражывання ў якім каштуюць 72 рублі. Мяркуючы па інфармацыі з каментароў, гаворка ідзе пра трохзоркавую гасцініцу, якая названая па назве населенага пункта. Гасцініцай у цэнтры пасёлка кіруе камунальнае прадпрыемства.
«Ну што ж, мы вяртаемся ў Савецкі Саюз, няхай жыве СССР!» — усклікнула жанчына, зайшоўшы ў пакой.
Спачатку яна звярнула ўвагу на афарбаваныя белай фарбай уваходныя дзверы, якія зачыняліся клямкай, а з унутранага боку дзвярэй быў чырвоны знак у выглядзе перакрэсленай цыгарэты і надпіс «Не курыць!».
«Санвузел і люстэрка ёсць. Оба-на, якія тут адкосікі прыгожыя», — перайшла тыктокерка ў туалет, сумешчаны з душам.
Сцены невялікага санвузла былі абліцаваны белай кафляй, падобна, зробленай яшчэ да «перабудовы», месцамі былі ўстаўкі кафлі іншага колеру. На падлозе таксама была кафля, месцамі пакрытая аблезлай фарбай і заляпаная цэментам. Мабыць, паддон душа таксама быў калісьці афарбаваны, але большая частка пакрыцця ўжо сцерлася.
«А ложкі якія! Тэлевізар ёсць нават, гэта вам не хухры-мухры», — сказала жанчына, зайшоўшы ў пакой і ўбачыўшы старыя ложкі, тумбачкі і тэлевізар-кубік.
Нумар у гасцініцы. Фота: Яндэкс
Большасць гледачоў здзівіліся, а некаторыя і не паверылі, што такія ўмовы могуць быць у гатэлі Беларусі. Некаторыя людзі заступіліся за «Акцябрскую», маўляў, гэта правінцыя.
«Ды гэта правінцыя, гэта нармальна для такіх непраязных гарадоў, сумна, але факт. Дык яшчэ і 72 рублі. Але што маем, тое маем, трэба ім спонсараў шукаць».
«Гэта ў Беларусі ў Акцябрскім? Які ў Гомельскай вобласці? Не можа такога быць, вы падманваеце», «Ого, ты пабывала ў мінулым», «Якія суткі [72 рублі]? Гэта за 5 гадоў наперад», «Усё ж такі ў палатцы круцей», — адгукнуліся іншыя каментатары.
Санвузел у гасцініцы. Фота: Яндэкс
Памятаеце рэктарку Гродзенскага ўнівера, якая ўзарвала тыкток? На пяты ёй наступае рэктар з Полацка
Руферы залезлі на шматпавярховік у Мінску і знялі на відэа навальніцу. Зараз іх будзе шукаць міліцыя
Кветкавая крама пасадзіла памідоры на вуліцы. Ураджай скралі проста з-пад камер відэаназірання