Максім Шабуцкі прапаноўвае дэмаралізаваць рэжым Лукашэнкі стварэннем новага сілавога блока — што канкрэтна прапануе?
Фракцыя «Незалежныя беларусы» на чале з блогерам Максімам Шабуцкім у сваёй перадвыбарчай праграме ў КР агучыла жаданне стварыць адзіны нацыянальны вызваленчы рух на базе беларускай дыяспары і ўзмацніць сілавы рэсурс за мяжой: «Улічваючы геаграфічнае становішча Беларусі, а таксама напружанае геапалітычнае становішча ў рэгіёне, мы лічым мэтазгодным рыхтаваць нацыянальныя групы хуткага рэагавання як мінімум у трох краінах — Польшча, Літва і Латвія. А таксама ініцыяваць стварэнне двух беларускіх падраздзяленняў у Польшчы».
У кулуарах вялікай палітычнай канферэнцыі дэмсілаў журналіст «Нашай Нівы» распытаў Максіма Шабуцкага пра гэтыя планы больш падрабязна.
Фракцыя «Незалежныя беларусы» настойвае, што патэнцыял беларускай дыяспары не выкарыстоўваўся напоўніцу, і гэта адна з памылак, якую яны хацелі б выправіць.
Пры сваёй прыхільнасці да змены ўлады негвалтоўным шляхам у фракцыі лічаць за неабходнае мець у арсенале інструменты, якія маглі б дадаць дэмакратычным сілам упэўненасці, а рэжыму Лукашэнкі — дэмаралізацыі.
«Беларус, які хоча сілавога сцэнару — дурань, а беларус, які не хоча рыхтавацца да сілавога сцэнару — вар’ят», — падкрэслівае Максім Шабуцкі.
«У нас велізарная колькасць рабят, якія прайшлі полк Каліноўскага, якія самі хочуць далей трэніравацца. Траекторыю, па якой будзе развівацца сітуацыя ў Беларусі, нам ніхто не падкажа. Але трэба рыхтавацца. Ідэя стварэння нацыянальных груп хуткага рэагавання з ліку беларусаў, якія маюць баявы досвед, а таксама з тых, хто жадае яго атрымаць — гэта не маё бачанне, а жаданне саміх людзей», — кажа Шабуцкі.
Акрамя гэтага, фракцыя агучыла жаданне ініцыяваць стварэнне двух беларускіх падраздзяленняў у складзе [сілавых структур] Польшчы: у сухапутных войсках і памежнай службе. Як яны збіраюцца гэта праварочваць?
«Я размаўляў з польскім палкоўнікам сухапутных войскаў у адстаўцы. Ён сказаў, што тэарэтычна гэта магчыма. Калі будуць людзі з баявым досведам, гатовыя, то на ўзроўні заканадаўства гэтую ініцыятыву можна праштурхнуць. Адзінае, патрэбны суб’ект, які будзе прапіхваць яе: афіцыйны прадстаўнік беларускай апазіцыі. І тут якраз Каардынацыйная рада можа стаць гэтай платформай. Зноў жа: гэта мае сэнс для нашых людзей з баявым досведам, для іх легалізацыі: навошта ім ісці працаваць у крамы — «Жабку» ці «Бедронку». Атрыманне досведу ў польскай арміі куды больш карысна», — кажа Шабуцкі.
Пры гэтым Шабуцкі не лічыць, што гэтыя людзі ці нехта з палка Каліноўскага павінны вызваліць Беларусь.
«Гэта беларуская нацыянальная філасофія нейкая — сядзець на печцы, нічога не рабіць і жыць у надзеі. Мы гэтак жа абралі Лукашэнку ў 1994-м: прыйшоў чалавек, які сказаў, што вырашыць нашы праблемы ў цяжкай сітуацыі — так мы яго і выбралі. А тут мы спадзяемся на Полк Каліноўскага ці яшчэ каго.
Ніколі ніякі полк не вызваліць краіну. Без беларусаў унутры Беларусі такое немагчыма нават у тэорыі, і разважаць пра гэта неразумна. Толькі разам, толькі аб’яднанне, толькі адзіны нацыянальна-вызваленчы рух, як бы пафасна гэта ні гучала. У адзіночку я ўжо спрабаваў рабіць рэвалюцыю з падвала, яно так не працуе».
Калі выбары ў КР пройдуць без дастатковай увагі беларусаў з Беларусі, Максім Шабуцкі будзе вініць у гэтым толькі саміх палітыкаў.
«Спачатку мы тут, за мяжой, павінны стварыць платформу, якой можна ганарыцца, а потым з’явіцца цікаўнасць усіх беларусаў. Унутры краіны ў іх там праблем сваіх хапае. Так што з сябе патрэбна пачынаць: перш чым наводзіць парадак у краіне, трэба прыбрацца ў кватэры. Бо, шчыра кажучы тое, што ў нас сёння ў дэмакратычных сілах — гэта сумна: скандал за скандалам… Давайце створым хаця б адзін орган, які будзе функцыянаваць эфектыўна. І потым ужо астатнія крокі.
Каментары
Адзін расеізаваны homo sovieticus хоча знесці рэжым іншага расеізаванага саўка. Цырк.
идея объединится может и хорошая, но с одной стороны грантососы , для которых главное обосновать новый грант, а на идею они ложили с прибором, а с другой стукачи на бюджете, тоже с премиями за отлов недовольных, притом среди первых, половина вторых!