З'явіліся падрабязнасці гібелі каліноўцаў у Бахмуце: «чацвёра засталося пад заваламі»
Забраць іх целы з-за шчыльнага агню пакуль няма магчымасці.
Прадстаўніца палка імя Кастуся Каліноўскага расказала, як загінулі беларускія ваяры.
Паведамляецца, што байцы батальёна «Волат» утрымлівалі пазіцыі ў Бахмуце.
«Нашы хлопцы адбівалі штурм акупантаў і вялі стралковы бой. Па доме, у якім яны знаходзіліся, ударылі буйнакалібернай артылерыяй. Будынак абрынуўся. Частка байцоў апынулася пад заваламі.
Другая група разам з медыкамі выправілася туды для эвакуацыі байцоў, якія засталіся пад заваламі, і аказання дапамогі. Чацвёра ваяроў засталося пад заваламі без магчымасці іх эвакуацыі.
У момант эвакуацыі і прыкрыцця адыходу групы загінуў камандзір групы. Ён коштам свайго жыцця даў магчымасць эвакуяваць параненых», — расказала каліноўка.
Пазней была адпраўлена трэцяя група для разбору завалаў і эвакуацыі цел забітых. Аднак у выніку артылерыйскага абстрэлу будынак быў цалкам разбураны.
«Баі працягваюцца. Магчымасці забраць целы зараз няма», — расказала прадстаўніца палка.
Раней полк паведамляў пра гібель аднаго байца і знікненне без вестак яшчэ чатырох.
Вядома пра 22 беларусаў, якія загінулі пасля лютага 2022-га, баронячы Украіну і Беларусь. Яшчэ чацвёра знікла без вестак, двое трапіла ў палон. Усяго ў складзе ўкраінскай арміі ваююць сотні грамадзян-беларусаў. Полк Каліноўскага — самая вялікая са структур, дзе служаць беларусы.
Баі за Бахмут ідуць ужо дзевяць месяцаў. Гэты кірунак застаецца адным з самых гарачых месцаў на фронце. Ад 10 мая ўкраінскія войскі тут перайшлі ў контрнаступ і ў зацятых баях вярнулі кантроль над 25 квадратнымі кіламетрамі на поўнач і паўднёвы захад ад горада, у тым ліку над шэрагам важных вышынь.
Беларускія падраздзяленні панеслі цяжкія страты пад Бахмутам. Некалькі чалавек загінула
Украінскі контрнаступ: як ён паўплывае на Беларусь і ці з’явіцца ў Лукашэнкі шанс праявіць самастойнасць?
Як ацэнка сілаў беларускіх добраахвотнікаў уплывае на палітыку Лукашэнкі
Дзяніс Урбановіч атрымаў чацвёртае раненне. У Бахмуце
Сілавікі ўзяліся за карыстальнікаў твітара — дзясяткі акаўнтаў звычайных беларусаў сталі «экстрэмісцкімі»6
Каментары