Ціханоўская пра Пракоп'ева: У чалавека шмат энергіі, шмат што хоча рэалізаваць, але неяк усё кідае
Лідарка дэмакратычных сілаў Беларусі Святлана Ціханоўская ў новым ТОКу падзялілася сваім стаўленнем да Вадзіма Пракопʼева, а таксама яго плану абʼяднання беларускай дыяспары і пераўтварэння яе ў палітычную сілу.
Падчас інтэрвʼю Святлана Ціханоўская адказвала на пытанні, што даслалі ёй чытачы «Нашай Нівы». Адно з іх было наступным: «Чаму Пракопʼева няма ў Кабінеце? Чаму вялізная энергія гэтага чалавека ніяк не выкарыстоўваецца? Чаму Кабінет яго пазбягае?»
Святлана Ціханоўская пагадзілася з тым, што Вадзім Пракопʼеў, знаёмства з якім у яе адбылося ў 2020-м годзе, — вельмі энергічны чалавек, які поўніцца ідэямі і ўсяляе ў навакольных упэўненасць. Разам з тым, па словах Святланы, у яе склалася ўражанне, што задуманае Пракопʼеў часта не даводзіць да канца:
«Я не хачу нікога пакрыўдзіць. У чалавека шмат энергіі. Шмат што хоча рэалізаваць. Але неяк усё кідае». Калі ж гаварыць аб тым, чаму Пракопʼева няма ў Кабінеце, то Святлана заўважыла, што палітык — «сам сабе гаспадар», і таму «наўрад ці будзе працаваць у структуры, прытрымлівацца нейкіх пэўных правіл. Ён — чалавек-свята».
Пра «план Пракопʼева»
У далейшай размове лідарка дэмакратычных сілаў Беларусі дала сваю ацэнку плану Вадзіма Пракопʼева аб абʼяднанні беларускай дыяспары і стварэння з яе рэальнай палітычнай сілы.
«Тут ёсць спрэчны момант. Калі мы кажам «трэба абʼядноўваць», то гэта выглядае так, што людзі не абʼяднаныя. Абʼяднанне адбываецца, калі ў нас ёсць супольныя дзеянні. Заўжды, калі кажаш, што трэба нешта зрабіць, прыходзяць, абʼядноўваюцца і робяць», — заўважае Ціханоўскае і дадае, што разумее пасыл Пракопʼева аб стварэнні агульнай структуры.
«Магчыма, гэта добрая ініцыятыва. Але я не ўпэўненая, што так будзе працаваць, бо кожная дыяспара — асобная адзінка. Нават унутры адной дыяспары ёсць падзелы. Розныя арганізацыя спрабуюць працаваць разам. І не заўжды ў іх гэта атрымліваецца. І гэта нармальна. Нам не трэба сядзець у адным пакоі, каб усе бачылі, што мы абʼяднаныя. Галоўнае, што робіцца агульная справа».
У цэлым, па словах Ціханоўскай, ідэя, агучаная Пракопʼевым, добрая, і яна жадае яе паспяховай рэалізацыі. Але для гэтага патрэбны дзеянні.
Пра «чатыры акны магчымасцяў» Пракопʼева
Вадзім Пракопʼеў агучваў чатыры акна магчымасцяў. Гэта выбары 2025 года, перамовы паміж Расіяй і Украінай, раптоўная смерць Лукашэнкі, змена ўлады ў Крамлі. Ці бачыць гэтыя вокны Святлана Ціханоўская і ці згодная з тым, што іх можна ўспрымаць як магчымасці? І якое з іх найбольш рэалістычнае?
Святлана Ціханоўскай заўважыла, што акрамя названых Пракопʼевым, некалькі іншых вокнаў магчымасцяў адзначаныя ў Стратэгіі дэмакратычных сіл.
Але задача не ў тым, каб іх бачыць, а ў тым, каб быць да іх падрыхтаванымі. У той жа час нельга падрыхтавацца да ўсіх. Зразумела, што можна прапісаць канкрэтныя крокі па кожнаму з іх, але, як заўважае Ціханоўская, няма ўпэўненасці, што ўсё пойдзе па плане.
Цяжка сказаць, якое з названых вокнаў магчымасцяў найбольш рэалістычнае.
«Мы павінны ўкладвацца ў тое, каб аслабіць рэжым. Каб у выпадку, калі адно з гэтых вокнаў адчынілася, рэжым быў максімальна слабы», — адзначае Ціханоўская.
На погляд лідаркі дэмакратычных сілаў Беларусі, перамены ў Беларусі адбудуцца нашмат раней за перамены ў Расіі. Гэта яна тлумачыць тым, што беларускае грамадства больш кансалідаванае.
«Мы не можам прадугледзець, як што будзе адбывацца. Але трэба трымацца разам, супрацоўнічаць, быць у пастаянным кантакце з беларусамі ўнутры краіны.
Я ні ў якім разе не хачу, каб нас падзялялі на тых, хто застаўся, і тых, хто зʼехаў. Зразумела, тыя, хто зʼехаў, могуць і павінны рабіць больш. Мы павінны рабіць працу і за сябе, і за тых, хто ў краіне. Але мы павінны памятаць, што шмат робіцца і ўнутры краіны. Камунікацыя павінна быць. Мы павінны рыхтавацца да любога акна магчымасцяў».
Глядзіце цалкам:
Чалы: Чым даўжэй Лукашэнка марудзіць з выбарамі, тым больш аргументаў, каб яму не ісці15
Каментары